Karanta Tarihin Rayuwar Socrates A Takaice

Socrates tsohon masanin falsafa ne na Girka wanda ake ganin shi ne tushen tunanin Yammacin Turai. An yanke masa hukuncin kisa saboda salon aƙidarsa sa ta Socratic.

Tarihin Rayuwar Socrates A Takaice

Hoto: Humanidades

Marubuci: Saliadeen Sicey

A cikin 399 kafin haihuwar Annabi isa (A.S), an zarge shi da rashin adalci da lalata matasa. Bayan shari’ar da aka shafe kwana guda ana yi masa an yanke masa hukuncin kisa. Ya yi ranarsa ta ƙarshe a gidan yari, ya ƙi tayin taimaka masa ya tsere.

Wane ne Socrates?

Socrates masani ne, malami kuma masanin falsafa da aka haife shi a tsohuwar Girka. Hanyarsa ta koyarwar Socratic ta kafa tushen tsarin dabaru da falsafar Yammacin Turai.

A lokacin da yanayin siyasa na Girka ya juya masa baya, an yanke masa hukuncin kisa ta hanyar shayar dashi guba a shekara ta 399 kafin haihuwar Annabi isa (A.S). Ya yarda da a zartar masa da wannan hukuncin maimakon ya gudu zuwa gudun hijira.

Shekarun Farko

An haife shi kimanin Shekaru 470 Kafin Haihuwar Annabi isa (A S) a Birnin Athens, na ƙasar Girka, rayuwar Socrates ta kasance ta hanyar tattaunawa da Plato da Xenophon da kuma wasan kwaikwayo na Aristophanes (Wani Marubucin wasan kwaikwayo na Girka).

Waɗannan da rubuce-rubucen su ne aka fi sani a tarihin sa, wataƙila babu wani wanda ya ba da cikakken tarihinsa.

Rubuce-rubucensa suna bada labarin sa na musamman da haske na falsafar Socrates da halayensa.

Socrates ɗan Sophroniscus ne, wani mai sana’ar sassaƙar dutse a birnin Athens, mahaifiyarsa wata ma'aikaciyar jiyya/jinya ce mai suna Phaenarete. Domin shi ba ɗan sanannen gida ba ne wataƙila ya sami ilimin Firamare, Sakandare, tare da ƙarin matakin gaba da sakandare don koyon sana'a. Kuma ya koyi sana’ar mahaifinsa tun yana ƙarami.

An yi imani cewa Socrates ya yi aiki a matsayin mai buga bulon dutse a shekaru da yawa kafin ya sadaukar da rayuwarsa ga falsafa.

Masana tarihi sun yi saɓani akan ta yadda Socrates ya zama masanin falsafa. Masana falsafa irinsu Xenophon da Aristophanes da Plato sun biya kuɗi don a koyar da su, amma Socrates ya ƙi amincewa da ya biya kuɗin, yana mai nuni da talaucinsa a matsayin hujja.

Socrates ya auri wata ƙaramar yarinya mai suna Xanthippe, wadda ta haifa masa 'ya'ya uku: Lamprocles, Sophroniscus da Menexenus. Duk wasu majiyoyin tarihi sun ce bai cika son ta ba.

Na farko matar tasa Xanthippe ba ta farin ciki da sana'ar Socrates, na biyu kuma ba ta yi ƙorafin cewa ba ya kula iyali a matsayin masanin falsafa ba. Ta hanyar kalmominsa, Socrates ba shi da alaƙa da tarbiyyar 'ya'yansa maza sai dai kawai ya fi nuna sha'awar ci gaba da ilimantar da sauran yara maza a birnin Athens.

Rayuwa a Athens

Dokar Athens ta buƙaci duk mazan da ke da lafiya da su yi aiki a matsayin sojojin ƙasa, ana ɗaukar sojoji daga shekaru 18 zuwa 60. A cewar Plato, Socrates ya yi aiki a cikin sojojin da ke ɗauke da makamai - wanda aka fi sani da hoplite - masu ɗauke da garkuwa, da dogon mashi da abin rufe fuska.

Ya shiga yaƙe-yaƙe guda uku a lokacin yaƙin Peloponnesia, a Delium, Amphipolis da Potidaea, inda har ya ceci rayuwar Alcibiades, wani mashahurin janar na Athenia.

An san Socrates don ƙarfinsa a cikin yaƙi, da rashin tsoro, halin da ya kasance tare da shi a tsawon rayuwarsa. Bayan shari’ar da aka yi masa, ya kwatanta ƙin ja da baya daga hukuncin shari’a, da yadda soja ya ke ƙi ja da baya daga yaƙi, sa’ad da aka yi masa barazanar kisa.

Plato ya ba da cikakkun bayanai game da kamannin Socrates na zahiri. Inda ya ce Gajere ne mai hanci kodayaushe idan yana magana yana lumshe idanu.

Duk da haka, Plato ya nuna cewa a idanun ɗalibansa, Socrates mutum ne mai kwarjini, saboda kyakkyawar muhawararsa da tunani mai zurfi.

Socrates a koyaushe yana jaddada muhimmancin hankali akan mahimmancin jikin ɗan adam, cewa hankali ya fi jiki. Wannan ra'ayi ya zaburar da falsafar Plato na raba gaskiya zuwa sassa biyu daban-daban, duniyar hankali da duniyar tunani, yana bayyana cewa na ƙarshe shi ne kaɗai mai muhimmanci.

Falsafa

Socrates ya yi imanin cewa ya kamata falsafar ta sami sakamako mai amfani don jin daɗin rayuwar al'umma. Ya yi ƙoƙari ya kafa tsarin ɗabi'a bisa ga tunanin ɗan adam maimakon koyarwar tauhidi.

Socrates ya nuna cewa sha'awar farin ciki ne ya motsa zaɓin ɗan adam. Hikima ta ƙarshe tana zuwa ne daga sanin kai. Da zarar mutum ya sani, hakan zai sa ya ƙara fahimtarsa ​​da yin zaɓin da zai kawo masa farin ciki na gaske.

Socrates ya yi imanin cewa a fassara wannan zuwa siyasa tare da mafi kyawun tsarin gwamnati, ba ta azzalumai ko dimokuraɗiyya ba. Maimakon haka, aikin gwamnati mai adalci shi ne bada ilimi da nagarta, kuma ta sanya talakawanta su mallaki cikakkiyar fahimtar kansu.

Hanyar Socratic

Ga Socrates, Athens ta kasance aji kuma ya ci gaba da yin tambayoyi ga manyan mutane da talakawa, yana neman gaskiyar siyasa da ɗabi'a. Socrates baya yin lacca game da abin da bai sani ba. Hasali ma ya yi iƙirarin cewa shi jahili ne mai hikima, domin ya san jahilcinsa.

Ya na yin tambayoyi ga ’yan uwansa mutanen Athens ta hanyar Hanyar Socratic - Wani lokaci suna ba shi amsa daidai, hakan ya sa abokan hamayyar Socrates suke matsa wauta. tsarinsa na Socratic wasu sun yaba da shi, wasu kuma suka rinƙa yi masa ba'a.

A lokacin rayuwar Socrates, Athens ta sami canji mai ban mamaki saboda mulkin mallaka ta canja daga yadda take a gargajiyance zuwa tsarin mulkin Sparta da ta yi a yaƙin Peloponnesia. Mutanen Atina sun shiga wani lokaci na rashin kwanciyar hankali da shakku game da ainihin matsayinsu a duniya.

A sakamakon haka, sun koma son ɗaukaka da son dukiya, Socrates bai yadda da waɗannan ɗabi'un ba, tare da nacewa da jaddada mahimmancin hankali.

Shari'ar Socrates

A cikin 399 kafin haihuwar Annabi isa, an zargi Socrates da lalata matasan Athens da rashin kunya, ko kuma bidi'ar zuhudu. Duk da haka Ya zaɓi ya kare kansa a kotu. 

Maimakon kare kansa a matsayin wanda ake tuhuma da aikata ba daidai ba, Socrates ya bayyana cewa ya taka muhimmiyar rawa a matsayin mutumin da ya shahara wajen ɓata wa wasu rai, wanda ke da muhimmanci ga al'ummarsa ta hanyar ci gaba da yin tambayoyi da ƙalubalantar matsayi da masu kare shi.

Kariyar Socrates ba ta gamsar da alƙalan kotun ba kuma sun yanke masa hukunci ta hanyar kada kuri'u 221 a cikin 280.

Mai yiwuwa ne rashin kariyar da ya ƙi baiwa kansa ya taimaka wajen yanke masa hukuncin, kuma ya ƙara dagula al'amura yayin da ake tattaunawa kan yanke hukuncin.

Dokar Athens ta ba wa ɗan ƙasa da aka yanke wa hukunci damar gabatar da wani hukunci na daban ga masu gabatar da ƙara, su kuma su yi kira ga alƙalan da za su yanke hukunci da su canja. Maimakon ya ba da shawarar a fitar da shi zuwa gudun hijira, Socrates ya ba da shawarar a girmama shi a birnin saboda gudunmawar da ya bayar don wayar da kan su, kuma a girmama shi don ayyukansa.

Alkalin kotun ya yanke masa hukuncin kisa ta hanyar shayar dashi guba.

Tasiri

Socrates ya yi tasiri mai ƙarfi a kan masana falsafa a zamanin dā kuma ya ci gaba da yin hakan a zamanin yau. Malaman addinin musulunci na zamanin da, sun yi nazari akansa, sun jinjina masa akan rawar da ya taka a juyin juya halin Girka, musamman a cikin rayuwarsa ta gudun duniya, da ƙoƙarin sa na ganin an rage rayuwar ƙasaita ta almubazzaranci, da kuma wadatuwa da abinda ya samu.

Shin Socrates Ya Gaskata Ubangiji?

Socrates ya gaskanta da Allah, kuma tunaninsa ya bambanta da na Athens. Socrates ya gaskanta cewa Allah ya kasance mai kyau da hikima. Abin bautarsa ​​yana da kyawawan halaye. Ubangijinsa kuma yana da manufa. kyau da hikima. Abin bautarsa ​​yana da kyawawan halaye. Ubangijinsa kuma yana da manufa.

Mutuwar Socrates

Kafin a kashe Socrates, abokai sun ba wa masu gadi cin hanci don su cece shi ya gudu zuwa gudun hijira.

Ya ƙi, yana mai cewa ba ya tsoron mutuwa, yana jin ba zai fi jin daɗi ba idan ya tafi gudun hijira, kuma ya ce har yanzu shi ɗan ƙasar Atina ne mai aminci, yana son ya bi dokokinta, har ma da dokar waɗanda suka yanke masa hukuncin kisa.

Yayinda ya amince da shan guba a maimakon tsira

Hoto: VCG WILSON, CORBIS/GETTY

Plato ya bayyana hukuncin kisa na Socrates a cikin tattaunawarsa ta Phaedo : Socrates ya sha gubar da aka cakuɗa, ba tare da wani jinkiri ba, a hankali ta ratsa jikinsa har ta kai zuciyarsa. Jim kaɗan kafin numfashinsa na ƙarshe, Socrates ya kwatanta mutuwarsa a matsayin fitar rai daga jiki.

Ya mutu Shekara 399 Kafin Haihuwar Annabi Isa (A.S) yana da shekaru 71.

Karanta Sauran anan»

Karanta Yadda Ake Zakkar Amfanin Gona Ko Hatsi

Malamai sun yi saɓani game da sharuɗɗan Zakkar amfanin gona.  Imamu Abu Hanifa cewa ya yi, duk abin da ake shukawa a ƙasa don amfan da shi to akwai Zakka a kansa. In ban da itatuwa da ciyayi da karmami.

Yadda Ake Zakkar Amfanin Gona Ko Hatsi

Hoto: Britannica

Shi kuwa Imam Ahmad sai ya ce, Zakka tana wajaba ne a kan duk abin da akan auna shi kuma ya kan bushe ya daɗe. Su kuwa Imamu Malik da Imamu Shafi’i, sai suka ce, zakka ba ta wajaba a kan amfanin gona sai wanda ake amfani da shi a matsayin abinci, kuma za a ajiye shi ya daɗe bai lalace ba.

Dangane da nisabi kuwa shi amfanin gona nisabinsa shi ne ya kai ‘wusuki biyar. Shi ‘wusuki’ ma’auni ne wanda kowanne ɗaya ya ke cin kwano sittin. Amma fa kwanon mai daidai da mudannabi huɗu. Watau a taƙaice dai idan aka ƙiyasta abin da aka noma aka ga zai kai kwano ɗari uku to ya wajaba a fitar masa da Zakka.

Game da abin da za a fitar kuwa, wannan ya danganta da irin ruwan da ya tsirar da amfanin. Idan da ruwan sama ya tsira, to sai a fitar da kashi ɗaya cikin goma. Idan kuwa ban ruwa aka yi, to sai a fitar da kashi ɗaya a cikin ashirin. Saboda faɗin Manzon Allah (S.A.W):

"فيما سقت السماء والعيون أو كان عثريا، العشر. وفيما سقي بالنضح نصف العشر".

“Abin da sama ta shayar, ko idanun ruwa, ko ya kasance mai jan ruwa ta jijiyarsa, to za a fitar da ɗaya cikin goma. Idan kuwa ban ruwa aka yi, sai a fitar da ɗaya cikin ashirin”. (Bukhari da Muslim suka rawaito.).

Karanta Sauran anan»

Dariya Dole: Bafulatani Da Dabbobi Masu Magana

Wani Bafulatanin ƙauye ne ya tafi kiwon shanu, to yana da kare, can da yamma ta yi sai ya kaɗo shanunsa don su dawo gida.

Bafulatani Da Dabbobi Masu Magana

Hoto: Ahmad Zada/Freepik

Suna tafiya yana dukansu, can sai wata saniya daga cikin su ta ce: "Haba Dan Allah, ka saurara mana da duka haka nan mana, kamar ka samu jakuna?

Koda jin haka sai wannan Bafulatanin ya fara gudu, yana ta gudu karen shi na biye da shi, sai da ya yi gudu kamar ran shi zai fita, sai ya samu wata bishiya ya nufi inuwarta da niyyar hutawa, da zaunawarsa sai ya ce "Wash!!! Tunda nake a duniya ban taɓa jin dabba ta yi magana ba sai yau" .

Sai karen shi ma ya ce: "Wallahi ni ma haka.

Tushe/Asali: Babu hanyar tabbatar da ainihin mamallakin rubutun, saboda rubutun yana yawo ne ba tare da asalin sunan mamallakin shi ba, amma mun yi gyare-gyare a rubutun domin ya nishaɗantar da ku tare da gamsar da ku.

Karanta Sauran anan»

Karanta Sakonnin Masoyi Masu Daɗi Sosai Ga Masoyiya

Ki sani cewa ni masoyinki ne, ina ƙaunarki sosai ba zan iya misalta miki ɗaukakar matsayinki a raina ba. Ina son ki har cikin zuciyata.

Sakonnin Masoyi Masu Daɗi Sosai Ga Masoyiya

Hoto: Vecteezy

Marubuci:- Sadeeq

Soyayyarki a daskare take cikin jinin jikina, a kodayaushe bugun zuciyata yana tafiya ne da mizanin adadin son da nake miki. Ina son ki har cikin raina.

A kodayaushe da shauƙin son ki da ƙaunarki nake kwana nake tashi.

Adadin fitar numfashina yana fitowa ne da furucin kalmar ina son ki.

Ina son ki yarda da cewa a rayuwata ba zan taɓa mantawa da ke ba koda mun rabu.

Gangar jikina za ta tafi da ƙwayar sonki da ƙaunarki.

Ina ƙaunarki ba zan so na ga ɓacin ran ki ba a rayuwata, ke kaɗai na ji ina so.

Tunaninki nake a kodayaushe, begen ki ne ya cika min zuciyata ko cikin barcina hoton fuskarki nake gani.

Karanta Sauran anan»

Tafiya Daidai Da Ra'ayin Kowa

Duk irin yanayin yadda ka kai ga kyautata wa mutane, akwai dubban zukatan da sam ba sa yin farin ciki da kai, koda kuwa za ka zama jagora wajen cimma dukkan muradan rayuwarsu, haka kuma a ƙarƙashin zukatansu sam ba sa yi maka fatan alkhairi a iya tsawon rayuwarka.

Tafiya Daidai Da Ra'ayin Kowa

Hoto: Real people group/iStock photo

Marubuci:- M. Kabiru Muhammad

Haka ma duk yadda ka kai ga ƙuntata wa mutane, akwai ɗaruruwan zukatan bayin Allah waɗanda suke yin farin ciki da kai, kuma sam ba sa son ɓacin ranka, sannan kuma ba za su gushe ba face sun kasance suna masu yi maka kyakkyawan fata gami da kyautata maka zato, koda kuwa ka fi kowa hatsari a cikin rayuwar al'umma baki-ɗaya.

Shawara ta a gare ka: Kai dai komai za kai, ka yi shi da kyakkyawar manufa da zuciya ɗaya, don neman yardar mahaliccin ka, ba neman yardar wasu ƙatti ba. 

Sannan ka sa wa ranka cewa, ba za ka iya farantawa kowa rai ba, haka kuma ba za ka iya burge kowa ba.

Amma muddin ka ɗauki aniyar tafiya daidai da ra'ayin kowa, ba shakka ka ɗauki aikin da sam ba a iya kammala shi har abada, koda kuwa a tsakanin 'yan uwan ka ne ko kuma iyalanka.

Kai dai kawai, ka yi iyakar abun da za ka iya yi, wanda ba zai takura ka ba. Ka manta da irin yanayin zantuttukan da mutane za su yi a game da hakan. 

Watarana komai zai zama tarihi a cikin rayuwarka gaba-ɗaya!

Ina roƙon Allah Maɗaukakin Sarki Ya sa dukkan Ibadun mu karɓaɓɓu ne, Ya kuma yi mana katangar ƙarfe da gurɓatattun mutanen cikin mu Amin Yaa Hayyu Yaa Qayyum!

Karanta Sauran anan»

Karanta Addu'a Idan Mai Azumi Zai Buɗa Baki

ذَهَبَ الظَّمَأُ، وَابْتَلَّتِ العُرُوقِ، وَثَبَتَ اْلأَجْرُ إِنْ شَاءَ اللهُ.

Zahabaz-zama-o wabtallatil-'urooq, wathabatal- ajru in shaal-lah.

Ƙishirwa ta tafi, an yayyafawa jijiyoyi ruwa, kuma lada ya tabbata in Allah Ya so.

Addu'a Idan Mai Azumi Zai Buɗa Baki

Hoto: Mother

Abdullahi bn Amr bn Al-As ya ce Manzon Allah, tsira da amincin Allah su tabbata a gare shi, ya ce: "Mai azumi yana da addu'a da ba a mayar da ita idan ya zo buɗe baki". 

Abdullahi bn Amr ya kasance idan ya zo buɗa baki sai ya ce;

اللّهُمَّ  إِنَّي أَسْأَلُكَ بِرَحْمَتِكَ الّتي وَسِعَتْ كُلَّ شَيْءٍ، أَنْ تَغْفِرَ لِي .

Allahumma inne as-aluka birahmatikal-latee wasi'at kulla shay'i, an taghfira lee.

Ya Allah! Ina rokon Ka saboda Rahamarka da ta yalwaci komai, Ka gafarta mini.

Karanta Sauran anan»

Gajeren Sakon Saurayi Me Ratsa Zuciya Ga Budurwa

Ina son ki abar ƙaunata. Na kasance a cikin matsi, na kasa bacci yayin da dare ya tsala, ba ni da komai sai tunanin ki, har wani lokacin gari kan waye ba tare da na rintsa ba.

Saƙon Saurayi Me Ratsa Zuciya Ga Budurwa

Hoto: Candy/Pinterest

Marubuci:- Abba Rabi'u

Na san wannan yana faruwa ne saboda irin tsantsar soyayyar da nake miki a zuciyata. 

Shin ko ke ma haka ne?

Tattausan lafazin ki abin kwatantawa ne.

Komai naki daban da na sauran 'yammata.

Da zan kwana ina misalta kyawun halittarki, ba zan iya kai wa ƙarshe ba, koda kuwa zan wanzu ina yi har ƙarshen rayuwata.

Hmm bari dai na tsaya a nan kada ki ce na cika zuba kamar kanyar da ba daɗi................

Karanta Sauran anan»

Tsammani Ga Mutane

A rayuwa kawai kada ka taɓa tsammanin cewa mutane za su iya yi maka abin da duk kake yin tsammanin samu daga gare su a kodayaushe.

Tsammani Ga Mutane

Hoto: Unsplash

Marubuci:- M. Kabiru Muhammad

Kai dai kawai ka yi ƙoƙari ka fahimci abin da kake son cimma a iya tsawon rayuwarka. Watarana sai labari!

Idan har ka san cewa kana tafiya a kan daidai, ba buƙatar lallai ne cewa sai kowa ya gamsu da tsarin dukkan irin abin da kake yi.

Abu mafi muhimmanci a rayuwa, ka koyi yanayin yadda za ka yi mu'amala da mutane a dukkan inda ka tsinci kanka a faɗin duniya.

Idan har kana buƙatar ka fahimci yanayin mutum yadda ya kamata, ka mu'amalance shi na tsawon lokaci, za ka iya fahimtar ko wane ne shi? Fiye da duk yadda kake yin zato.

Allah ya kyautata al'amuran rayuwar mu baki-ɗaya, ya sa mutuwa ta zamo hutu ga kowannen mu Amin Yaa Hayyu Yaa Qayyum.

Karanta Sauran anan»

Shin A Zahiri Akwai So Ko Duk Ƙarya Ce?

In dai akwai wani abu wai shi dangi na so, to ina son yake, kuma yaya yake? Ni dai ra'ayina tuni na fidda a fili domin kuwa ni a tawa fahimtar ba wani abu wai shi so, Malumfashi (1988).

Shin so da soyayya na ƙulluwa ne a lokacin da aka yi aure?

Hoto: About Islam

Marubuci:- Ibrahim Malumfashi

Sai dai kar ka ɗauka na ci kubeji a wannan ra'ayi nawa, domin kuwa masanin Falsafar nan Schopenhaber kamar yadda ya yi bayani a cikin Encyclopedia of Philosophy, yana mai ganin cewa ba wani abu wai shi so a tsakanin mutane, sai dai a tsakanin mutum da mahalicci. Wannan ne ya sa yake faɗar cewa, mawaƙa da marubuta Larabci na ɓata lokacin su ne kawai wajen rubutu, domin kuwa abin da suke ma laƙabi da so, ba so ba ne, sai zagi, cin mutunci, batunci/ɓatanci, kisa da sauran munanan al'amura, wanda kamar yadda ya bayyana, hakan na faruwa ne saboda mawaƙa da marubuta sun maido so a matsayin saduwa a tsakanin mace da namiji.

 

Na san za a so a san dalilin da ya sa na ɗau wannan tsattsauran matsayi, to kada mu nemi kai ruwa rana. In dai so shi ne ƙawa-zuci a tsakanin mutane da abubuwa, to me ya sa a kullum na dubi rayuwarmu ta yau da kullum sai yawan yaji mata ke yi, sai tashin hankali a tsakanin ma'aura? Shin me ya sa, yawancin waɗanda ake ce wa masoya, in ka kalle su; sai ka ɗauka aradu ce ta faɗa musu? 

 

In dai akwai so, ta yaya kullum muke ta fama da tsintattun 'ya'ya da uwayensu suka yi watsi da su, bayan haihuwa? Mace nawa muke jin a yau za ta yi da-na-sani dangane da auren mijinta (wanda a da take matuƙar so)? Shin mazaje nawa ne yau za ka ji na faɗar, ai gidan bai shigo, domin kurar nan, na ciki (ita fa ce masoyiyar)? Yau maza nawa ke a asibitin mahaukata, saboda irin kisan mummuken da matansu (masoyansu?) Suka yi musu a gida? Shin nawa ne daga cikin mutane muka ji sun ɓata, saboda so, so fa ne ke sa ai kisa! Na ga wadda mijinta ya watsa mata fetur, alhali kafin su yi aure, ta fi farin wata haske a wajensa. Na ga mai ƙafa ɗaya. Na ga mai fasasshen kai. Na ga mai ido ɗaya. Na ga mai fasassar mota. Na ga mai yagaggar riga. Na ga wadda ta daɓa wa mijinta wuƙar fawa. Na ga wadda ta ƙone mijin ƙurmus. Duk wai saboda me? So!

 

Shi kuwa wannan abu so, zan so in gan shi, don kuwa ko bom ya shafa masa lafiya wajen ɓarna. Wai ma mun manta cewa, karuwa mai neman maza da mace mai maɗigo, da namiji mai neman mata, da namiji mai yin luwaɗi, duk bisa ginin so suke waɗannan abubuwa? Shin mazinaci da mazinaciya, masu aure da marasa aure, shin me ke kai su ga haka, so! Kai lallai da sake game da fahimtar da ake da ita ta so da kuma soyayya. 

 

Kuma lallai in har biyan buƙata ba shi ne so ba, a'a shi dai ne ƙololuwar so, to ina son yake? In an ce taɗi da zance da hira da namiji ke yi da mace kafin su yi aure ko su sadu (ba ta hanyar aure ba), waɗannan matakai na kai wa ga so, to ina son yake? Ni a nawa ɗan guntun tunanin, sai na ga cewa, batun da ake yi na cewa akwai so har iri huɗu: 

 

1. Na so-an-so (Soyayya).

2. Na-so-an-ƙi (Soƙiyayya).

3. Na-ƙi-an-so (Ƙisoyayya).

4. Na-ƙi-an-ki (Ƙiyayya).

 

Waɗannan abubuwa ba su bayyana mana mene ne so ba, in har ka-so-an- so, wato soyayya ta ƙullu, mene ne son, shin dariyar da macen ta yi maka, ko kuwa amsar da ta yi maka hannu bibiyu, ko kuma amsawa da ta yi ni ma ina son ka, shi ne so da soyayya? Me ka so, me ta so, kuma yaya son yake? Shin so shi ne biyan buƙata, kashe zalaƙar zuci, ko kuwa kwanciyar hankali? In dai waɗannan su ne so, to me ke kawo bala'i da tashin hankali a ranar da mutum bai kai ga manufarsa ba? Sai dai in ba daɗi ba ne so, sai dai bala'i. Ni dai har yau biɗa nake ko akwai wanda ya ga so, ya kawo mini shi zan ba shi kyauta, domin kamo mana wannan mugun abu don mu yi gaba da shi daga rayuwarmu.

 

Na faɗi haka ne don ganin cewa ban ga wanda ya sami so ba hankalinsa kwance, ko nata kwance. Shin akwai wanda ya taɓa ganin waɗanda suke soyayya suka kwashe ƙalau? Shin tatsuniyarmu kullum tana wuce ta Laila da Majnun ko Romeo da Jullet? Kai ai nan da sake don ko waɗannan ba soyayya suka yi ba, sai wahalar da kai da hauka.

Manta da waɗancan ma, dawo nan kusa, shin ka taɓa ko kin taɓa tambayar ma'aurata biyu da suka shekara 20 tare, suka faɗa maku/muku cewa ai soyayya ƙalau, in ma da akwai ta? Ƙila wani ya ce ai ba so sai na uwa da ɗanta, ƙila kai a wurinka, ai mahaifiyarka abin so ce abin ƙauna ce, kuma ba wadda kake so irin ta, amma shin ka taɓa tambayar mahaifinka ka ji irin zafin da take ba shi? Don haka ba ni jin cewa lallai akwai so, tatsuniya ce kaɗai, ba batun gaskiya a ciki? 

 

Mu yi tunani bisa wannan batu fa da kyau. Me ke sa mace ta ce wai ta mace wa yaro. Me ke sa yaro ya sami yarinya ya dinga zabga mata ƙarya, ke ce rayuwata, ke ce abin tunanina, ke ce abin ƙaunata, ke ce tauraruwata, ke ce zan so da ƙauna, sai mutuwa ka raba. Ana ɗaura musu auren, tana tarewa, tana haihuwa, sai ka ji ya fara 'yar murya, ni fa amarya zan yo?  

 

Me ya sa mace za ta auri namiji su yi shekara 20 tare, suna ta soyayya, amma ranar da Azara'ilu ya zo ya ɗauke mijin, sai 'yan koke-koke da 'yan murje-murjen ƙarya, bayan 'yan watanni sai ka ji ta sake wani auren? Shin wannan shi ne so da soyayya? Me zai hana ta zauna ba aure har abada tun da shi marayin/ɓarayin rayuwar ya tafi?

 

Shin nawa daga cikinmu (maza) muke turke yarinya muna faɗa mata, ni in ba ke ba sai dai rijiya. In ba ke ba masai. Ni in ban same ki ba, rayuwata ta lalace. A buga, a raya, a kuma yi tattaki bai same ta ɗin ba. Wani can ya aure ta. Amma wannan bawan Allah bai faɗa masan ba, bai faɗa rijiyar ba, bai kashe kansa ba. Can sai ka ji ya faɗa neman wata can daban, idan aka yi sa'a kuma ya same ta, sai ka ji yana faɗar, rashin wance da na yi, ai ɓata lokaci ne kaɗai, idan mata ne ba ga su nan kamar jamfa a Jos ba. Ni kuma na ce ai ka san da su a jamfa a Jos ɗin, amma ka liƙe wa wancan ɗin da ba ka samu ba. Shin so shi ne ƙarya in har akwai shi? Shin wai mene ne so? Ina kuma yake? Yaya kamarsa  take? 

 

Mai sauraro shin me kyarkyarar zakara ke nunawa gare mu? Shin me barbarar taure ke neman fahimtar da mu? Kana jin cewa ba su kama da ƙaryar da namiji ke yi wa mace da zaran ta saki jikinta da shi, gobe sai ka ji ya sake  sheƙa? 

 

Shin so da soyayya na ƙulluwa ne a lokacin da aka yi aure? Shin soyayyar da ba ta kai ga aure ba me za a kira ta? Wahala ko soyayya? Shin mene ne bambanci tsakanin tsarkakakkiya da kuma ɓatacciya? Shin wai don an nemi yarinya an kuma sadu da ita, soyayyar ta ɓaci ke nan? Ana nufin cewa duk irin soyayyar wai da ke nan tsakanin mace da namiji wadda ba ta kai ga aure ba, ita ba soyayya ba ce? Idan haka ne ashe su dabbobi da ƙwari da tsirrai su ba su da so balle soyayya? Don kuwa ba a taɓa ban goro ba aka ce mana an ɗaura aure a tsakanin akuyar gidan Malam Mande da ɗan akuyar gidan Malam Mati.

Ashe mai karatu darbejiyar/dalbijiyar ƙofar gidan Malam Musa na da miji ni ban sani ba. In dai ba su da aure irin wanda muka sani, to mene ne soyayya in akwai ta? A bisa gaskiya zan so na sami bayani game da yadda soyayyar taure, in har akwai ta, take? Ƙila kuma tashi ma soyayyar ta aure ce. In kuwa ta aure ce, shin wace ce matar tasa, mahaifiyarsa? Ƙanwarsa? 'Yarsa ko kuma ɗiyar da ya haifa? Wai shin mene ne so in har akwai shi? Kala yake canzawa kamar hawainiya duk lokacin da ya ji ya gaji da waccen kalar, ko kuma kamar dala yake, tsuntsuwar nan mai ɗauke da launi-launi a jikinta a lokaci guda, in fa akwai shi, ina nan jira ina kuma saurare!

Karanta Sauran anan»

Yadda Za Ku Sauya Rayuwar Ku A Rabin Shekara Kacal (5)

9. Ka bar Jinkirtar da mafarkanka.

A duk lokacin da ka jinkirtar da wani mafarki naka, kana jinkirtar da damarka ne da nasararka, da rayuwarka gaba-ɗaya.

Tafiyar mil dubu tana farawa ne da taku ɗaya

Hoto: Liubomyr Vorona/iStock photo

Ita ɗabi'ar jinkiri kamar maƙabarta ce ga mafarkan mutum. Tana binne burikanka ne ta bar ka da nadama a gaba.

Duk abin da za ka aikata to ka aikata shi a yau kuma a yanzu, kada ka tsaya jiran gobe ko jibi.

Ina so na yi maka wata tambaya kamar haka:

Daga lokacin da ka fara karanta wannan rubutun tun fitowa ta ɗaya zuwa yanzu wasu matakai ka ɗauka?

Na san ƙila wannan rubutun ya ƙayatar da kai, ya ratsa ka sosai, ƙila ma ka adana shi don son karantawa a gaba.

To amma fa ina so in tunatar da kai cewa hakan bai da amfani idan ba za ka ɗau mataki ba. Don haka ka fara ɗaukar mataki domin aiwatar da duk wani abu da ka karanta a cikin wannan saƙon.

Shekara ɗaya daga yanzu za ka so ina ma ka fara aiki don cikar burinka a yau.

Wasu da dama ba rashin ilimi ko ƙwarewa ba ce matsalarsu, kawai ba za su iya ɗaukar mataki ba ne don samar da ci-gaba a rayuwarsu.

Illar jinkiri ita ce duk abin da kake jinkirtar da shi za ka ci-gaba da ganin wahalarsa ne shi kuma yana ƙara yi maka nesa yana ƙara ba ka tsoro.

Jinkiri yana sa abubuwa masu sauƙi su zama masu wahala, kuma abubuwa masu wahala su zama marasa yiwuwa. Ɓoyayyen maƙiyi ne ga nasara.

10. Ka gina kyawawan ɗabi'u.

Farawa ya fi komai wuya, amma hakan ba ya nufin da ka fara shikenan ka haye.

Wasu da yawa sun fara amma daga baya suka sare, sun ɗauko tafarkin cim ma nasara amma daga ƙarshe suka watsar suka koma gidan jiya.

Ya kamata ka gane cewa fafutukar canza rayuwarka wata gwagwarmaya ce da dole za ka yi ta kai kaɗai, babu wanda zai iya shigewa gaba ya tare maka wannan faɗan.

A don haka ne kake buƙatar wasu ɗabi'u da za su zamanto abokan tafiyarka kuma domin su isa ga manufarka.

Waɗannan ɗabi'u su ne kamar haka:

A. Maida Hankali (Focus).

Kada ka ce za ka zamo komai da ruwanka, ita rayuwa ba haka tsarinta yake ba.

Kowane gwani yana da fagen gwanintarsa, kuma ba za ka iya samun wanda yake gwani a komai ba.

Don haka kada ka raba hankalinka tsakanin abubuwa guda biyu, ka dage akan abu guda ɗaya tukuna har ka samu ƙwarewa a cikinsa.

Ka yi watsi da duk wata shagala ka maida hankali akan manufarka.

B. Haƙuri da dagiya (Patience and Endurance).

Ka fito ka yi gwagwarmaya kuma a fafata da kai. Duk wani abin da kake so a rayuwa dole sai ka yi aiki za ka same shi.

Babu wanda zai ɗauko ya ba ka. Don haka kana buƙatar ka sadaukar domin cimma burinka.

Ba lallai ka samu lokacin fira da nishaɗi kamar sauran jama'a ba.

Za ka yi jinkirin barci amma za ka riga kowa tashi. Wannan ba sabon abu ba ne, ka saba da hakan.

C. Sarrafa kai (Self-discipline).

Dole ka ladabtar da kanka, kuma ka tarbiyantar da zuciyarka akan yin abin da ya dace a kowanne irin yanayi.

Ko kana so ko ba ka so, ka koyi aikata abin da ya dace a lokacin da ya kamata.

Watarana za ka ji ka babu kuzari, babu karsashi, ko ƙyuya da kasala su kama ka.

Idan ba ka da kanka akan jajircewa ba, zuciyarka sai ta rinjaye ka a irin wannan yanayin.

D. Maimaici (Consistency).

Hausawa suna cewa, zara ba ta barin dami kamar yadda sannu-sannu ba ya hana zuwa.

Da kaɗan da kaɗan ruwa ke cika tulu, kamar yadda da kaɗan da kaɗan ake samun nasara.

Don haka, sakamakon da kake fata zai samu ne kawai bayan tsawon lokaci.

Kana buƙatar gina ɗabi'a ta maimaici, ka zamo mai yin abu yau-da-kullum kafin nasara ta samu gare ka. Ginin yini/wuni ɗaya ba ya yin ɗaki.

Amma kuma duk garin da ruwa ke zuba, sai ya zama daji. Don haka daga nan har watanni 6 masu zuwa, ka yi wa kanka alƙawarin a kullum za ka aikata koda abu ɗaya da zai kusantar da kai ga burinka.

11. Ka kewaye kanka da masu ƙarfafa ka.

Zuwa yanzu ya kamata ka fahimci cewa muhallin da kake rayuwa a cikinsa da irin mutanen da kake ta’ammuli da su suna da gagarumin tasiri akan tunaninka da kuzarinka da aikin da za ka yi.

Don hakan idan kana so ka cimma manufarka, dole na farko, ka nisanta kanka da mutanen da suke kashe maka gwiwa akan mafarkanka da abokai waɗanda za su iya maida kai rijiya.

Sannan sai ka ƙulla alaƙa da mutane masu manufa irin naka don ku ƙarfafi junanku har ku yi nasara a tare.

Ka yi ƙoƙarin samun jagora (mentor) wanda zai riƙe hannuwanka ya nuna maka hanya sannan ya ba ka gudunmawa wurin cimma burinka.

Ka kasance a shirye don biyan kuɗi domin ka yi koyi daga ilimi da gogewar irin waɗannan mutanen da sun riga sun yi nasara kuma sun taki irin matakin da kake so ka taka a rayuwa. 

Wannan shi ne mataki na 11 kuma na ƙarshe cikin ƙa’idojin da zan kawo. Daga nan ka gama rusa duk wasu munanan halaye, da ɗabi’u da alaƙoƙi da ba sa taimakon ka akan burinka kuma ka iya gina sabbin halaye, ɗabi’u da alaƙoƙi masu matuƙar amfani da tasiri ga manufofinka da rayuwarka.

Wannan shi ne tsari na Rusau da Ginau da na ambata a baya.

Shawara ta ƙarshe

A nan zan so in rufe da maganar shahararren marubucin nan na ƙasar Masar wanda ya lashe kyautar Nobel, wato Najib Mahfuz.

Yana cewa: “Na koya daga rayuwa cewa burin mutum ba ya zuwa gare shi a kan farantin zinariya, amma yana samuwa ne tare da dogon yunƙuri da kuma kyakkyawan haƙuri.”

Wannan maganar tasa tana da zurfin ma'ana sosai. Abubuwa biyu take yi mana nuni akai, su ne muhimmancin yunƙuri da kuma haƙuri.

Wato duk abin da kake so a rayuwa, sai ka tashi tsaye ka yi fafutuka za ka same shi.

Idan ka zauna zaman jira babu wanda zai ɗauko wannan abin ya ba ka.

Sannan nasarar da kake nema ba za ta zo gare ka a dare ɗaya ba, dole sai ka ɗauki tsawon lokaci kana mai yunƙurawa tare da yin haƙuri.

A yayin da mafi akasarin jama'a suka kamu da son yin abubuwa a cikin gaggawa, ka tuna cewa haƙiƙanin ci-gaba yana faruwa ne bayan tsawon lokaci.

Ka yarda da nasara mai ɗorewa bisa neman sakamakon yanzu-yanzu ko aiki da gaggawa.

Kana buƙatar tazarar lokaci kafin ka iya aikata duk wani abu da na ambata a cikin wannan saƙon

Kana buƙatar tsawon lokaci da haƙuri kafin;

- Ka samu ilimi ko ƙwarewa akan wani abu.

- Ka iya haɓaka sana'arka ko kamfaninka.

- Ka tara dukiya ko ka bunƙasa kasuwancinka.

- Ka iya gina jikinka, da zuciyarka da tunaninka, da kuma aljihunka.

Duk wani abu mai ƙima a rayuwa ba ya samuwa sai da haƙuri, don haka ka tarbiyantar da zuciyarka akan haƙuri.

Duk mutumin da ya yi haƙuri to da sannu zai samu sakamakonsa koda ya yi jinkirin zuwa gare sa.

Duk wani abu mai kima a rayuwa ba ya samuwa sai da haƙuri, don haka ka tarbiyantar da zuciyarka akan haƙuri.

Duk mutumin da ya yi haƙuri to da sannu zai samu sakamakonsa koda ya yi jinkirin zuwa gare sa.

Ka tuna cewa tafiyar mil dubu tana farawa ne da taku ɗaya. Don haka ka ɗauki mataki na farko a yau, kuma nan da watanni 6 za ka gode wa kanka.

ƘARSHE 

Ga waɗanda ba su samu damar karantawa ba tun daga farko ba, to su kwantar da hankalin su, su latsa nan don komawa ga shafin farko na Yadda Za Ku Sauya Rayuwar Ku A Rabin Shekara Kacal  ko kuma nan....

DUBA NA FARKON ANAN: Yadda Za Ku Sauya Rayuwar Ku A Rabin Shekara Kacal  (1)

Da wannan ne, muka kawo ƙarshen wannan muhimmin saƙon mai taken, "Yadda Za Ku Sauya Rayuwar Ku A Rabin Shekara Kacal.".

Ku kasance tare da mu a kullum don samun saƙonni da za su inganta rayuwarku a cikin harshen Hausa.

A ci-gaba da yaɗawa tare da ba mu gudummawa a wannan shafin. Muna matuƙar godiya.

Ku ci-gaba da bibiyar shafin nan namu domin ci-gaba da samun saƙonnin da za su taimaki rayuwar ku tare da  taimaka muku ga cimma burin ku da muradin ku cikin sauƙi duk a kyauta. Za ku iya sanar da sauran mutane sunan wannan shafin domin su ma su shigo su amfana kamar yadda ku ma kuke amfana.

Tushe/Asali:  Hausa Motivation

Karanta Sauran anan»

Miji Na Gari A Al'adar Hausawa

A al'adance, tun asali Bahaushe yana da sigogi da yawa na auna hankali da tunani ko mu'amular wanda ko wadda zai aura.

Miji Nagari A Al'adar Hausawa

Hoto: Getty images

Marubuci:- Hamza Dawaki

Daga ciki akwai duba yadda yake mu'amulantar mahaifiyarsa wato idan aka tarar mutum yana da kyakkyawar mu'amula da mahaifiyarsa. Ya kan zauna su yi hira ya ma taya ta wasu ayyuka da sauran abubuwa da ke kyautata dangantaka, sai a ce, lallai wannan zai kyautatawa matarsa yayin ƙuruciyarta. 

Kuma idan ta tsufa zai tausaya mata amma wanda aka ga ba ya kyautata mu'amula da mahaifiyarsa, ba ya yin wani abu na nuna mata tausayawa. To wannan sai a ce, ba zai tausaya wa matarsa yayin da ta tsufa ba. 

Kawai dai zai iya son ta da ɗoki da zumuɗin ta ne a lokutan da take kan ganiyar ƙuruciyarta.

Domin shi So da sha'awar mace dole ne, kamar yadda son mazan ya zame wa matan, saboda ɗabi'a ce da Ubangiji subhanahu wa ta'ala Ya gina kowa a kai. Don haka, kowa ma zai iya son mace amma girmama ta da ganin kima da tausaya mata kuma ɗabi'a ce da ba kowa ne ke da ita ba.

Karanta Sauran anan»

Sakonnin Bayyana Yanayi A Soyayya Ga Budurwa

Amincin Allah ya tabbata a gare ki sarauniyar mata, dole na yi miki jinjina domin kin tafi mini da zuciyata. Ke ce muradina.

Bayyana yanayi a soyayya ga budurwa

Hoto: Merg2358

Marubuci:- Prince E

Zan so ki sani kuma ki sanar da zuciyarki lungu da saƙo a kan cewa kin tabbata haske mai haskaka zuciyata.

Amincin Allah ya tabbata a gare ki kyakkyawar ɗiya/'ya mai alkunya. 

Ke ce irin halittar farin cikin da ke faranta zuciyata tare da gangar jikina gaba-ɗaya.

A dalilin son ki nake ta faman shan wahala amman ke tamkar ba ki sani ba.

A kullum jin tattausan muryarki kan sanya zuciyata cikin farin ciki mara misaltuwa.

Ƙaunarki ta shiga ruhina, ta mamaye dukkanin ilahirin sassan jikina, ba ni da abin tunƙaho, abin alfahari a rayuwata wanda ya wuce a wayi gari ni da ke mun zama mallakin juna.

Karanta Sauran anan»

Muhimmancin Bambance Sana'a

Sana’o’i kaɗan ne suke tunƙaho da rashin kishiya a ɓangaren da suke. Mafi yawancin sana’o’i yanzu sun zagaye duniya, kuma kullum jama’a ƙara shiga suke, saboda haka gasa na ƙaruwa. Domin samun nasara, dole mai sana’a ya kawo wani abu daban wanda babu irin shi, kamar yadda wani gawartaccen ɗan kasuwar ƙasar Girka mai suna Aristotle Onassis ya ce “ya kamata ka san abin da babu wanda ya sani a kasuwa” domin yin fice da tserewa kishiyoyi.".

Sirrin nasara a kasuwanci shi ne ka san abin da babu wanda ya sani, ka yi fice a kasuwa

Hoto: Max4e/Freepik

Marubuci: Bello Galadanchi

KAWO SABON ABU CIKIN KASUWA IRIN WANDA BABU KAMAR SHI

A duk lokacin da mai sana’a yake fuskantar gasa, to dabarar da aka fi yi shi ne a yi ƙoƙarin bambance sana’ar daga ta abokan gasa. Wannan ya ƙunshi gabatarwa kwastomomi abin da ragowar abokan gasa ba su gabatar ba, ko kuma ba za su iya gabatar wa ba. A shekara ta 1940 ne wani fitaccen ɗan talla mai suna Rosser Reeves a Amurka ya ƙirƙiro wannan tsari domin nuna dalilin da yasa ake iya sayar da wasu hajoji da tsada idan aka kwatanta da kishiyoyinsu. Sabon abu irin wanda babu shi kuma wanda ya bambanta da ragowa na da wahalar ƙirƙirowa, kuma yana da wahalar kwafa – wannan shi ne dalilin da ke sa sana’ar ta yi fice. 

Dole sai mai sana’a ya bambance hajar sa daga ta kishiyoyi, kama daga kayan da ake haɗa hajar da su ko wajen da ake samo hajar, zuwa dabarun haɗa hajar da ma kula da jin daɗin kwastoma bayan ya sayi wannan haja. Kamfanoni kamar Nespresso da ke yin garin shayin kofi da Crocs masu yin takalman roba da ma sana’ar gidan cin abincin nahiyar Asiya mai suna Tune hotels sun bambanta kansu sosai daga kishiyoyin su kuma hakan ya ba su tagomashi mai ƙarfi a kasuwa. 

Babban alfanun bambance sana’a shi ne samun kwastomomin da ba za su je ko'ina ba, da kuma ikon sauya farashi a duk lokacin da ake so.

Bambance sana’a na kare sana’a daga kishiyoyi masu ƙaramin farashi; saboda bambancin na saka kwastoma ya amince da farashi na daban kuma hakan yana tabbatar da an samu riba a kowane lokaci, sannan hakan na bai wa sana’a tagomashin yin fice a kasuwa.

Karanta Sauran anan»

Karanta Tarihin Addinin Buddhism A Takaice Tare Da Hotuna

Siddhartha Gautama, wanda ya kafa addinin Buddhism ya rayu a cikin ƙarni na 5 BC.

Addinin Buddhism

Hoto: Worldatlas

Marubuci:- Abdallah Aliyu Saint

An haifi Gautama a cikin dangi masu arziki a matsayin basarake a ƙasar (Nepal ) ta yau amma daga baya ya yi watsi da dukiya da sarautar da yake ciki yayin da ya keɓe kansa tare da shiga duniya dan neman gaskiya.

Addinin Buddhism ya kasu gida huɗu amma duk tsarinsu da imaninsu ɗaya ne sai ɗan bambanci kaɗan.

Ɓangarorin da ya rabu su ne:

Buddha Theravada:  a ƙasar Thailand, Sri Lanka, Cambodia, Laos da Burma.

Mahayana Buddhism: a China, Japan, Taiwan, Korea, Singapore da Vietnam.

Addinin Buddah na Tibet: Ya yaɗu a Tibet, Nepal, Mongoliya, Bhutan, da wasu sassan Rasha da arewacin Indiya.

BUDDAH-bangaskiya ne (imani)  (faith) da Siddhartha Gautama ("Buda") ya kafa fiye da shekaru 2,500 da suka wuce a Indiya.

Mabiya

Ƙididdigar 2019 ta tabbatar  addinin yana da  mabiya kusan miliyan 470, masana sun rubuta addinin Buddah ɗaya daga cikin manyan addinan duniya.  Ayyukansa a tarihi sun kasance mafi shahara a Gabas da Kudu maso Gabashin Asiya, amma  yana ƙara girma a yammancin  asiya. 

Mabiya addinin Buddhism

Hoto: The thaiger

Mabiyan addinin Buddha ba su yarda da wani Allah ko abin bautawa ba, a maimakon haka sun maida hankali ga samun wayewa, kwanciyar hankali da hikima. 

Wanda ya kafa addinin, Buddha, ana ɗaukarsa wani halitta mai daraja da ƙima, amma ba Allah ba ko abun bauta.

Wasu masana suna bayyana Buddhism da cewa ba addini ba ne face wani tsari ne na tsara ingantacciyar rayuwa da kwanciyar hankali ga duniya baki ɗaya.

Jagororin addinin Buddhism

Hoto: NPR

Manyan malamai (sufaye) na addinin Buddhism wanda ake kira da (Buddhist monks, or bhikkhus,) ƙarfafa al'adar nan ta rashin yin aure a kansu da kuma gudun duniya daga abubuwan ƙyale-ƙyale da sha'awa-shawan kayayyakin duniya.

Mabiya addinin Buddhism sun yi imani da zagayen haihuwa wato (Karma ko reincarnation) wato sake haifar mutum bayan ya rasu ta yadda zai dawo duniya a wani attajiri ko waliyyi ko wani babban shugaba ko attajiri idan ya yi aiki nagari zai iya dawowa kuma a matsiyaci ko wani masaki ko a dabba ma idan ya yi mummunan aiki ya dawo ya yi ta shan wahala a duniya gwargwadon zunubin da ya aikata.

Akwai  adadi da yawa na hotuna da  su ke nuna alamar  wakiltar imanin Buddha, gami da furen (lotus,) (dharma ) mai magana takwas, bishiyar (Bodhi) da (swastika ) alamomi ne  wanda sunan su ke nufin "lafiya" ko  "Sa'a" a (Sanskrit).

Mene ne abinda addinin Buddhism ke umarnin aikatawa?

Zuzzurfan tunani, tsarkake ruhi da zahiri, da kyawawan halaye su ne hanyoyin samun wayewa, wato (nirvana).

Yayin karantawa yara wani ɓangare na littafin addinin Buddhism

Hoto: Mandalas

Mene ne abin da addinin Buddhism ya haramtawa mabiyansa shi?

Ƙaurace wa kashe abu mai rai, sata, lalata (zinace-zinace), ƙarya da shan kayan maye.

Mai son ƙarin bayani ya nemi littafin Dhammapada na Eaknath Easwaran.

Karanta Sauran anan»

Karanta Addu'ar Ganin Jinjirin Wata

اللهُ أَكْبَرْ، اَللَّهُمَّ أَهِلَّهُ عَلَيْنَا بِاْلأَمْنِ وَاْلإِيمَانِ، وَالسَّلاَمَةِ وَاْلإِسْلاَمِ، وَالتَّوْفِيقِ لِمَا تُحِبُّ وَتَرْضَى، رَبُّنَا وَرَبُّكَ اللهَ.

Allahu akbar, allahumma ahillahu 'alayna bil-amni wal-eeman, wassalamati wal-islam, wattawfeeiqi lima tuhibbu watarda, rabbuna warabbukal-lah.

Addu'ar Ganin Jinjirin Wata

Hoto: Prema Dharma

Allah ne Mafi girma. Ya Allah! Ka sanya tsayuwarsa a gare mu ta zamo kwanciyar hankali ce da imani, da Aminci da Musulunci, da kuma gamonkatar da abin da Ka ke so, ya Ubangijinmu, kuma ka ke yarda da shi. Ubangijinmu da Ubangijinka (ya kai wannan jinjirin wata!) shi ne Allah.

Karanta Sauran anan»

Alamomi 12 Na Tabbatarwa Mace Ta Kamu Da Tsantsar Soyayyar Ku

Idan mace ba ta yi maka waɗannan halaye  da zan lissafa to ka cire kanka daga cikin wanda take so, kuma ka nisance ta babu soyayyarka sam a ran ta.

Alamun Mace Ta Kamu Da Tsantsar Soyayyar Ku

Hoto: Fizkes/Shutterstock

Marubuci:- Abdallah Aliyu Saint

1. Ta ƙi ɓoye maka labarai na halayenta, da ɗabi'unta munana da kyawawa da makamancin abubuwa masu muni da masu kyau da suka faru da ita a rayuwa.

2. Sannan Duk abin da za ta yi takan tuntuɓi shawararka ko ya shafe ka ne ko bai shafeka ba, koda a kan ƙawayenta ko akan iyayenta ne.

3. Ta dinga ƙarfafa maka gwiwa akan sana'ar da kake yi ko kasuwanci, da kuma ƙoƙarin sanin komai da ya dangance ka da duk wani motsinka.

4. Ta dinga tsara yadda rayuwarta za ta kasance anan gaba da kai, kowanne tsarin rayuwarta idan ta faɗa za ka ji tana sako ka a ciki.

5. Ta dinga tsawatar maka akan abu kaɗan kamar jinjirin yaro misali, ta ce "Dan Allah ka daina zuwa filin ball ɗin nan wallahi ba na son aji maka ciwo ne". Da irin dai maganganu na nuna cewa ba ta son wani abu ya same ka ko ta ce idan za ka zo yau kada ka biyo ta bayan layi wallahi wani gida sun kawo kare yana nan yana ta haushi.

6. Ta dinga kambama ka a loƙacin da kai kanka ka tabbatar ba ka cancanci a yaba maka ba.

7. Ta dinga zancen wasu samari a gabanka wai dan ta tabbatar kana kishinta ne ko a'a.

8. Abu kaɗan idan ka yi ko ba na dariya ba ne sai ka ga yana ba ta dariya.

9. Ta dinga riƙe zantukan da kuka yi da ita koda an daɗe.

10. Ta dinga ƙoƙarin zama wata mara wayo a gabanka idan kuna magana.

11. Ta dinga kwaikwayon wasu kalamanka wanda kake gaya mata da kuma yadda kake motsi idan kana magana.

12. Ta dinga neman shawararka akan abu ƙalilan wanda ba ma ya buƙatar sai ta nemi shawararka kamar tace "Baby yau zan je unguwa ya kake gani na saka wannan atamfar wadda ka zo zance ranar juma'a ka same ni da ita?".

Idan dole sai ka dinga ba ta kuɗi kafin ka samu kulawarta sosai, malam ba budurwarka ba ce haya kawai kake ɗaukarta. Ka cire ƙaya ka huta.

Idan ba ka samun waɗannan halaye daga budurwarka , kawai ka yi ritaya da soyayyar.

Karanta Sauran anan»

Su Ma Mutane Ne Kamar Ka

Ka tuna wa kanka cewa su ma ɗin irinka ne (Mutane). Idan ka yarda da kanka 100%, za ka iya ƙirƙirar abun da su ɗin ba su samar ba a duniya.

Mutane ne kamar ka

Hoto: Tamil Comedy Memes

Marubuci:- M. Kabiru Muhammad

Mai yiwuwa ma na kan ya fi na sun komai.

Karanta Sauran anan»

Tsantsar Sirrin Soyayya Da Ustaziyar Budurwa

Soyayya da Ustaziyar Asali sai an yi taka tsantsan na sosai, saboda abu kaɗan zai iya rikita tunaninta, ba komai ba ne face ta samu wani hali mummuna a tare da kai.

Sirrin Soyayya Da Ustaziyar Budurwa

Hoto: Amaani A/Pinterest

Marubuciya: Fatima Zahra

Kar ka ce za ka dinga mata hirar abubuwan ƙyalƙyalin duniya, ko zancen kana da abin duniya, tunda dai ka san ita ba bin ka za ta yi ku je shaƙatawa ba, indai ba aurenta ka yi ba.

Wato soyayya da Ustaziyar Asali akwai wahala, saboda ita soyayya da ita ba kamar soyayya da 'yammata gama gari ba ne.

'Yammata gama gari za ka iya zuwa ka tsara su, har ka samu su shiga, su dinga washe maka baki, to ita kuma lamarin Ustaziyar Asali ba haka lamarin yake ba.

Kana fara magana kamar kana magana da Lauya ne, idan ba ka iya allonka ba a bugu ɗaya za ta ɓaro ka.

Ustaziyar Asali ba abin da ke kama zuciyarta sai gaskiyarka, tsoron Allahn ka, kyawun halinka, da kuma son ka da addini, sai kuma iya soyayya da kuma ƙwarewa wurin bayar da kulawa a aikace, da sauran ɗabi'u masu kyau, ba na tunanin bayan wannan Ustaziyar Asali za ta so ka don shi.

Na lura Ustaziya tana yin soyayya me tsafta idan ta samu wuri, kuma tana yin so me ƙarfi sosai, sai dai ba ta son namijin da ba irinta ba, duk namijin da ba irinta ba, da wuya ta so shi sai in ƙaddara, sai dai ta masa kara.

Idan tafiya ta yi tafiya, sai ta ji ba za ta iya kasancewa da kai ba, kuma tunda ba ta aure ka ba, gabaɗaya tanadinta ta fi son namijin da zai nuna mata hanyar Allah ko yaushe, wanda zai kula da ita, ya kula da 'ya'yanta, bayan hakan ba ta neman komai.

Allah yasa mu gama da duniya lafiya Amin.

Karanta Sauran anan»

Kyakyatawa Dole: Saurayi Da Amaryar Mafarki

Bayan na gama shiryawa zan fita ofis, sai amaryata ta fito da shagwaɓa ta riƙe hannun jakar da ke rataye a kafaɗata. Ta ce "Darling yau a gida za ka zauna ka yi min kitso ko?"

Saurayi Da Amaryar Mafarki

Hoto: Thais Varela/Unsplash

Sai na juyo na dube ta tare da dafa kafaɗarta.

Na ce mata "Amaryata ki yi haƙuri sai na dawo,".

Cikin tattausar murya ta ce "To My Dear.".

Na tafi har na je bakin ƙofa sai na ji ta ce : "Honey". Juyowar da zan yi sai ta yi min wani kallo mai karya zuciya.

Ban san lokacin da na saki jakar da ke hannuna ba, nan take na yo kwana, na zauna abakin doguwar kujera na ce "Zo na yi miki kitson".

Na ture ɗan kwalin da ke kanta na kama lallausan gashinta ina ja tare da shafawa.

Ban ankara ba, sai da na ji saukar mari, Raasss! Taasss! na miƙe a firgice.

"Wanne irin iskanci ne wannan za ka dinga ja min gemu ina barci?"

Ashe wai mafarki nake yi.

Gemun yayana (Ustas) da muke maleji a katifa ɗaya na kama ina ta faman ja. 

Ya yi ta faɗa a fusace.

Kwana na yi cikin takaici ni ban gama mafarkin ba kuma na sha mari.

Gwaurantaka ba ta yi ba, ku je ku yi aure.

Tushe/Asali: Babu hanyar tabbatar da ainihin mamallakin rubutun, saboda rubutun yana yawo ne ba tare da asalin sunan mamallakin shi ba, amma mun yi gyare-gyare a rubutun domin ya nishaɗantar da ku tare da gamsar da ku.

Karanta Sauran anan»

Yadda Za Ku Sauya Rayuwar Ku A Rabin Shekara Kacal (4)

Canji abu ne mai sauƙin faɗa, sai dai samar da shi yana da matuƙar wahala, amma kuma sakamakonsa akwai daɗi ƙwarai da gaske. Domin fahimtar inda aka dosa dole sai mutum ya koma baya daga fitowa ta farko (1). Latsa nan don komawa ga fitowar farko.

Ka fita daga sabgar mata

Hoto: Damir Khabirov/iStock photo 

5. Ka tarbiyantar da kanka akan tashi barci da wuri.

Wannan ɗabi'a ce mai ƙololuwar tasiri sannan mafi yawancin manya-manyan mutane suna siffantuwa da ita.

Ka daidaita yininka/wuninka ta yadda za ka kammala duk wani aiki naka ka kwanta kafin 10:00 PM na dare, sannan ka tashi ƙarfe 4:00 AM na safe.

Hakan zai ba ka ƙarin awanni guda 2 zuwa 4 kafin yinin /wunin wasu ya fara. Wannan lokacin zai ba ka damar shiryawa yininka/wuninka da kyau, yin karatu, motsa jiki, ko ibada da addu'o'i.

Duk rintsi kada ka bari ƙarfe 5:00 AM ta asuba ta wuce kana kwance. Rayuwa guda ɗaya kake da ita, ta yaya za ka yi barcin sama da ɗaya bisa ukunta (1/3)?

6. Ka yi watsi da shagala.

Na yi bayani game da shagala a gaɓa ta uku. Maganar gaskiya ita shagala tana da nau'o'i daban-daban masu wuyar lissafawa.

Amma ina so ka gane cewa duk lokacin da ka fuskanci manufarka kake ƙoƙarin hawa tafarkin nasara, akwai wasu ƙugiyoyi da za su riƙe ka su ƙanƙame ka.

Duk wani abu da zai tauye ko ya salwantar maka da ɗaya daga cikin waɗannan abubuwan da zan lissafa, to ba za ka isa ga manufarka ba sai ka yi watsi da shi:

- Lokaci (Time).

- Tunani (Attention).

- Kuɗi (Money).

- Sha'awa (Lust).

- Lafiyar Jiki (Health).

To ka matso kusa ka ji ɗan uwa.

Idan har ka damu da daidaita al'amuran rayuwarka, to dole ne;

- Ka fita daga sabgar mata, soyayya ba taka ba ce.

- Rayuwar ƙarya da ƙoƙarin burge mutane ba naka ba ne.

- Kalle-kallen TV da yawan hawa shafukan sada zumunta ba naka ba ne.

- Al'amurra masu tashe ko yayi (trends) su bar ɗaukar hankalinka.

- Bibiyar labaran yau da kullum da al'amuran siyasa bai da amfani gare ka.

- Shaye-shaye zai sa ka yi baƙin jini a cikin mutane, ka mutu a wulaƙance sannan ka haɗu da fushin Ubangiji.

Waɗannan abubuwan dukkaninsu guba ne da suke cutar da kai. Ka gaya min mene ne amfanin karantawa ko kallon labarai a rayuwarka?

A yau dai kam mai karatu na ƙalubalance ka, ka cire dukan waɗancan abubuwan da na lissafa daga rayuwarka.

A cikin wata 6 masu zuwa, kawai ka maida hankali akan gina kanka ta kowacce fuska.

Ka gina jikinka ta hanyar kula da lafiyar jikinka.

Ka gina ilimi da basira ta hanyar koyo, bincike, da karatu.

Ka gina alaƙa mai kyau da mutane masu himma da za ka amfana da su.

Ka gina aljihunka da asusun bankinka domin ganin ka fi ƙarfin buƙatun yau-da-kullum.

Ka samu gogewa da ƙwarewa ta hanyar maida hankali akan abu guda 1 tsawon watanni 6.

Idan ka ɗauki waɗannan abubuwa da muhimmanci, tabbas rayuwarka za ta canza na har abada.

7. Ka gina jiki mai ƙarfi.

Dole ne kana buƙatar ka zama mai cikakkiyar lafiya da ƙarfi na gangar jiki domin ka iya aiki da gaske don cikar burinka.

Nawā, kasala, gajiya, ragwanci, da son jiki, duk waɗannan ba abin da ke janyo su face raunin jiki.

Idan kana so ka ci nasara a gwagwarmayar rayuwa, dole sai ka zama jarumi. Shi kuma jarumi ba'a samun sa da rauni a ko'ina.

Zuciyarsa tana da ƙwari kamar yadda gangar jikinsa take da ƙarfi.

Don haka bayan ka gina jarumtaka ta zuciya ta hanyar yarda da kanka, neman ilimi, rashin tsoro da sauran hanyoyi da muka ambata, dole kuma ka gina gangar jiki mai ƙarfi don zama cikakken jarumi.

A kullum, ka ware aƙalla minti 30 zuwa awa ɗaya domin motsa jiki da aikata ayyukan da za su ƙarfafa gangar jikinka.

8. Ka doge/dage da koyo da neman ilimi.

Abokina ka nemi ilimi, ba za ka taɓa zama sama da abin da ka sani ba a rayuwa.

A kullum ka ware a mafi ƙaranci, minti 30 zuwa awa 1 domin karanta aƙalla shafi 10 zuwa 20, da za su gina maka ƙwaƙwalwa sannan su haɓaka tunaninka da basirarka.

Karatu ne kaɗai zai ba ka damar koyon tajriba/ƙwarewa da gogewar da mutane suka samu a tsawon rayuwarsu cikin yini/wuni ɗaya ko 'yan kwanaki.

Daga ranar da ka daina neman ƙarin ilimi, rayuwarka za ta fara daskarewa ta daina ci-gaba.

Ina so ka amsa wa kanka waɗannan tambayoyin;

1. Littafai nawa ka karanta daga farkon shekarar nan zuwa yanzu?

2. Sau nawa kake zuwa majalisi a mako ko kake sauraren karatuttukan malamai?

3. Yaushe ne ƙarshen lokacin da ka halarci wani taro na ganawa da musayar ra'ayi tsakanin masana?

4. Kwasa-kwasai nawa ka koya daga yanar gizo domin gina kanka a wannan shekarar?

5. Akwai bambanci a iliminka da ƙwarewarka da gogewarka tsakanin shekaru 3 baya zuwa yanzu?

Daga sanda ka zama mai ƙoƙarin karance-karance, rayuwarka za ta fara bambanta da ta sauran jama'a.

Babban ƙalubalen da ke hana mu samun ci-gaba a rayuwa ba komai ba ne face jahilci.

Akwai ƙwarewa da dabarun kasuwanci na zamani da hanyoyin neman kuɗi da yawa da za su inganta rayuwarka, amma ta yaya za ka san su idan ba ka neman ilimi?

Ina so ka nutsu ka zaɓi wata ƙwarewa (skill) ko fage guda 1, ka tattara hankalinka akan sa tsawon watanni 6.

Idan kai ɗan kasuwa ne, ka dage da koyon ilimin kasuwancin zamani, ka san kasuwancin da kake yi a ilimance, sannan ka nemi ilimin haɓaka kasuwanci (business development).

Ko ka yarda ko ba ka yarda ba, ilimi shi ne zai iya magance maka duk wani talauci da ke damun ka.

Talauci sakamako ne na ƙaramin tunani da jahiltar hanyoyin neman kuɗi, shi yasa wasu masana suke cewa, "Iya yawan saninka, iya yawan samunka.".

DUBA NA GABA: Yadda Za Ku Sauya Rayuwar Ku A Rabin Shekara Kacal  (5)

Ilimi shi ne zai wayar maka da kai ya buɗe idanunka ga abin da ba ka sani ba, sanann ya nuna maka hanyoyin aikata abin da mara wannan ilimin bai isa ya yi ba.

Ku biyo mu  a fitowa ta gaba domin karanta  mataki na 9 zuwa na 11. Kuma na ƙarshe a cikin jerin matakan sauya rayuwa a wata 6 kacal.

Ku ci-gaba da bibiyar shafin nan namu domin ci-gaba da samun saƙonnin da za su taimaki rayuwar ku tare da  taimaka muku ga cimma burin ku da muradin ku cikin sauƙi duk a kyauta. Za ku iya sanar da sauran mutane sunan wannan shafin domin su ma su shigo su amfana kamar yadda ku ma kuke amfana.

Tushe/Asali: Hausa Motivation

Karanta Sauran anan»

Kalli Hoton Umar M. Shareef Da Aisha Najamu

An ɗauki waɗannan kyawawan hotunan ne a yayin ɗaukar bidiyon waƙar Soyayya Karɓaɓɓa ta mawaƙi Umar M. Shareef.

Umar M Sharif

Hoto: Kinga team

Hotunan sun ɗauki hankula sosai a shafukan Sada Zumunta duba da yanayin yadda aka ɗauki hotunan, wanda hakan ya taka muhimmiyar rawa sosai wajen ƙayatar da al'umma daga sassa daban-daban na faɗin duniya.

Aisha Najamu

Hoto: Kinga team

Ƙalli ƙarin wasu hotunan a ƙasa:

Aisha Izzar So da Umar M. Shareef

Hoto: Kinga team

Umar M. Sharif da Aisha Najamu

Hoto: Kinga team

Fatan hotunan sun ƙayatar da ku. Ku ci-gaba da kasancewa tare da mu domin samun ire-iren su.

Karanta Sauran anan»

Zafafan Kalaman Karfafa Gwiwa Na Musamman

Dole ne ka tashi ka jajirce domin cikar burinka. Mutane  da dama suna mutuwa cikin mummunan talauci ba wai don ba su da ƙarfi ko wayewa ba, sai don sun rasa jajircewa a kan abun da suka saka a gaba, kowanne mai kuɗi ko mai mulki idan ya ba ka labarin wahalar da ya sha sai ka ji kamar ka yi kuka amma a yau ya zama abun kwatance ga sauran al'ummar duniya. 

Kalaman Ƙarfafa Gwiwa  Na Musamman

Hoto: Ramsey voice

Marubuci:- Abdallah Aliyu Saint

Shin labarin Albert Einstein bai zo maka ba?

  

Mutumin da aka haifa har ya shekara huɗu ba ya iya magana har ya kai shekara tara 9 Malam Albert maganarsa ba ta fita ya kan yi magana kamar mai shanyayyiyar murya, wasu malamansa ba su taɓa tunanin shi ba nakashashshe ba ne ta ɓangaren harshe.

A shekararsa ta 16 a  duniya wato a 1895 ya kasa cin jarrabawar shiga makarantar Swiss Poly Technic wadda take a Zurich amma hakan bai karyarwa da Malam Albert gwiwa ba, bayan shekara ta zagayo ya ƙara gwadawa ya samu nasara da ƙyar.

Bayan kammala karatunsa na jami'a ya fita da kwalin da ba yabo ba fallasa ya ci gaba da watangaririya a titi na rashin tabbas ɗin inda ya kama.

Da ƙyar ya samu aikin siyar da inshora yana bi ofis-ofis domin tallata hajarsa, bayan shekaru biyu ya ga hakan ba wani ci-gaba ya nemi aikin koyarwa bai samu ba da ƙyar ya samu aikin mataimakin magatakarda a ofishin bada lamuni na swiss wato a turance ana kiransa da (Patent clerk at the Swiss Federal Office for Intellectual Property in Bern.)

Albert Einstein yayin gabatar da wani jawabi kan Kimiyya da Wayewar Kai a 1933

Hoto: Keystone/Getty

Tabbas shi ne wannan mutumin da a yau  duniyar ilimi take tunƙaho da shi musamman ɓangaren ilimin kimiyya ta ɓangaren physics, tasirin photoelectric da Einstein ya gabatar  ta haka ne aka samar da  bom ɗin Atom, haƙiƙa Albert Einstein ɗaya ne daga cikin manyan masana kimiyya na ƙarni na 20, kodayake shi a matsayinsa na masanin kimiyya, ba shi da hannu kaitsaye a ƙirƙirar bam ɗin atom, wasiƙar da ya rubuta zuwa ga shugaban Amurka na lokacin ya fara farawa. Daga baya ya yi magana a bainar jama'a don yin kakkausar suka kan amfani da bama-baman nukiliyar, wanda ya kai ga halaka mutane da dama a japan.

Shin ko ka san malam Albert Einstein har koyarwa ya nema a makarantar sakandire bai samu ba saboda rashin kyawun sakamakonsa na jami'a?

Tabbas jajircewar Sheikh Albert Einstein ce tasa yau shekara 67 da yin mutuwarsa ake matuƙar ji da shi a ɓangaren kimiyya da sauran ilimai na turawan yamma, ya kuma kasance jagoran dukkan masana falsafa ta ɓangaren kimiyya da fasaha kuma mutumin da duniya ba za ta manta da shi ba tabbas.

"I want to go when I want to go. It is tasteless to prolong life artificially. I have done my share; it is time to go".

Fassara

"Ina so na tafi lokacin da nake son tafiya. Ba shi da ma'ana  don tsawaita rayuwa ta hanyar wucin gadi. Na yi rabona; lokacin tafiya ya yi".

Wannan itace maganar ƙarshe ta imamuna Albert Einstein.

Makomar mu tana ga abubuwan da muke aikatawa a yau.

Kada rashin nasara ya sa ƙarfin gwiwarka ya ragu wani lokacin da ma sai rayuwa ta juya maka baya hikimomin nasara suke zuwa ƙwaƙwalwarka.

Karanta Sauran anan»

Karanta Hikayar Tajiri Da Ifiritu (1)

A zamanin da, a wani babban gari, an yi wani babban attajiri, mai yawan dukiya, mai yawan tausayi da taimakon talakawa.

Hikayar Tajiri Da Ifiritu

Hoto: Gutenberg

Marubuci: Bukar Mada

Wata rana attajirin nan ya fita bayan gari yawo shi kaɗai domin shan iska, sai ya tsaya domin ya huta a ƙarƙashin wata itaciya mai sanyin inuwa. Ya fito da gurasa da dabino da ruwa daga cikin jakarsa, domin ya ci ya kuma sha ruwan kafin ya wuce gaba.

Bayan ya gama cin gurasa sai ya ɗauko dabino yana ci. Yana cikin cin dabinon nan sai ga wani Ifiritu (aljani), mai girman jiki, tamkar itaciyar kuka, mai tsayin gaske, tamkar itaciyar rimi, da jajayen idanu, tamkar garwashin wuta. Ya fito riƙe da takobi a hannunsa, ya ce da wannan attajiri, tashi na kashe ka tamkar yadda ka kashe ɗana.

Tajiri ya ce, “Ta yaya na kashe ɗanka?”

Ifiritu ya ce, “Yayin da ka ci dabino ka yi jifa da ƙwallon ya sami ɗana a kirji har ya faɗi ya mutu. Babu makawa yanzu in ɗau fansa, in kashe ka tamkar yadda ka kashe shi.”

Tajiri ya ce, “Ka sani ya kai wannan Ifiritu akwai bashi mai yawa a kaina. Ka bar ni in tafi gida, tsawon shekara guda, in bai wa dukkan mai haƙƙi haƙƙinsa, sannan in komo nan ka aikata abin da ka yi nufi a kaina, za ka same ni mai cika alkawari, haka Allah ya kaɗɗara.”

Ifiritu ya yarda da bukata tasa.

Tajiri ya komo gida, ya faɗa wa iyalansa da danginsa da abokansa dukkan abinda ya faru da shi, suka yi ta kuka, kuma ya biya dukkan mai bin sa bashi haƙƙinsa. Bayan shekara guda ya koma inda suka haɗu da Ifiritun nan ya zauna yana jiran fitowarsa.

Yana nan zaune yana jiran abinda zai same shi, sai ga wani tsoho tafe, ya na jaye da barewa, da igiya a wuyanta. Ko da tsohon nan ya iso wurin tajirin nan sai ya ce masa, “Bawan Allah, me ya zaunar da kai wannan wuri? Hala ba ka san cewa wannan wuri matattarar aljanu ba ne?”

Tajiri ya kwashe labarinsa da Ifiritu ya faɗa wa tsoho. Tsoho ya ce, haƙiƙa labarinka akwai ban al’ajibi da tausayi a cikinsa. Lalle ba zan bar nan ba sai na ga abinda zai kasance a gare ka. Ya sami wuri ya zauna.

Suna nan zaune, sai ga wani tsoho tafe ya na jaye da karnuka, baƙaƙe guda biyu. Tsoho mai karnuka ya yi sallama gare su. Bayan sun gaisa, ya tambaye su labarin zamansu wannan wuri wanda ya ke matattarar aljanu. Suka faɗa masa abinda ya ke faruwa. Da ya ji haka sai ya ce, lalle ba zan wuce ba har sai na ga abinda zai faru tsakanin Tajirin nan da Ifiritu. Ya sami wuri ya zauna.

Tsohon nan mai karnuka bai gama zaunawa ba, sai kuma ga wani tsoho tafe akan wata alfadara ramammiya. Da tsoho mai alfadara ya iso ya yi musu sallama, suka gaisa sannan ya tambaye su dalilin zamansu a wannan bigire. Suka labarta masa abinda ke faruwa. Shi ma ya ce ba zai wuce ba sai ya ga ƙarshen wannan al’amari. Ya sami wuri ya zauna.

Tajiri da tsofaffi na nan zaune sai suka riƙa jin wata irin hargowa, mai cike da rugugi da tsawa da iska mai tsanani tana kaɗawa, ƙasa kuwa kamar za ta tsage saboda rugugi da ƙugi. Ƙura ta tashi ta murtuƙe ko’ina, ta rufe hasken rana, ba a ganin komai tamkar a tsakiyar dare.

Yayin da hargowar nan ta lafa, ƙura ta yaye wuri ya koma dai dai, sai mutanen nan suka ga Ifiritu a tsaye da takobi zararre a hannunsa, idanunsa jawur tamkar garwashin wuta. Ya fizgo Tajirin nan daga cikinsu ya ce, tashi in kashe ka tamkar yadda ka kashe ɗana, sanyin zuciyata, farin cikin rayuwata.

Tajiri yana kuka yana kururuwa da hargowa, tsofaffin nan su ma suka fashe da kuka domin tausayin Tajiri. Sai tsohon nan na farko, mai barewa ya matso kusa da Ifiritu, ya durƙusa ya ce, “Ya kai wannan Ifiritu, Sarkin Sarakunan aljanu, da za ka tsaya in ba ka labarina da wannan barewa da nake tare da ita, da ka ji labarin abin al’ajabi wanda ba ka taɓa jin irinsa ba, amma sai idan ka yi alkawarin za ka ba ni wani yanki na jinin wannan Tajiri.”

Ifiritu ya ce, “Na yarda idan ka ba ni wannan labari na ga ya kasance abin al’ajabi da mamaki zan ba ka sulusin jinin wannan mutum.”

Tsoho mai barewa ya yi godiya ya fara ba Ifiritu da sauran mutanen da ke wurin labarinsa, da abin da ya kasance a gare shi tare da wannan barewa, kamar haka:

Tsoho na farko, mai barewa ya ce, ka sani ya kai wannan ifiritu, cewa wannan barewa ta kasance ‘yar baffana ce, na aure ta tun tana ƙarama. Mun zauna tsawon shekara talatin da ita amma Allah bai ba mu haihuwa ba. Sai na sayi kuyanga, na mayar da ita sa-ɗaka, Allah kuwa ya sa na haifi ɗa namiji tare da ita. Yaron nan ya kasance kyakkyawa, mai kyawun sura abin so da ƙauna ga kowa.

Bayan yaron nan ya kai shekara goma sha biyar, sai tafiya ta kama ni zuwa wani birni daga cikin birane. Na ɗebi guzuri na dukiya mai yawa domin ban san iyakar kwanakin da zan yi ba a wannan tafiya. Na tafi, na bar ɗana da uwarsa, da kuma matata, 'yar baffana a gida.

Wannan mata tawa, wadda ita ce wannan barewa da kake gani, ya kai wannan ifiritu, ta kasance masaniya akan bokanci da sihiri kala-kala tun tana ‘yar ƙarama. Don haka bayan tafiyata sai ta sihirce yarona ta mayar da shi bajinin sa, uwarsa kuma ta mayar da ita saniya, ta aika da su wurin mai yi mini kiwon dabbobina a daji, aka saka su a cikin garken shanu.

Bayan wani tsawon lokaci na dawo daga tafiyar da na yi, sai ban ga ɗana da uwarsa ba, na tambayi matata inda su ke. Sai ta ce da ni, ai bayan tafiyarka, kuyangarka ta mutu, ɗanka ya gudu ban san inda ya tafi ba. Wannan labari ya sa ni cikin baƙin ciki da ƙunar zuciya har tsawon shekara guda.

Lokacin da sallar layya ta zo, sai na aika wa makiyayina da ke ƙauye da ya aiko mini da saniya mai ƙiba kuma mai maiƙo domin in yi layya da ita. Wannan mata tawa sai da ta san yadda ta yi dabarar da ta sa makiyayin nan ya aiko mini da sihirtattar saniyar nan, wato kuyangata, uwar ɗana, a matsayin saniyar da zan yanka.

Da aka kawo saniyar, na tashi na cire rigata, na ɗauki wuƙa, bayan an kayar da ita an ɗaure ƙafafunta, na nufe ta da niyyar in yanka ta domin yin layya. Sai ta riƙa kuka da harbe-harbe, kamar za ta yi mini magana, amma babu baki. Sai tausayi ya kama ni, na ba wani yaron gidana wuƙar na ce ya yanka mini ita, ni kuwa na koma cikin ɗaki.

Bayan an yanka saniyar nan, wadda ta kasance kuyangata ce aka sihirce, da aka feɗe ta sai aka tarar ba ta da nama da mai sosai, daga fata sai ƙasusuwa, ni kuwa niyyata in yi layya da dabba mai nama da mai da yawa. Ganin haka sai na sake aika wa makiyayin nan da ya kawo mini wani bajini/bajimi mai nama da mai sosai. Matar nan tawa kuma ta sa aka kawo mini ɗan nan nawa da ta sihirce shi ya zama sa.

Yayin da aka zo da shi, yana gani na, sai ya tsinke igiyar da aka ɗauro shi da ita, ya rugo zuwa gare ni, ya yi kwance a gabana, kuma ya tashi yana kuki yana kuka, yana kewaya ni. Tausayinsa ya kama ni. Na ce, a mayar da shi a zo mini da saniya mai ƙiba da mai. Amma matata kuwa sai ta ce, ka yanka wannan sa domin yana da ƙiba kuma yana da mai sosai. Allah ya sa ban biye shawararta ba, domin tausayin shi ya riga ya kama ni. Aka mayar da shi.

Bayan kwana biyu, ina zaune, sai ga makiyayin nan nawa ya zo wurina, ya ce, ya shugabana, na zo ne in faɗa maka abin farin ciki da albishir. Na ce da shi, na’am, ina saurarenka.

Makiyayi ya ce mini, ya kai maigidana, na kasance ina da wata ‘ya tawa masaniyar sihiri, tun tana ƙarama ta ke a hannun wata tsohuwa, kakarta, wadda ita ce ta koya mata sihiri. Jiya bayan na koma da bajimin san nan da ba ka yanka ba, sai na tarar da ‘yar nan tawa ta zo gida domin bukin Sallah.

Yayin da na shiga da sa gida, ko da ‘yar nan tawa ta gan shi, sai ta rufe jikinta ta ce mini, ya babana, ta yaya za ka shigo mana da namiji, baligi, cikin gida? Bayan kuwa shi ba muharraminmu ba ne? Sai ta fashe da kuka. Na ce da ita, ina namijin da na shigo muku da shi? Sai ta daina kuka, sai kuma na ga tana dariya. Sai na tambayeta, me ya sa ki kuka? Me ya sa kuma yanzu kike dariya?

Ta ce da ni, wannan bajimin da kake tare da shi, ɗan shugabanmu ne, Tajiri, amma an sihirce shi ne, shi da mahaifiyarsa, kuma matar ubansa ce ta sihirce su. Amma abin da ya sa ni kuka shi ne, mahaifinsa ya sa an yanka uwarsa bai sani ba. Amma abin da ya sa ni dariya shi ne, zan iya kuɓutar da shi na mayar da shi ga siffarsa ta mutum, amma sai na yi sharaɗi da mahaifinsa.

Makiyayi ya ci gaba da faɗa mini cewa, na yi al’ajabi gayar al’ajabi, ban yi barci ba har hudowar asuba, domin na zo na sanar da kai wannan labari, ya shugabana.

Yayin da na ji wannan zance na makiyayina, ya kai wannan ifiritu, sai na ce da shi ya tashi maza mu tafi gidansa domin na ji sharaɗin da 'yarsa take so kafin ta mayar mini da ɗana siffarsa ta mutum.

Da muka iso, ‘yar makiyayi ta tare mu da murna, ta gaishe ni cikin ladabi da girmamawa. Da ɗan nan nawa ya gan ni sai ya taso ya zo ya kwanta a gabana. Na ce da ‘yar makiyayi, shin labarin da mahaifinki ya gaya mini ko gaskiya ne. Ta ce, na’am ya shugabana. Wannan bajimi da kake gani ɗanka ne.

Na ce da ita, idan kika kuɓutar da shi zan ba ki dukkan dukiyata da ta ke hannun mahaifinki. Sai ta yi murmushi, ta ce, ka sani ya shugabana, ba ni da kwaɗayi akan dukiyarka, zan kuɓutar da ɗanka amma akan sharuɗɗa guda biyu: Na farko, ka yarda na auri wannan ɗa naka, na biyu ka bar ni in sihirce wadda ta sihirce ɗanka da kuyangarka, ni ma in ɗaureta cikin sihiri tsawon rayuwarta. Idan ka yarda da waɗannan sharuɗɗa, yanzu zan mayar wa ɗanka da siffarsa.

Na ce, na amince da waɗannan sharuɗɗa, kuma na ƙara miki da dukiyar da ke hannun mahaifinki, ‘yar baffana kuwa, watau matata, ki yi duk abin da kika ga dama da ita.

Yayin da ta ji zancena ta ɗauki tasa, ta cika da ruwa, sannan ta yi wasu karance-karance ta tofa a cikin ruwan nan, sannan ta yayyafa wa bajimin sannan, ta ce, idan Allah ya halicce ka, ka kasance bajimi, to ka ci gaba da zama bajimi, idan Allah ya sa sihirce ka aka yi, ka juya ga siffarka ta asali, da yardar Allah Maɗaukakin Sarki. Nan take sai ya juye ya koma mutum, kamarsa ta asali. Na aura masa ‘yar makiyayin nan, ita kuma ce ta sihirce ‘yar baffan nan tawa zuwa wannan barewa da kake gani, ya kai wannan ifiritu.

Idan wannan labari nawa ya kasance mai ban al’ajabi a gareka ina son ka ba ni sulusin jinin wannan Tajiri da ya kashe ɗanka ba tare da ya sani ba.

Ifiritu ya ce, haƙiƙa wannan labari akwai abin al’ajabi a cikinsa, don haka na ba ka sulusin jinin wannan mutum.

DUBA WANNAN: Hikayar Ali Baba Da Barayi Arba'in (1)

Daga nan sai tsoho na biyu mai karnuka ya matso wurin Ifiritu, ya ce ni ma ina da labarin da zan ba ka akan waɗannan karnuka da kake gani, amma sai idan za ka ba ni sulusin jinin wanan mutum.

Ifiritu ya ce, faɗi labarinka mu ji. Tshoho mai karnuka ya fara labarinsa kamar haka:........

Ku ci-gaba da kasancewa tare da mu a kullum don samun ci-gaban wannan ƙayatacciyar hikayar da sauran zafafan hikayoyi duk a kyauta.

Karanta Sauran anan»