Sirrika 5 Da Masu Kudi Da Kwararru Ba Sa Bayyanawa

Babban abin da yakamata mu fara la'akari da shi shi ne, yawan jari ko kalar sana'a ba shi zai tara maka kuɗi ba. Da yawan mutane suna gabatar da wani aiki ko sana'a, amma kuma ba sa samun irin kuɗaɗen da suke buƙata na rayuwa.

Sirrika 5 Da Masu Kuɗi Da Kwararru Ba Sa Bayyanawa 

Hoto: Albert shakirov/Dreams time

Marubuci:- Bello Ado Hussaini

To yaya kuma ga wanda zai fara sana'ar yanzu, har yake tsammanin da zarar ya fara sai kuɗi su yi ta shigowa?

Duk wanda ya gina sana'a ko kasuwanci, ya san irin ƙalubalen da ya fuskanta, kuma idan kasuwancin nasa ya tsaya yana kawo riba, ya san hanyoyin da ya bi, da kuma wasu dabaru da ya riƙe, a matsayin sirrin neman sa.

Sai dai bisa ɗabi'ar mutanen mu, da wuya mutum ya gaya ma irin dabarun nasa, musamman idan ya zama sana'ar ku iri ɗaya ce, ko kuma kasuwa ɗaya kuke ci.

Masu kuɗi da waɗanda suka samu nasara a kasuwanci da sana'a, sun fahimci cewa, babu wani wanda yake son rabuwa da kuɗinsa haka kawai.

Sai dai akwai wasu buƙatu da domin su ma yake tara kuɗaɗen sa, kuma a shirye yake ya biya kuɗi domin biya masa waɗannan buƙatu.

Masu kuɗi sun gane cewa, zuba kuɗin su a irin waɗannan buƙatu na al'umma, ko kuma samar da sana'a wacce za ta magance matsalolin waɗanda suke da kuɗin biya, hanya ce miƙaƙƙiya ta gina arziki.

Sun gane cewa akwai buƙatun da dole a zo neman su, kuma da zarar ka shirya yadda za ka magance waɗannan buƙatu, mutane za su yi ta layi suna biyan ka kuɗade, domin warware musu damuwarsu, ko kuma buƙatar su.

Abin da yakamata mai sana'a ko kasuwanci ya fahimta shi ne, wacce irin matsala ko buƙata yake iya warwarewa a cikin aikinsa, saɓanin abokanan kasuwancin sa.

Akwai abubuwa da yawa da za'a iya duba zuwa gare su, amma bari mu kawo kaɗan daga ciki;

1. ƘARANCI

Wannan yana nufin wani abu na buƙatar rayuwa ya yi ƙaranci ko wahala, kai kuma sai ka nemo shi duk inda yake, ko kuma ka samar da shi.

Hakan zai zama dole mutane su biya ka ladar ka, domin ka samar da abin da suke buƙata, yayin ƙaranci.

2. LOKACI

Mutane suna da buƙatu, amma a mafi yawa, buƙatun nasu suna da lokaci.

Matsawar ba za ka iya biya musu buƙatunsu akan lokacin da suke buƙata ba, tabbas za su rabu da kai da kayan ka, ka yi ta hamma ba ciniki.

Wannan ce tasa yanzu da yawa, za ka ga ana yawan tallata kaya, tare da cewa za mu iya kawo maka kayan inda kake, kuma sai ka gani sannan ka biya.

Akwai kuma abubuwan da suke da kaka, wato ƙayyyadadden lokaci, duk wanda ya kawo kayan sanyi cikin tsananin zafi, ya san sai dai ya kai su ma'ajiya.

3. FARASHI

Kusan duk abin da mutum zai saya, kafin ya zo kasuwa ya ƙulla a zuciyar sa farashin da zai iya biya.

Saɓanin wannan zai iya fasa buƙatar, ba don ba shi da kuɗin ba, sai dai buƙatar ba ta kai wannan farashin ba a gurin sa.

Wajibi ne ka warware matsala a farashin da masu buƙata za su iya biya.

Idan farashin ka ya zarta waɗanda kake tare da su, ya zama wajibi ka nemi sabbin abokan hulɗa. 

Wannan shi zai kai mu ga mataki na gaba a ƙasa.

4. MUHALLI

Wannan kamar yadda na zayyana a sama yana da alaka da irin matsalar da za ka warware, su wa za ka warwarewa, kuma a wane farashi.

5. GAMSARWA

Kamar yadda kowa ya sani, duk wanda zai rabu da kuɗinsa, so yake kuma ya rabu da matsalar da ta sa shi kashe kuɗin.

Don haka dole ne ka samar masa da abin da yake buƙata, har ya gamsu cewa biyan ka da ya yi bai yi kuskure ba.

RUFEWA

Wato gaba-ɗaya shi nema, ɗaukar ƙafa ne da kuma ɗaukar dama, abinda ake kira LEVERAGE.

Dole ne kake la'akari da buƙatun al'umma na ƙashin kansu, sai kuma yanayi da wani salo wanda ba kowa ya fahimce shi ba.

Wannan ce tasa za ka ga mutane masu sana'a iri ɗaya, wani lokacin a waje ɗaya, amma wani yana ta bunƙasa, wani kuma sai a hankali kawai.

Masu magana suna cewa, kowa ya ci Zomo, ya ci gudu tukunna.

Allah yasa mu dace Amin.

Karanta Sauran anan»

Hanyoyi 9 Na Rabuwa Da Talauci

Wato shi fa talauci babban maƙiyi ne, babu wata soyayya tsakaninku. Idan tsautsayi ya sa har yanzu ba ku gama raba hanya da shi ba, ga wasu dabaru da za ka iya amfani da su domin ku yi hannun riga da shi.

Hanyoyi 9 Na Rabuwa Da Talauci

Hoto: Mental health hope

Marubuci:- Abubakar Abba

Allah yake bayar da arziki, amma sai an yi aiki.

1. KAMA SANA’A MAI KAWO ARZIKI

Kowacce sana’a za ta iya bayar da arziki a wani zamanin, kuma ba lallai ba ne ta bayar a wani zamanin daban.

Yana da kyau ka tsaya ka duba wacce ce take bayar da arziki a zamanin da kake, ko kuma yaya za ka ingantata ta kawo arziki.

Arziki yana zuwa ne bayan an neme shi, ba’a yin arziki daga kwance.

2. KAMA ILIMI KAM-KAM

Duk yadda za’a zuga ka, kada ka yarda ka zauna ba ka da ilimin abin da kake yi.

Idan Leburanci kake, ka nemi ilimin inganta ta, idan kasuwanci kake, ka nemi ilimin gudanarwa, da bunƙasawa.

Babu wanda ya yi nasara tabbatacciya da jahilci.

3. KA YI NESA-NESA DA JAHILAI

Ko ka yarda ko kar ka yarda, mutanen da kake mu’amala da su yau da kullum suna da tasiri sosai wajen nasararka a rayuwa.

Jahilai har kullum lissafinsu ba na ci gaba ba ne, don ba su da masaniya akan me rayuwa take tafiya akai ba.

4. IDAN KA SAMU DAMA KA BAR UNGUWAR TALAKAWA

Masana halayyar Ɗan Adam, sun daɗe da fahimtar cewa zama cikin wajen da babu damarmaki yana taimakawa sosai wajen dawwamar da mutum cikin talauci.

Sauya muhalli yana tasiri sosai wajen sauya tunani, sannan yana taimakawa wajen samun damammaki, wanda idan aka yi amfani da su sai a samu dacewa.

A cikin littafin rayuwarsa, hamshaƙin mai kuɗi Femi Otedola, ya yi ƙarin haske akan wannan, a je a karanta za’a sha labari.

5. KA NEMI ILIMI AKAN KUƊI

Akwai wani babban ganganci da mutane da yawa suke yi shi ne, suna zama ba tare da sun nemi ilimin yaya ake tara dukiya, yaya ake alkintata, yaya ake bunƙasa ta ba.

A tunanin mafi yawan mutane, arziki zuwa kawai yake yi, ba tare da mutum ya yi wani hobɓasa daga ɓangarensa ba.

A tunanin mutane masu rauni, laifi ne ka nemi ilimin yadda za ka samu kuɗi ko yadda za ka yi arziki.

Don haka da yawansu suke fama da baƙin talauci.

Bayan ka nemi ilimin karatu da rubutu, to lallai ka nemi ilimin yadda harkokin kuɗi suke, zai taimaka sosai.

6. KA YI ƘOƘARI MASU ARZIKI SU SAN DARAJARKA

Kar ka yarda ka kulle kanka a waje ɗaya, idan Allah ya ba ka ilimi, ka yi ƙoƙari ka fito da shi duniya ta sani.

Ka yi ƙoƙari duk inda ake harkar arziki kai ma a gan ka a wajen, bayan ka je wajen, ka tabbatar ka nuna baiwar da Allah ya yi maka.

Daga haka ake samu silar arziki.

Kar ka yarda da shirmen jiran 'yan siyasa, ko Auren Hajiya, ko 'yar masu kuɗi, wannan duk baragada ce.

Ka gina daraja, ka yi tsari mai kyau, ka yi addu’ar dacewa.

7. KA TABBATA KA KOYI HALAYE MASU KYAU

Kyawun hali da mu’amala mai kyau tana ba wa mutum arzikin da bai taɓa zato ba.

Kar ka zama mai kaushin hali, ko mai wahalar mu’amala da mutane, ko mara haƙuri da juriya, ko mai yawan aibanta mutane, ko mai yawan gulma da neman laifin mutane, duk wanda ka ga yana wannan munanan ɗabi’un, to ka tabbata ba inda zai je a rayuwa.

8. KA CIRE TSORO DA SON JIKI

Ka daina tsoron shiga harkar da za ta ba ka alheri in dai halal ce.

Ka daina tsoron abin da mutane za su ce, ko abin da 'yan uwanka za su ce, ko abin da matarka, budurwarka ko abokanka za su ce.

Wannan shi ne abu na farko da zai ba ka damar shiga rayuwa mai cikakken 'yanci.

Arziki ba ya zuwa da tunani ƙarami ko lissafin mai tsoro.

9. KA KULA DA LAFIYARKA

Lafiyarka ita ce babban jarinka, babu wani abu da zai tafi daidai idan lafiyarka ba ta kan saiti.

Lafiyarka tana da tsada, don haka kada ka yi wasa da abincinka, hutunka, baccinka da motsa jiki.

Kada ka yarda wani aiki, ko wani mutum ya hana ka samun waɗannan ababen.

Ni ne jagoran masu yaƙi da talauci da tunani irin na talauci.

Idan kana son samun haske da samun dabaru masu inganci  akan yadda za’a samu hanyar da za ta ɓulle, to nan ce babbar tasha.

Ka ci-gaba da bi na, tare da yaɗa wannan saboda wasu ma su amfana, da haka ne za mu fatattaki talauci da 'yan koren sa.

Karanta Sauran anan»

Gaskiya Magana Kan Kalmar Zafin Nema Ba Ya Kawo Samu

Idan ana so a kwantarwa mutum hankali, sai ana masa wannan karin magana: “Zafin nema ba ya kawo samu.” Amma idan ka tsaya ka yi tunani, za ka tambayi kanka, “to, me yasa Allah ya ce tashi in taimake ka?”

Gaskiyar magana kan kalmar zafin nema ba ya kawo samu

Hoto: Ridofranz/Getty images

Marubuci:- Dahiru Aliyu Musa

Gaskiya ne akwai lokaci, akwai rabo, kuma Allah yana ba wa wanda ya ga dama a lokacin da ya ga dama. Amma hakan ba yana nufin ka haƙura da ƙoƙari ba, ko ka zauna jiran abin ya faɗo maka daga sama. Sau da yawa, hanyar da Allah ke amfani da ita wajen kawo maka abin da aka rubuta maka ita ce ƙoƙarinka.

Samu yana zuwa ne ga mai neman sa, kamar yadda nasara take zuwa ga mai jurewa wahala da dagewa.

Ka duba manoma. Suna shuka iri da kyau, suna yin aikin noma daga safe har yamma. Su ba sa cewa “idan rabonmu ne za mu girba.” Sun san aikin su shi ne shuka, Allah kuma shi ne mai sa amfanin ya fito.

Ka duba ɗalibai. Ba su zauna a gida suna addu’a kawai su ce “idan rabona ne zan ci jarabawa.” Suna karatu, suna nema, sannan su dogara da Allah don ya sa musu albarka.

Ko ’yan kasuwa. Ba su zauna suna jiran kasuwa ta kawo musu kuɗi ba. Suna tashi da safe suna neman dama, suna jurewa, sannan suna sa ran Allah ya saka musu nasara a neman su.

Don haka, wannan karin magana tana da ma’ana, amma ba cikakkiya ba ce. Abin da ya dace shi ne ka dage, ka nema, sannan ka bar sakamakon a hannun Allah.

Karanta Sauran anan»

Kalaman Soyayya Ga Budurwar Da Ra'ayin Ku Ya Zama Daya

Na ɗauki tsawon lokaci ina bincike har kawo yanzu domin samun wacce za mu yi rayuwar aure tare mu gudu tare mu tsira tare, amma wani lokaci sai na ga kamar ba zan samu mai irin ra'ayina ba, har sai da na haɗu da ke sannan na tabbatar burina ya cika.

Kalaman Soyayya Ga Budurwar Da Ra'ayin Ku Ya Zama Daya

Hoto:  People images - Yuri A/Shutte stock

Marubuci:- El-Nass

A lokacin da na fara ganin ki sai da numfashina ya ɗauke. A lokacin da kika fara min magana sai da tunanina ya ɗauke.

A lokacin ne idanuwana suka tabbatar min da cewa ba su taɓa ganin wani abu mai kyawun sura tamkar ki ba.

A gare ki duk na samu abubuwan da nake buƙata.

Karanta Sauran anan»

Muhimmancin Rayuwa A Yadda Kake

Babu abun da yake daƙushe baiwar mutum a rayuwa kamar ƙoƙarin mutum na zama wani daban saɓanin asalin yadda yake a halitta da fahimta. Babu abun da zai fito da baiwar ka a duniya kamar zamowa kai, ka zama kai ba wani daban ba.

Muhimmancin Rayuwa A Yadda Kake

Hoto: Good boy picture company/Istock photo

Marubuci:- Abubakar S. Wali

Daga lokacin da ka tsinci kanka babu matsi na kwaikwayon rayuwar da ba taka ba daga lokacin ka samu wani ƙarfi/iko da zai ba ka 'yancin zama cikakken mutum.

Ga wasu abubuwa da za su taimaka maka wajen yin rayuwa a asalin yadda kake.

Sanin kai

Tasirin sanin kai da yin rayuwa daidai kai, a yadda kake.

Ba za ka iya zama kai ba sai ka san wane ne  kai ɗin, ka san kanka, ka nazarci kanka kamar wani kake nazarta. Me kake so ? Ina ƙarfin ka yake? Ina raunin ka yake? Ina kake son zuwa? daga ina kake?

Rashin jin kunyar bayyana kai

Ya zama babu wani abu da kake ɓoyewa mutane game da asalin ka ko bayan ka. Ya zama mutane suna saurin sanin asalin ka idan suna mu'amala da kai ba dan nuna alfahari ba sai dan ba ka rufa-rufa ko ɓoye asalin ka.

Rashin tsoron bayyana ra'ayi ko fahimtar da ta saɓa da gama garin mutane

Hakan ba ya nufin ka yi ta hayaniya da mutane wajen bayyana wannan ra'ayin ko fahimtar, abun da ake nufi shi ne babu wani matsi daga mutane da zai sa ka yi wa kanka ƙarya ta hanyar bayyana ra'ayi ko fahimtar da ka san sun saɓa da naka. Ya zama ba ka damuwa akan ra'ayoyi da fahimtar mutane da suka saɓa da naka, sannan kuma ba ka damuwa da bayyana naka ra'ayi da fahimtar a duk lokacin da buƙatar hakan ta tashi.

Ka bar mutane su ma su zama su

Duk yadda ka kai da sanin kanka da yin rayuwar da ta dace da kai, ba za ka taɓa jin daɗi ba idan su ma mutanen ba ka musu wannan uzurin ba. Dole ka bar kowa ya yi rayuwa a yadda yake, kada ka yi ƙoƙarin canja mutane ko fatan mutane su zama wani abu daban, dole ka koyi karɓar mutane a yadda suke gaba ɗayan su, ka karɓe su da rayuwar su, da fahimtar su, da wautar su, da ilimin su, da jahilcin su.

Kada ka zama ɗan a bi Yarima a sha kiɗa

Ya zama kana da tsayayyen ra'ayin kanka akan kowane al'amari ba kawai inda aka fi yawa ko inda ya fi shahara kake bi ba. Ya zama ba wai ƙoƙarin bambanta kanka da mutane kake yi a kowane lokaci ba, a'a ya zama babu wani matsi da zai tilastaka yin abun da ya saɓa da fahimtar ka ko wane ne kai a mutum.

Rashin damuwa da tunanin mutane a kanka

Wannan kamata ya yi ya zama na farko saboda muhimmancin sa. Mutane da yawa, damuwa akan tunani ko ra'ayin mutane a kansu ya jefa rayuwar su cikin ƙunci.

Abun da ya kamata ka fahimta shi ne: mutane suna da dama ko 'yancin samun kowane irin tunani ko ra'ayi a kanka mai kyau ko mara kyau, ba ka da iko akan wannan, amma wannan ra'ayi ko tunanin nasu a kanka ba shi da tasirin cutar da kai. 

Damuwa akan tunanin su a kanka shi ne abun da zai cutar da rayuwar ka, saboda haka wauta ne ka zama wani daban domin kawai wani ya samu tunani ko ra'ayi mai kyau a kanka.

Ka kasance a yadda kake.

Karanta Sauran anan»

Yadda Ake Kula Da Mace A Soyayya

Kuskuren da mace ta yi ma a soyayya ka tausaya mata kar ka yi abun da zai sa fitar hawaye a idonta. Ka duba rauninta kasancewarta mace.

Yadda Ake Kula Da Mace A Soyayya

Hoto: Business insider

Marubuci:- Muh'd Captain

Dukkan soyayyar da babu tausayin mace a zuciya tabbas soyayyar gangan jiki ake mata ba na ruhi ba.

Mace tana son mutum ne da zuciya ɗaya koda a ce shi mutum mai cutarwa ne a gurin ta.

Zuciyar mace da rayuwarta akwai rauni a ciki dole duk namiji ya koyawa kansa tausayawa mace.

Ita mace al'umma ce ba ta kulawa dole ce a gurin mu, tabbas masu girma ne mata, mu tausayawa raunin su.

Kuɗi, gida, kayan alatu ba su ne kawai abin da mata ke buƙata a soyayya ba, kulawa, tausayawa da kuma samun lokacin masoyi su fi buƙata.

Ita soyayya aba ce mai girma wadda take son kulawa da tausayawa.

Karanta Sauran anan»

Gayawa Mutane Burin Ka

 1. “Ina so na fara kasuwanci, ai harkar shaddodi ana samun alkhairi sosai.". Zan fara siyar da takalma, akwai wani abokina da zai riƙa saro mun a kasuwar Wambai. ”

2. “Gaskiya ya kamata na koma makaranta, zan saka littafin Bulugul Maraam.”

3. “Watanni 8 kenan da na gama bautar ƙasa amma ban samu aiki ba, ya kamata na koyi wata sana'a ko ƙwarewa. Ina so na koyi yadda ake "Website Design."”

Gayawa Mutane Burin Ka

Hoto: istock photo

4. "Ina so, zan fara". "Ya kamata." "Nan da wani lokaci.". "Watarana," "Nan kusa". 

Waɗannan kalmomin da ire-irensu sun yi sanadiyyar salwantar da burikan mutane bila adadin.

Hakan ya faru ne saboda mutane suna musanya zance da aiki.

A rayuwa, abin da ke bambance tsakanin masu yin buri kawai da masu isa ga wannan burin shi ne aiki.

Abu ne mai sauƙi ka ɓata awanni kana tattaunawa da mutane akan manufarka, ko kan tsare-tsare, ko zancen zuci.

Amma fa ka sani, idan ba ka ɗauki wannan takun na farko ba, babu abin da zai canza a cikin rayuwarka.

Surutu da gaya wa mutane burinka kawai zai ƙara maka kasala ne da ruɗuwa da kanka, sai ka ji kamar kana samun ci-gaba, kamar har ka soma abin da kake ƙoƙarin aikatawa.

Ka bar bari ƙwaƙwalwarka tana yaudararka tana suranta maka kamar ga shi nan har ka cimma manufarka.

Ci-gaba na haƙiƙa yana zuwa ne daga farawa, da yin aiki ba daga surutu ba, kuma ba daga kyawun shawara ko kyakkyawan shiri ba kaɗai.

Tazarar da ke tsakanin inda kake da inda ka nufa, ba abin da zai cike ta face aiki, ba surutu ba.

Minti ɗaya na aiki ya fi awa guda na magana. Za ka iya yin shekaru kana faɗin burikan ka amma hakan ba zai canza komai ba daga haƙiƙanin halayyar ka. 

Surutu hali ne na ragwaye, aiki shi ne halin jajirtattu.

Ba laifi ba ne don ka yi shawara, ko ka tsaya tunani da yin tsare-tsare, amma fa ka sani; magana idan ta yi yawa ta kan koma shirme da soki-burutsu.

Tushe/Asali: Hausa Motivation

Karanta Sauran anan»

Kalaman Gaisuwar Barka Da Asuba Ga Masoyiya

Aminci a gare ki ya sarauniya mai kyakkyawar sura da cikakkiyar nutsuwar sautin zance wanda ke fita tamkar busa irin na sarewa. Matsayin girman daraja da biyayyar da zuciyata takewa ƙaunarki ta wuce adadin busawar iska cikin adadin tafiyar kwanakin numfashina.

Kalaman gaisuwar barka da asuba ga masoyiya

Hoto: Master file

Marubuci:- Abdul'aziz Hamza KKR

Ina miƙa saƙon so daga zuciyata zuwa ga zuciyar da nake neman haɗa zumunci wanda muke fatan kasantuwa har zuwa ƙarshen rayuwar numfashi.

Ya mai martaba sallama da kalaman gaisuwar aminci a gare ki tare da haɗaɗɗiyar daular murmushin fuska mai cike da nuni da isar da muhimmin saƙo zuwa gare ki.

Ki agaji zuciyata da kalaman son ki, ki yayyafawa ruhina ruwan sanyin murmushinki mai fitowa cikin tsakiyar laɓɓanki masu ɗaukar hankali.

Ina cikin tsakiyar son ki,  ke ce sabuwar duniyata ta musamman mai ɗauke da kayan alatu masu faranta ruhin jikina.

Haƙiƙa hasken annurin fuskarki bai gushe ba face ya yi awon gaba da dukkan wani kuzarin da ke jikina.

Ina miƙa saƙon gaisuwa mai ɗauke da fatan amincewar ruhin zuciyarki, fatana kawai ki ce min kin karɓa.

Karanta Sauran anan»

Halayen Mace A Soyayya Da Aure

Idan mace tana halayen yara da ƙuruciya a wajen namijin da take so, hakan na faruwa ne idan ta samu tsayayyen namiji, tana jin aminci da kwanciyar hankali a soyayyar.

Halayen Mace A Soyayya Da Aure

Hoto: Freepik

Marubuci:- Abdallah Aliyu Saint

Idan mace tana jajircewa kamar namiji tana ɗaukar ɗawainiyar da namiji ya kamata ya ɗauka , to saboda tana tare da namiji mai rauni ne wanda bai jajirce ba akan al'amuran ta, hakan ya tilasta mata zama jagora.

Idan mace ta fara ƙoƙarin barin soyayya to ta fara hango cewa wanda take tare da shi ba zai cika mata wasu manufofinta ba ne.

Idan mace kullum tana wahalar aiki fiye da kima, to tana tare da namiji mai sakaci. Tana jin babu kariya a ɓangaren kuɗi, tana ƙoƙarin cike giɓin da ya gaza samu.

Muhimmin abin lura shi ne, halayen mace sau da yawa amsa ne ga irin ƙarfi ko rauni da take samu daga namiji.

Halaye mace sukan canja ne kuma su ta'allaƙa ga irin namijin da take tare da shi.

Karanta Sauran anan»

Kalaman Soyayya Masu Kara Dankon Soyayya Ga Budurwa

Ke ce mai sani murmushi a duk lokacin da na shiga duhun damuwa. Ke ce abar kulawa a lokacin da nake da rauni.

Kalaman Ƙara Danƙon Soyayya Ga Budurwa

Hoto: Freepik

Marubuci:- Hayat S.A Kwa

Zuciyata tana rawa da farin ciki a duk lokacin da na tuna ki.

Kin shige min zuciya, kin zauna canciki.

Na gode masoyiyata da kika kasance a kusa da ni.

Soyayyar ki tana ƙara min ƙarfin gwiwa kamar hasken safe.

Rayuwata ta yi armashi saboda ke.

Na zama mai sa’a da samun ki cikin rayuwata.

Ke ce babbar abokiyata kuma abar sona.

Ki sani cewa, cikin kowanne numfashi da nake shaƙa, ina jin ƙamshin soyayyarki.

Kin zama sashi na zuciya, rai da fata ta.

Ina ƙaunarki fiye da kalmomi, fiye da lokaci.

Zan ci gaba da ƙaunarki har abada, insha Allah.

Tabbas, ke kyauta ce daga Allah, mafi daraja.

Ina yi wa Allah godiya da Ya haɗa ni da ke, tamkar amsa ce ga addu’ata.

Karanta Sauran anan»

Sakonnin Soyayya Na Lokacin Faduwar Rana

Murmushinki ya haskake ilahirin nahiyar dukkan jikina, ganinki yana bayyano da dukkan wani kuzari da shauƙina a kullum.

Sakonnin soyayya na lokacin faɗuwar rana

Hoto: Media bom

Marubuci:- Abdul'aziz Hamza KKR

Saƙon zuciya daga ɓangaren zuciya zuwa ga kyakkyawar sarauniya, kuma abun koyi ga dukkan sauran 'yammata.

Tsarin da na tsaro zuciyata shi ne na koya mata yadda za ta rayu da ke domin aminta da nagartarki da kuma ƙwarewarki wajen rarrashin abin da kike ƙauna.

Kin kasance wata alƙarya ta musamman wadda a cikinta ne nake wanzuwar kasancewa da shauƙi madawwami.

Tunanin zuciyata a kullum shi ne ki kusantu inda na kasance. Numfashina yana fita ne a cikin naki.

Son ki ya yi ado a cikin jikina, komai nake yi ina  kasantuwa ne a cikin yanayinki.

Kin zama ma'aunin da ke yawan  auna rayuwar jin daɗin da ke wanzuwa a tare da ni idan kina nan ni ma ina nan. 

Kin iya murmushin ɗaukar ruhin zuciya musamman lokacin da laɓɓan ki suka sha ado da kwalliyar jan baki.

Ni dai na san ina sonki. Kuma zuciyata ma tana sonki.

Ki taimake ni, ki agaji ruhina domin ki taya zuciyata sonki, da kuma taimaka mata wajen kulawa da ke.

Karanta Sauran anan»

Yadda Mata Suke Rusa Arzikin Mazajen Su

Da yawa daga cikin matasa masu aure, matansu ne silar lalacewar tattalin arzikinsu, kuma su ne ummul-aba’isin daƙile ci gaban mazansu a rayuwa.

Yadda Mata Duke Rusa Arzikin Mazajen Su

Hoto: LinkedIn

Marubuci:- Abdallah Aliyu Saint

Ba na cewa duka ba, amma kusan kaso casa’in cikin ɗari (90%) na mata su ne ke jawowa mazansu jarrabawa da karya musu tattalin arziki a aikace, da kuma karya musu gwiwa wajen jajircewa akan neman halal a kowanne aiki.

Na san za ka yarda da ni idan ka duba a unguwarku, ka ga yadda wasu matasa suka taso da ƙwazon nema da tattali da iya sarrafa kuɗi don rufin asiri. Amma da zarar sun yi aure, komai sai ya lalace.

Hatta ɗan gidansa wani sai ya siyar, balle kuma ɗan lifan da ya tara da wahala.

Ana ɗaura aure, sai ka ga wata tana fara fitowa da hanyoyi masu kai namiji ga lalacewa.

Wata tun daga suturarsa take fara ingizawa, tana cewa:

 "Gaskiya kamata ya yi yanzu ka dinga ɗinka shadda. Haka za mu shiga dangina ana nuna mijina, ana cewa kamar ɗan dako ba shi da suturar arziki."

Musamman idan ta ga yana ɗan sarrafa kuɗi, sai ka ji tana cewa:

 "Gaskiya ya kamata mu dinga cin miya da kaji kullum. 'Yan uwana za su tarar da ni kullum ina fama da shinkafa fara da miyar jajjage da ɗan kifi."

Haka za ta ci gaba da ingiza shi. Shi kuma yana cikin jin daɗin amarci, har ta rinka raɗa masa a kunne:

 "Wallahi, mijin maƙwabciyarmu bai kai ka samun kuɗi ba, amma har solar ya haɗa a gidansa. Dan Allah ni ma a saka min, na daina sintirin kai caji maƙwabta."

Shi kuma namiji, saboda ƙarfin hali da rashin son a ce ya gaza, sai ya ci gaba da yi wa jarinsa rubdugu, kamar wanda ya samu kuɗin gado.

Kafin ya farga, sai ka ga shagon nasa yana ramewa kamar wanda cutar ƙanjamau ta kama. A hankali, sai a cinye komai.

Daga nan kuma ta fara zuga shi da cewa:

 "Tun da babu jari, sai ka siyar da gidan, ka sayi ƙaramin gida, ragowar kuɗin ka ja jari. Tun da jama'a sun gano komai ya ƙare, kada abinci ya fara gagarar mu a ji kunya."

Ƙarshe idan bai yi hankali ba, har ƙaramin gidan zai siyar, ya koma haya. Ita kuma sai ta kai shi kotun ƴan alluna ta ƙofar Wambai, ta ce ya kasa ciyar da ita, dole a raba auren.

Ƙarshe ya shiga uku, babu:

Babu gida,

Babu jari,

Babu aure.

Ita kuwa ba ta yi asara ba. Tana fitowa, wani ya aure ta, musamman idan tana da haske.

Don haka, idan amaryarka ta fara kawo maka waɗannan jahilan shawarwarin, kai shiru ka ce:

 "Ba zan iya ba."

Idan ta matsa, ka ce:

 "A aika a kawo daga gidanku.".

Ya kai ango!! Dole ka lura kada santin amarci ya sa ka bindige jarinka kamar yadda sojojin Najeriya ke bindige ɗan ta'adda har lahira a daji.

Karanta Sauran anan»

Zabar Abokai A Tsakanin Maza Da Mata

A yau kowa kana haɗuwa da shi sai ka ce abokinka ne. Kowa yana dariya da kai sai ka ce kun yi shekara goma da sanayya. Wasu ma idan sun haɗu da mace, ba su fi sau biyu ba sai ka ji yana cewa "ai wannan matata ce nan gaba." Ashe rayuwa haka take da sauƙi kenan?

Zaɓar Abokai A Tsakanin Maza Da Mata

Hoto: Photosvit/Dreams time

Marubuci:- Abdallah Aliyu Saint

Bari na faɗa maka gaskiya, domin ko ka ji daɗi ko ka ɓata rai: ba kowa ba ne abokinka, kuma ba kowacce mace ba ce ta zama taka. Kaso casa'in cikin ɗari (90%) na nasarar rayuwarka ya dogara ne da irin mutanen da ka zauna da su, wato abokai da matar aure. Sauran goma cikin ɗari kuwa addu'ar iyaye da ƙoƙarin kanka ne ke ɗauke da su.

Iyaye fa Allah ne ya zaɓa mana su. Ba mu da zabin su. Idan sun ba da shawara, to da soyayya suke, amma ba duka shawarar tasu ce ta dace da zamani ba. To amma abokai da mace kuwa, kai kanka za ka zaɓa. Kuma idan ka yi zaɓi da hangen ido kawai, ba da hangen zuciya ba, to ka shirya zaman nadama.

Mutane da yawa suna ɗaukar abokai kamar ana tara busasshen totuwar rake da daddare bayan an tashi daga dandalin wasa. Kowanne ya zo, a jefa a ɗaki. Ba duba hali, ba duba buri, ba duba irin gudunmawar da zai bayar. Idan ka tambayi wasu, me yasa suke tare da abokansu, sai su ce "ai mun saba," kalmar sabo ba za ta amfanar da kai komai ba cikin alaƙar da ke jawo ka baya kamar mai haƙan rijiya.

Aboki ya zama abokinka idan kuna ƙarfafa juna, ba idan kuna janyo juna ƙasa ba. Misali, kana da buri na kafa kamfani ko kasuwanci, abokinka kuma kullum yana zaune yana sharhi kan fim da wasan kwallon ƙafa. Kana tsammani irin wannan aboki zai taimaka maka ka cimma burinka? Sam sai dai ƙarshe ku ƙare da siyan ƙatuwar "Plasma" Ku yi ta kallon tashoshin Arewa24 kuna sharhin fina-finai.

Idan abokinka ba ya faɗa maka gaskiya, ba ya ƙarfafa ka ka fita neman ilimi ko aiki, sai fa ya zama kamar dutse ne a wuyan riga, yana hana ka motsi, amma ba ka gane ba. Aboki nagari yana tura ka gaba kamar iska ke tura kwale-kwale a cikin ruwa.

Amma ba abokai kaɗai ba, mace ma tana da rawar takawa a ginin rayuwa. Duk da cewa ana cewa kyau na da daɗi, amma ba kyau ka aura kyau kawai ba tare da hankali ba. Kallon mace kawai da kyau, ka mata tambayar: "Ta na da buri kuwa? Ta na da hangen nesa kuwa? Ta san me ake nufi da gida kuwa?" ai kai da kanka ka ɗaura kanka igiya a wuya kana ƙoƙarin rataye kanka.

Misali, ka haɗu da mace kyakkyawa tamkar hasken wata, amma kullum ba ta da wani buri sai selfie da TikTok.

Ba ta da buri sai kwaikwayon matan film da kwatanta irin rayuwarsu, burinta ta yi kwalliya kawai kowa ya dinga yaba mata.

Kana burin ya za ka gina gida ? Tana kawo maka labarin abaya 'yar 400k ta shigo kasuwa.

Kana gaya mata kana son sake buɗe shago tana sa ka rigima akan dole sai ka siya mata iPhone. Lallai kuwa a matsayinka na matashi kuma mai ƙoƙarin gina kasuwanci za ta daɗe tana jawo ka baya da wannan baƙar al'ada.

Zaman aure fa kamar haɗa tawagar ƙwallon ƙafa ne, sai kowacce lamba da kusurwa ta yi motsi kuma ta yi aikinta sosai sannan za'a yi nasara.

Rayuwa dai kamar jirgin ruwa ce, kuma abokanka da matarka su ne fasinjojin ka. Idan fasinjoji marasa amfani suka cika jirgin, jirgin zai nutse kafin ya kai bakin gaɓa. Amma idan ka tara masu ƙwazo, masu buri, masu kyau da hankali, kai tsaye za ka ratsa gaɓar arziki lafiya.

A duniyar nan, wanda bai iya zaɓar abokansa da matarsa ba, to kamar mai shuka rogo a sahara ne, ruwa babu, ƙasa busasshiya. Shuka sai a banza.

Ka buɗe idanu ka zaɓi abokai da mata masu hankali da buri. Kada ka karɓi kowa kamar ana raba ruwan sanyi a rana. Ka ɗora su a sikeli: me za su kawo maka, me za ka koya daga gare su?

Ka tuna, aboki mara amfani kamar mugun tunani yake, da ƙyar ake  iya nasarar kuɓucewa daga gare shi. Mace marar hangen nesa kuma kamar bokiti marar tsafta take, duk ruwan da ka zuba, haka zai ɓaci.

Don haka, ka yi amfani da hankalinka kafin zuciyarka ta ɓatar da kai. Rayuwa ba ta ƙyale masu saurin yarda, su ne suka fi saurin nadama.

Karanta Sauran anan»

Shawarwari 20 Da Za Ku So Sanin Su

Da zan iya komawa shekaru 20, da na bai wa kaina waɗannan shawarwari guda 20.

Ga su kamar haka:

1. Lokaci bayan lokaci ka riƙa gwada sabbin al'amurra. Ka koyi wata sabuwar ƙwarewa, ka karanta wani littafi, ko ka yi tattaunawa mai ma'ana da wani masani, da sauran su. Manufar ita ce ka ci karo da sabbin ra'ayoyi tare da faɗaɗa tunaninka wanda hakan zai ƙara maka ƙarfin gwiwa ya zaburar da kai domin cimma burinka a rayuwa.

Shawarwari 20 Da Za Ku So Sanin Su

Hoto: Wallpaper

2. Duk wani abu da kake sha'awar yi, kada ka ji tsoron ɗaukar taku na farko. Domin taku na farko shi ne mafi muhimmanci, kuma da zaran ka ɗauke shi sauran abubuwan da kake son fahimta za su fara bayyana gare ka.

3. Ka ɗauki darasi daga nasarorin wasu mutane, wannan yana daga cikin hanyoyi mafi sauƙi domin isa ga taka nasarar. Kada ka tsaya ƙirƙirar sabuwar hanya, kawai ka bi hanyar da wasu suka bi suka kai ga abin da kake nema.

4. Abin da kake faɗa wa duniya game da kanka shi za ta gaskata. Kada ka ji tsoron bayyanar da kanka ko aikin da kake yi a duk inda ka shiga. Ka tallata kanka da kyau kuma ka ƙawata aikin da kake yi har duniya ta san ka kuma ta san sana'arka.

5. Nasara sakamako ne na aiki tuƙuru tare da jajircewa da kuma dogon yunƙuri na tsawon lokaci. Ka fara daga inda kake da kaɗan da kaɗan har ka gina gobenka domin nasara ba ta samuwa ga mutum a yini guda.

6. Ƙalubale na farko da za ka fuskanta a tafiyarka shi ne kanka. Ranar da ka iya kawar da shakku, tsoro, da munanan tunani daga zuciyarka to a ranar ka zama mutum mai 'yanci.

7. Da sannu za ka rasa wani sashi na abokai da makusanta a lokacin da ka fara aiki tuƙuru don canza rayuwar ka. Ba kowa ne zai ba ka gudunmawa ba ko ya taimake ka, amma kada ka damu domin ita rayuwa ta gaji haka.

8. Za ka yi kurakurai masu yawa a farkon tafiya, amma hakan ba laifi ba ne. Babban shaida ne akan cewa kana koyo da kana samun cigaba a cikin tafiyarka.

9. Ka girmama abokanka, da tsararrakinka, da dukkan mutanen da kake haɗuwa da su akan hanyarka domin kowane mutum da ka haɗu da shi yana da rawar da zai taka a cikin rayuwar ka.

10. Yawancin mutane sun yi nisa wurin shagaltuwa da al'amurran gabansu da ba sa iya lura da kai. Ka sani cewa babu wanda ya ke lura da kai balle ya damu da abin da kake yi don haka ka cire wannan tunanin a ranka ka aikata abin da ya dace.

11. Yi ƙoƙarin zama mai cikakken ƙwarewa a cikin sana'arka ko aikinka ko fasaharka. Koda ba ka iya kai wa ga wannan ƙwarewar ba, za ka kasance cikin waɗanda ake buga misali da su a cikin duk abin da ka sa a gaba.

12. Saɓanin yadda da yawa daga cikin mutane suke tunani, babu wata illa a ƙoƙarin karkato da hankulan mutane zuwa gare ka. Amma kuma ya danganta da burinka da manufofinka na yin hakan.

13. A gaskiyar lamari sai ka iya janyo hankulan mutane kafin su san da kasuwancin ka, da ra'ayoyinka, da kuma baiwar da kake da ita. Don haka, ka nemi hankulan mutanen da suka dace, kuma ta hanyar da ta dace.

14. Daga cikin halaye mafi muni da za su dakatar da kai daga cimma burinka shi ne jinkiri. Kada ka tsaya jiran gobe ko an jima, ka aikata duk abin da ya kamata a lokacin da ya dace.

15. Za ka samu duk irin goyon bayan da kake buƙata daga duniya idan ka kasance mai taimaka wa wasu. Ka yi farin ciki da nasarar waninka kamar yadda kake farin ciki da nasararka.

16. Babu makawa za ka fuskanci ƙalubale a rayuwarka a kowane lokaci, duk abin da ka yi kuma duk inda ka je. Babban abin da ke ƙara wa rayuwa armashi shi ne ƙoƙarin mu wajen bibiyar mafarkanmu duk da ƙalubalan da muke fuskanta.

17. Mutane halittu ne na ɗabi'a. Idan ka sare a lokacin da abubuwa suka yi wuya, zai zame maka ɗabi'a mai sauƙi ka ƙara sarewa a gaba. A gefe guda, idan ka tilasta wa kanka ka ci gaba, wannan zai taimaka maka ka gina ɗabi'a ta juriya da ƙarfin hali.

18. Abin ban sha'awa game da ƙalubale shi ne cewa a kullum akwai wani abu na darasi abin koyo a cikinsa. Amma fa sai ga masu ƙarfin gwiwar ganin hakan.

19. Rayuwa ba ta da sauƙi domin cike ta ke da gwagwarmaya da faɗi-tashi. Amma ga mutumin da yake da manufa, kowace wahala tana ƙara masa basira ne da ƙarfin hali, gogewa tare da ƙaimi wurin cimma burinsa.

20. Dukkan shafukan da kake bibiya a kafofin sada zumunta suna da babban tasiri akan tunaninka da rayuwarka. Shi ya sa wannan shafin ya maida hankali akan ilimantarwa da faɗakarwa da zaburar da ku ga manya-manyan al'amurra a rayuwa.

Ku cigaba da kasancewa tare da wannan shafin domin samun rayuwa mai inganci!

Tushe/Asali: Hausa Motivation

Karanta Sauran anan»

Sakonnin Barka Da Maraice Masu Sa Budurwa Natsuwa

A cikin almurin maraicen ranar da idona ya fara ganinki tun daga lokacin ban ƙara iya aikata komai ba tare da na sanyo tunaninki cikin raina ba.

Saƙonnin Barka Da Maraice Masu Sa Budurwa Natsuwa

Hoto: Peak PX

Marubuci:- Abdul'aziz Hamza KKR

Aikin da ke cikin zuciyata shi ne sonki. Raina ya kasantu cikin dausayin ni'imar begenki, sai tunaninki ya zamto wani ɓangare na jikina.

Na zauna tsaf domin nazarin samun dama cikin dama irin wadda na samu a lokacin da Allah ya fara haɗa mu tsakanin ni da ke.

Zuciyata tana son ki hakan ne yake ba wa idaniya damar isar da saƙonta a lokacin da na so na gan ki sai kuma ban samu damar ganin naki ba hawaye su ne matakin farko.

Barka da yamma dukkan wani tarin farin ciki ina murnar ganin ya riske ki domin ya yo silar bayyanuwar murmushin fuskarki.

Tasirin kallon fararen idanun ki sun yi nasarar ƙara dawwamar da zuciyata bisa kan alƙiblar son ki hakan shi ne ya haifar min da yawan tunaninki.

Ni dai da ke zan rayu, da son ki zuciyata ta soyu. Mun fi ta cikin sahu na marayu. Sannunki mai sufar 'yan gayu.

Jarumtakar girman haƙiƙar sonki ta yi sanadin kafa daular ɗaruruwan begenki dare da rana, da son ki nake rayuwa.

Ban son kallo ko kuma jin wani sautin zancen da ba ya tuna min da zuwanki cikin raina.

Karanta Sauran anan»

Ka Tashi Matashi

Kai Matashi! Ka tashi!

Kai matashi! Me ya sa kake zaune da jajayen idanuwa, da hawaye akan kumatunka? Zuciyarka cike da tunanin cewa wai ka haƙura ba za ka yi nasara ba.

Shin don ka kasa yau, sai ka daina mafarkin gobe?

Ka tashi matashi

Hoto: Dreams time

Marubuci:- Abdallah Aliyu Saint

Kai dai ka sani, rashin nasara ba ƙarshe ba ne, kuma nasara ba ta zuwa idan ka tsaya kana jajen gobe da jin tausayin kanka.

Ka kalli rana, kullum tana faɗuwa, amma sai gobe ta dawo da haske.

Ka kalli tsuntsaye, kullum suna fita neman abinci, kuma ba duk rana suke samu ba.

Amma har yau, ba su daina shawagi ba.

Wannan ya nuna cewa tsayawa ba mafita ba ce. Ci gaba shi ne mafita.

Idan ka faɗi yau, ka tashi gobe da ƙarin ƙarfin zuciya.

Ka ƙara tunani, ka gyara kuskure, ka rungumi sabuwar dama.

Rayuwa tana wa mai juriya albarka.

Ba sai ka yi sauri ba, sai dai kada ka tsaya.

Ka riƙe burinka da gaskiya kamar amana.

Ka dinga cewa: “Na faɗi yau, amma gobe zan tashi.”

Domin wanda ba ya tsayawa, shi ne ya kan isa inda sauran suka gajiya.

Ka tashi matashi! Ka tashi! Ka ci  gaba da gina burinka a zuciya.

Ka san cewa: gobe taka ce, idan ka daina tsoron kuskuren jiya.

A hankali wahalhalun da kake tsoro za su dawo suna ba ka dariya.

Karanta Sauran anan»

Darasin Da Ake So Ka Koya A Rayuwar Ka

Idan wata matsala tana yawan faruwa da kai, akwai wani darasi da ka kasa koyo a cikin ta. Misali idan ana yawan cutarka a kasuwanci da ciniki, hakan yana nuna ba ka tantance abokan hulɗar ka, kuma ba ka nazari da bincike kafin ka ƙulla ciniki.

Darasin Da Ake So Ka Koya A Rayuwar Ka

Hoto: Cross walk

Marubuci:- Bello Ado Hussaini

Idan kana yawan samun saɓani da iyalinka ko abokin ka, hakan yana nuna abubuwa guda biyu musamman;

Kodai akwai wata daɓi'a da kake musu cikin mu'amala kuma ba sa jin daɗin ta, kai kuma ka kasa ganewa ka daina.

Ko kuma su suna da wani hali da ka kasa fahimtar yadda za ka mu'amalance su, ko kuma ka yi haƙuri da shi.

Idan kana yawan shiga matsala da jami'an tsaro, hakan na nufin ba ka tantancewa da doka, ko kuma gane iyakokin ta.

Idan kana yawan shiga matsalar kuɗi ko bashi, hakan na nufin ka kasa tsayawa ka tantance samun ka, da kuma irin buƙatun da ya kamata ka yi, da wanda za ka haƙura har matsayin ka ya sauya, samun ka ya ƙaru.

DARASI

Da yawan lokaci mutane kan ɗauka al'amura suna faruwa ne haka kawai, ko kuma rashin sa'a ne ko ƙaddara. Amma fa da yawa akwai abubuwan da muke yi, ko muke barin su, waɗanda ke ba mu irin sakamakon da muke samu.

Don haka idan abubuwan ka suna tafiya daidai, sai ka zage damtse, ka ci-gaba da addu'a.

Idan kuma akasin haka ne, sai ka yi nazarin abubuwan da suke buƙatar sauyi, domin samun sauyin sakamako.

Allah ya sa mu dace Amin.

Karanta Sauran anan»

Sakon Soyayya Ga Budurwar Shafin Sada Zumunta

Ina fatan kin kasance lafiya kamar yadda nake a yanzu, na ji dukkanin saƙonnin zuciyarki zuwa ga tawa zuciyar. Ki sani tuni na daɗe da ganin wannan saƙon a cikin rubututtukan ki na baya gare ni.

Sakon Soyayya Ga Budurwar Shafin Sada Zumunta

Hoto: Move me quotes

Marubuci: Abba Rabi'u Matallawa

Da a ce kin ɗora sashen saƙonnina gun ki kan mizani da kin gano makamancin hakan a cikin su.

Manufar nawa saƙon gare ki domin na tonawa tawa zuciyar asirin da take ɓoyewa, amma fa ki sani ɓoyon ya faru ba don tsoro ba sai domin kwarjinin da wannan kyakykyawar fuskar taki ke yi mini.

Ina sanar da ke na daɗe da kamuwa da soyayyar ki fiye da yadda zan faɗa miki  yanzu.

Na rantse miki da iyakar gaskiyata ina san ki fiye da yadda kifi ke son ruwa. Idan da babu soyayya tsakanina da ke babu dalilin da zai saka na nemi hoton ki har kala biyu, amma fa ba anan matsalar take ba idan muka tsunduma soyayya ina za ta kaimu? Na barki lafiya.

Karanta Sauran anan»

Yadda Za Ku Fara Sana'a Ba Jari

 1. AIKIN ƘARFI 

Muna da misalai da yawa na mutanen da suka yi arziki, kuma sun fara neman kuɗi ba tare da wani ya ba su jari ba.

Za ka iya fara aikin ƙarfi, tun da ba ya buƙatar wani jari sai lafiyarka, idan ka adana wani adadin kuɗi, sai ka tsunduma cikin kasuwa.

Yadda Za Ku Fara Sana'a Ba Jari

Hoto: Deposit photos

Marubuci:- Abubakar Abba

Amma idan ka zauna ka ce kana jiran wani ya ba ka ko kana jiran gwamnati ta ba ka jari, to alama ce da take nuna ba ka shirya rufawa kanka asiri ba.

2. NEMI UBANGIDA

Kowace sana'a tana buƙatar a koye ta a wajen wanda suka ƙware a cikinta, hakan yana ba wa mutum sani mai yawa, wanda idan ya zo ya samu jarin farawa da kansa, ba zai sha wahala ba.

Don haka, ka nemi wani mutumin ko abokinka wanda yake wata harkar kasuwar, ka zama yaronsa, koda aiken ka za'a yi  ko dakon kayan kwastoma a kasuwa, ko sayo kayan aiki ko wani abu makamancin haka, babu laifi.

Idan ka yi haƙuri mutane suka san ka a kasuwar, ko wajen aikin, lokaci zai zo da za ka iya samun 'yanci.

Zama yaron wani ba ya buƙatar sai kana da jari, hasali ma ita ce hanya mafi sauƙi ma wajen fara sana'a.

Sai dai ba kowa ne yake da wannan alfarmar ba.

3. SIYAR DA KANKA

Koda ba ka san kowa ba, ko ba ka da 'yan uwa a kasuwa, wannan ba zai zama uzurin da za ka ce ka rasa abin yi ba.

Yi amfani da Shafukan Sada Zumunta, ka zama mai ƙirƙirar maƙala wanda zai ja hankalin mutane, ka tara mabiya.

Yi amfani da wannan mabiyan ka je ka samu wasu 'yan kasuwar ka nuna musu cewa kana da mutane, su dinga ba ka talla, ko tsarin affliate ne, kai kuma kana samun wani abu.

Da yawan 'yan kasuwa za su ba ka wannan damar, domin zai kawo musu kwastomomi.

Ka je ka ɗauki hotuna da kanka, ka zo Shafukan Sada Zumunta ka fara tallatawa.

Wannan ma ba ya buƙatar sai kana da jari za ka fara.

4. KA YI AMFANI DA BASIRA

Wanda Allah ya sa yana da wata ƙwarewa ko wata baiwa, shi wannan nasa mai sauƙi ne.

Abin da ya rage maka shi ne, ilimin da kake da shi, da basirar da kake da ita, da wata ƙwarewa da kake da ita, ka fito da ita duniya ta sani, ka sanya farashin kuɗi mutane su biya ka koya musu.

Da haka za ka iya samun jarin fara duk sana'ar da kake buri.

Kuma sakamakon ilimin da kake bayarwa, wasu damarmakin za su zo maka, wasu Network ɗin za su ƙullu, da haka sai ka ga ka wuce wajen.

5. KA YI KARATU

Sau da yawa rashin bincike yake hana mutane da yawa samun wasu damarmakin. Don haka ka yi ƙoƙari ka inganta iliminka, da kuma mu'amalarka.

Ka yi ƙoƙari ka dinga halartar guraren ƙara ilimi, kamar tarukan kasuwanci, da taron ƙarawa juna sani, ka dinga halartar Online Classes, daga nan za ka iya samun wata fikira da za ka iya amfani da ita wajen rufawa kanka asiri.

Karanta Sauran anan»

Gajerun Sakonnin Soyayya Irin Na Sarakai

Ranki shi daɗe hannuna a sama cikin aminci nake miki gaisuwar ban girma ga gimbiya sarautar mata, matsayinki ya kai a yaba miki.

Gajerun Sakonnin Soyayya Irin Na Sarakai

Hoto: Antonio Guillem/Dreams time

Marubuci:- Abdul'aziz Hamza KKR

Furucin furta sallama cikin karamci zuwa ga ma'abociyar kyawun suffa da kyawun diri. Ina motsawa ne da motsin da son ki yake matsar da ni cikin tsakiyar tekun ƙaunarki.

Kin hori zuciya da horon da ruhi yake hora ƙwaƙwalwata bisa irin yadda tunaninki yake yawan kawo ziyara cikin tsakiyar birnin masarautar zuciyata.

Gyara kintsi da kyau dole ne a cika miki fada yake sarauniyar da ke mulkin masarautar zuciyata. Taka a sannu yake jigon da ke jawo jerin farin cikin ruhina.

Ƙauna da son ki sun mamaye ruhina shiyasa zuciyoyinmu suke numfasawa a tare da junansu.

Sarauniya na zo gare ki da gaske zuciyata a makance, kalaman bakin ki su ne sinadarin ƙara ruruwar wutar son ki wadda ta mamaye zuciyata.

Akwai amana ni da ke babu ranar rabuwa, zahirin gaskiya ke ce wadda na zaɓa domin ki zamto ummin yarana.

Sannunki 'yar gaban goshin zuciyata. Na yi jinjina kuma na gaisheki. Burina ki zamto cikin farin ciki da tarin annashuwa, a daidai lokacin da kike karanta saƙonnina.

Karanta Sauran anan»

Mutane Nau'i 3 Ne A Rayuwa

Mutane iri 3 ne, akwai masu ƙaunar hikima, da masu ƙaunar daraja, da masu ƙaunar riba. Idan kana cikin na 3, za kai asarar biyun. Idan kana cikin na 1 za ka samu 2.

Mutane nau'i 3 ne a rayuwa

Hoto: People Images/iStock photo

Marubuci:- Bello Ado Hussaini

Plato ya ce;

1. Wasu mutane suna ƙaunar hikima wato Wisdom. Duk abin da za su yi suna neman iliminsa, tare da fahimtar dukkan abubuwan da ke kewaye da shi.

Suna yi wa rayuwa kallo na fahimta da neman dalili tare da hasashen sakamakon kowanne aiki.

2. Wasu mutanen kuma suna neman daraja da mutunci, wato Honor. Komai za su yi wannan shi ne ma'aunin su, cewa hakan zai sa su samu daraja da mutuntawa idan sun aikata abin da suke son aikatawa.

Sai dai irin waɗannan mutanen a wani lokaci, za su iya aikata wani abu wanda ba hikima a cikinsa, matsawar mutane za su girmama su idan sun yi hakan.

3. Su ne masu neman riba kawai, wato Profits. Duk abin da za su yi riba ce a gaban su, ma'ana dukiya ko wani amfani na duniya.

Irin waɗannan mutane babu ruwansu da hikimomin rayuwa, ballantana maganar mutunci ko kuma a gan su da daraja.

Idan har za su samu kuɗi, za su iya yin komai ba komai.

FA'IDA

Idan ka kasance a cikin mutane masu ƙaunar riba ko dukiya kawai, tabbas za ka rasa hikima da daraja.

Za ka iya samun kuɗin, amma a ƙarshen rayuwa, za ka gane ka yi asara babba, domin ka siyar da kanka ne, ka karɓi abin da zai ƙare ko ya zama mara amfani wata rana.

Amma idan ka zama mai hikima da bin rayuwa cikin tsari, tare da fahimtar dalilai da hasashen sakamakon ɗabi'un ka da ayyukan ka, tabbas za ka samu riba, ta kuɗi da kuma abubuwa masu amfani a rayuwa.

Hakazalika za ka samu daraja da mutunci a tsakanin al'umma, domin ɗabi'un ka da ayyukan ka, za su dinga nuna wani mutum mai cikakken hankali da hangen nesa, tare da kiyaye doka da sunnar rayuwa.

Allah ya sa mu dace Amin.

Karanta Sauran anan»

Hirar Zamani Ta Budurwa Da Saurayi A Ganin Farko

Saurayi: Tun farko fara buɗewar ƙwayar hasken ganin idanuwana ban yi tozali da kyakkyawar fuskar da ta ɗimautar da zuciyata ba sai da na fara haɗuwa da ke.

Hirar Zamani Ta Budurwa Da Saurayi A Ganin Farko

Hoto: Kieferpix/Gatty Images

Marubuci:- Abdul'aziz Hamza KKR

Budurwa: Wane ne?

Saurayi: Wani ɗan saurayi ne wanda ki kai ma sata.

Budurwa: Sata kuma? Satar me na yi maka? Kuma Wane ne kai?

Saurayi: Ni kaina ban san kaina ba sai da zuciyata ta fara ganinki, shiyasa na zo domin ki ba ni bayanan yadda nake.  

Budurwa: Bayanan yadda kake kuma? Ta ya za ka ce ba ka san kanka ba kuma kana so ka sani daga gare ni?

Saurayi: Yauwa tambayar da nake buƙata kenan daga gare ki, yanzu sai ki tsaya ki saurari batuna.

Ta ya zan iya gane kaina bayan ainihin suffar jikina ina kallonta akan tsakiyar fuskarki.

Ta ya zan iya gane kaina bayan kin tafi da dukka tunanin raina.

Ta ya zan iya gane kaina bayan gangar jikina kaɗai take yawo amma ainihin ruhina yana bin ki a duk inda kike.

Ta ya zan iya gane kaina bayan dukkan ƙofofin saduwar jini suna tare da ke.

Budurwa: Ɗan dakata da zanceka haka, na ji ka ce na yi maka sata shin wai me ne ne na satar maka ne da kake ta faman bi na a duk inda na yi?

Saurayi: Ehmmm kin saci abu mafi girman daraja da tsada a wajena.

Kin sace abu mafi saurin maida mutum rago duk tsananin jarumtar shi.

Budurwa: Kai Malam dakata haka nan ka zo ka cika ni da surutunka. Ni har yanzu na kasa gane abin da  na sace maka ka ga idan ba za ka yi bayani ba ni zan shige gida.

Saurayi: Wayyo Allah na ɗan dakata mana kar ki saka rauni da rashin kuzari a jikina ta hanyar hana ni kallon wannan fuskar taki.

Da ma ba komai ba ne kika sace mun sai zuciyata. Na yi zaton za ki fahimta tun farkon da na fara furta bayanaina a kanki to amma sai kika yi mun bazata dole sai da kika sa na fallasa sirrina gare ki.

Budurwa: Ta ya za ka ce na sace maka zuciya bayan ga ka kana magana da kanka kuma?

Hmm naku har kullum Abdul'aziz Hamza KKR.

Idan har kuna jin daɗin maƙalolin shafin nan namu, to ku hanzarta sanar da dukkan abokan ku ko ƙawayen ku da dukkan waɗanda ku sani, ku gaya musu sunan adireshin shafin nan namu domin su ma su shigo cikin shafin su dinga amfana da shi kamar yadda ku ma kuke yi a kullum a kyauta.

Karanta Sauran anan»