Mutum Mai Shiru-shiru Da Siffofin Sa

Mutum Mai Shiru-shiru ko Introvert mutum ne wanda ya kan fi jin daɗi keɓewa ko zama shi kaɗai ko zama cikin mutanen da ba su wuce biyu zuwa uku ba, kai ko mutum ɗaya ma.

Mutum Mai Shiru-shiru Da Siffofin Sa

Hoto: the psychology group

Marubuci:- Abdallah Aliyu Saint

Ga wasu ƙarin bayanai game da Introvert ko Mutum Mai Shiru-shiru, kamar haka:

1. Buƙatar lokaci shi kaɗai

Mutane Masu Shiru-shiru suna buƙatar lokaci su kaɗai don sake samun kuzari da nutsuwa bayan sun yi hulɗa da mutane da yawa.

2. Ƙarfin hulɗa

Suna jin daɗi sosai lokacin da suke tare da mutane kaɗan ko kuma tare da mutum ɗaya kawai. 

Wannan yana nufin cewa ba sa son taron jama'a mai yawa.

3. Natsuwa da shiru

Sun fi zama su yi shiru kuma sukan yi tunani mai zurfi. Yawanci ba sa son yin magana sosai a cikin taron jama'a.

4. Ƙaunar yin tunani

Suna jin daɗin yin tunani da nazari mai zurfi, kuma yawanci suna da sha'awar bincike da ƙarin sani.

5. Son aikata abubuwan bunƙasa ƙwaƙwalwa

Yawancin lokaci suna jin daɗin ayyuka irin na karatu, rubutu, zane-zane, ko kuma aikace-aikace dan bunƙasa tunaninsu.

Me ya sa Mutane Masu Shiru-shiru suke da muhimmanci a cikin al'umma?

1. Suna da dogon nazari

Mutane Masu Shiru-shiru suna da basira sosai wajen tunani da nazari, wanda yake da amfani a fannoni daban-daban na rayuwa.

2. Suna da zuzzurfan bincike

Suna da ƙwarewa a fannonin da suka shafi bincike da ƙarin sani kamar ilimin kimiyya da adabi.

3. Bayar da shawara

Suna da basira wajen shawara saboda suna nazari sosai kafin su yanke hukunci.

4. Abokan hulɗa

Duk da cewa ba sa yawan magana, Mutane Masu Shiru-shiru suna iya zama abokan hulɗa masu kyau saboda suna iya sauraron mutane sosai da idon basira kuma su fahimci mutum.

5. Mace Mai Shiru-shiru

Ta fi kowacce mace daɗin zaman aure saboda suna da matuƙar fahimta da nazartar hali da abin da mijinsu ya fi buƙata.

Shin kai Mutum Mai Shiru-shiru ne?

Idan har kuna jin daɗin maƙalolin shafin nan namu, to ku hanzarta sanar da dukkan abokan ku ko ƙawayen ku da dukkan waɗanda ku sani, ku gaya musu sunan adireshin shafin nan namu domin su ma su shigo cikin shafin su dinga amfana da shi kamar yadda ku ma kuke yi a kullum a kyauta.

Karanta Sauran anan»

Kalaman Kiran Waya Na Barka Da Asuba

Ke ce wacce na fi so a cikin zuciyata, ba na tare da niyyar yin gogayya da kowacce 'ya mace a duniya idan ba ke ba.

Kalaman Kiran Waya Na Barka Da Asuba

Hoto: peakpx

Marubuci:- Ridwan Khan Adam

Saboda ina tare da burin tana da miki rayuwata tare da gangar jikina da ruhina domin yin amfani da ni wajen cin moriyar rayuwarki ta hanyar faranta rai tare da adalci, da tausayi, da so, da ƙauna.

Karanta Sauran anan»

Kalaman Karfafa Gwiwa Na Sabuwar Shekara

Wuta ita take raba dusar ƙarfe da ƙasa, ta tsarkake shi tare da ƙara masa karfi da daraja. Wuta ita take narka zinare ta raba shi da dukkan datti, har ya zamo mai daraja kuma abun kwalliyya.

Kalaman ƙarfafa gwiwa na sabuwar shekara

Hoto: Rawpixel/Getty Images

Marubuci:- Bello Ado Hussaini

Haka kuma ƙalubalen rayuwa yana inganta ruhin Ɗan Adam, ya saita tunanin sa, ta yadda mutum zai ƙara fahimtar hikimar rayuwa da ma'anarta.

Ma'aiki sallallahu alayhi wasallam cikin Hadithi yake cewa;

"Idan Allah (S.W.T) ya so bawa, sai ya jarrabce shi, idan ya jure kuma ya jajurce, sai ya sami mafita da rabo. Abun da ya biyo baya na ƙaiƙayin zuciya kuma, idan aka yi haƙuri, kankarar zunubi ce ga mumini."

Manufa anan shi ne kada mu karaya a kowanne hali, mu kasance masu fata nagari, tare da kyautata zaton samun sauƙi daga kowanne tsanani, domin bayan dukkan tsanani sauƙi ne yake biyo baya.

Marigayi BASHIR OTHMAN TOFA, cikin talifin sa "TUNANIN KA KAMANNIN KA,, Ya ce "Wahala ita ke matso ƙwazo, shagwaɓa kuma kashe shi take yi."

Jarumi DENZEL WASHINGTON, yana cewa; sauƙi ya fi zama barazana ga ci-gaba sama da tsanani.

"Ease is more threat to progress than hardship".

Ba ma fatan tsanani ga kawunan mu, ko ga 'yan uwan mu, sai dai gaskiyar magana shi ne, ba za mu iya kaucewa ƙalubale ba matuƙar muna raye, sai dai mu yi tanadi, kuma mu yi komai cikin hankali da nazari.

Sannan mu yi haƙuri da rayuwa a kowanne hali da lokaci.

Mu sani tsanani ba ya dawwama, kamar yadda sauƙi da jin daɗi su ma ba su da tabbas.

Mu yi ƙoƙarin samarwa kanmu da kanmu farin ciki yayin yalwa ko rashi, mu ƙaunaci juna, mu yi afuwa da uzuri ga juna.

Tabbas ƙauna da soyayya wani sinadari ne da yake maganin cututtukan zuciya da yawa, ya ba ta salama, ya kuma amintar da makusantan mai ita.

Fatana gare mu duka shi ne mun shiga sabuwar shekara da sabon tunani, da sha'awar koyo da saurare tare da fahimta kafin yanke hukunci akan komai da kuma kowa.

Mu sani kowa da yadda yake kallon rayuwa, kuma tunanin kowa zai iya kasancewa mai amfani a wani lokaci.

Mafi muhimmanci shi ne mu gane lokacin da ake buƙatar komai da sa'adda ake buƙatar kishiyarsa.

Mu mutunta juna da ra'ayin juna.

Mu sani Allah (S.W.T) yana ganin mu a cikin kowanne al'amari, kuma shi ne Mai hukunci, daidai da dacewa a wajensa take.

Allah ya kawo mana ɗauki ya tsayar da zuciyar mu akan imani, ya sa mu kasance masu amfani ga kawunan mu da al'ummar mu.

Kada mu cutar kada a cuce mu.

Allah ya sa mun shiga sabuwar shekara cikin ƙaunar juna da taimakon juna da afuwa ga juna, tare da kare harshen mu daga miyagun kalamai na sukar juna Amin.

Karanta Sauran anan»

Yadda Za Ka Fara Magana Da Babbar Yarinya Akan Hanya

Kada hankalin ka ya tashi, don ka ga babbar yarinya, mata sauƙin kai gare su.

Bari ka ɗan ji sirrin su. Farko dai ka daure ka tsala wankan sugar, ka watsa lumtsumeman turarenka mai daɗin ƙamshi, kar ka ji tsoro ka tunkare ta koda a kan hanya take.

Yadda Za Ka Fara Magana Da Babbar Yarinya Akan Hanya

Hoto: Chernetskaya/Dreams time

Marubuci:- Abubakar Usman

Cikin taushin murya za ka ce mata barka.

Kar ka jira sai ta amsa, kawai ka ci gaba da cewa ki yi haƙuri na san babban zunubi ne a wajen mahukunta idan aka tsaida mace mai aji tamkar ki akan hanya, amma ni ma dole ne ya sa na tsayar da ke, saboda zuciyata ta raya mini cewa wata ƙla idan na bari kika wuce ba za mu ƙara haɗuwa ba, ga shi na daɗe ina son furta miki saƙon ki da aka ba ni a cikin mafarkina mai tsantsar rikitarwa da al'ajabi.

 

Sai ka ɗan yi shiru ka ji me za ta ce, sannan sai ka ƙara da cewa yanzu me zai hana ki faɗa mini sunan ki da lambar ki, kin ga idan kin koma gida sai na kira ki na faɗa miki saƙon, saboda ina kishin duk wanda ya zo giftawa anan sai ya ga kyakkyawar kwalliyarki, idan kuma ba za ki damu ba sai na faɗa miki yanzu.

Cikin risinawa sai ka ce mata na gode.

Sai ka ɗan yi murmushin isar da saƙo a lokacin da kuka haɗa ido.

Karanta Sauran anan»

Tarihin Rayuwar Rumi (R.A) A Takaice

Suna

Jalāl al-Dīn Muḥammad Rūmī (Da Persian : جلال‌الدین محمّد رومی ), ko kuma kawai Rumi (30 Satumba 1207 - 17 Disamba 1273), mawaƙi ne na ƙarni na 13, Hanafi faqih, Masanin Islama mai girma. (Rumi a rayuwarsa ya rubuta baitoci 65,000).

Tarihin Rayuwar Rumi (R.A) A Taƙaice

Hoto: Poem analysis

Marubuci: Saliadeen Sicey

Rumi wanda ke nufin Jagoranmu, ɗaya ne daga cikin manyan mawaƙan Musulunci. Yawanci an san shi a duniyar masu magana da Ingilishi da suna Rumi. Shi masanin sufanci ne, masanin falsafa kuma mai son bil'adama. Mabiyansa sun kafa makarantar sufaye don ƙarfafawa da kuma farin ciki da koyarwarsa.

Haihuwa

An haifi Sufi Jalal al-Din Rumi Jalal al-Din Mohammad-e Balkhi a gefen daular Farisa, a Balkh a Afghanistan ta zamani (kodayake ana da'awar an haife shi a wani wuri a Tajikistan). A ranar 30 ga watan Satumba 1207. Ɗa ne ga Baha' al-Din-e Valad, wani sanannen malami kuma masanin tauhidi da kimiyya, dangin Rumi kusan su 2000 sun gudu lokacin da yake ƙarami, saboda mamayar Mongols, suka zauna a Samarkand sannan kuma suka koma Anatoliya. A 1224 Rumi ya auri Gauhar Khatun, wanda suka haifi 'ya'ya maza biyu tare. 

A cikin 1229, Sarkin Seljuk Turks ya gayyaci mahaifinsa don koyar da ilimin tauhidi a babban birnin ƙasar, Konya.

Rumi ya zama malami; Bayan an aika shi zuwa Aleppo da Dimashƙu, da bagadaza. Rumi ya kammala karatunsa na addini da shaida mai kyau, bayan rasuwar mahaifinsa, Rumi ya karɓi muƙaminsa kuma ya zama ɗaya daga cikin manyan malamai a ƙasar tun yana ɗan shekara 24.

Samun waƙoƙin Rumi gabaɗaya ya samo asali ne daga abokantakarsa da Shams al-Din Tabrizi. Wajen shekara ta 1244, Shams wani sufi mai tafiya ya isa Konya, yana wa'azi. 

Sa'adda ya je da shekaru 37 Rumi sun haɗu da malaminsa kuma amininsa Shams; Haɗuwar tasa sun canja rayuwarsu gaba ɗaya, su biyun ba kasafai suke rabuwa ba. An ce 'ya'yan Rumi da mabiyansa sun ji haushin Shams kuma suka kore shi daga garin. 

Bayan tafiyar Sham, Rumi ya jajanta wa kansa wajen rubuta waƙoƙi, rera waƙoƙi, da raye-raye, musamman ma raye-rayen da aka yi da su a kaɗe-kaɗe da ake yi wa laƙabi da whirling dervish. 

Duk da cewa kowanne ya zama madubi ga ɗan'uwansa, Shams ya ɓace ba sau ɗaya ba sau biyu ba. A karo na farko, ɗan Rumi Sultan Veled ya nemo shi ya same shi a Damascus. Ɓacewar sa ta biyu, ba a sake ganinsa ba har abada, kuma an yi imanin cewa wataƙila malaman tauhidi na addinin Islama ne suka kashe shi, ko kuma wasu mutanen Konya waɗanda suka ji haushinsa akan tasirinsa akan Rumi.

Nan da nan Rumi ya samu suna a matsayin mai hangen nesa mai cike da farin ciki, kuma ya sadaukar da sauran rayuwarsa wajen rubutu da ibada. Manyan ayyukan Rumi sun kasance tun bayan ɓacewar Shams: Diwan-e Shams-e Tabiz , ko “Waƙoƙin Shams da aka Tattara,” an rubuta su a cikin muryar Shams; Mathnawi,” wani lokaci ana kiransa da abin karantawa na Farisawa, kuma waƙar da aka fi karantawa a duniyar Musulmi; da kuma ayyuka daban-daban da suka haɗa da Fihe ma fih, "Magana"; wa'azin da aka tsara a lokuta.

Rumi ya kasance ɗaya daga cikin fitattun mawaka a duniya. Malamai irin su AJ Arberry, Franklin D. Lewis, Jawid Mojaddedi, da Reynold A. Nicholson sun fassara ayyukan Rumi zuwa tarin littafai a cikin Ingilishi.

Tasirin Rumi a zamani 

Rumi ya kasance mai mahimmanci a koyaushe. Waƙar soyayya ta Rumi ta sami tagomashi sosai a ƙasashen yamma da kuma a tsakanin sabbin matasan musulmi a duk faɗin duniyar musulmi, ga Turkawa, Afganistan, Iraniyawa, Tajik, da sauran musulmin Asiya ta tsakiya da kuma musulman Kudancin Asiya. An fassara ayyukansa a cikin harsuna da yawa a ko'ina, sauran al'adu da mutane a duniya a yanzu ma suna ƙara fahimtar Rumi sosai kuma a wasu lokuta, har ma suna ƙoƙarin bin koyarwarsa da hanyarsa.

Mene ne saƙon Rumi?

Saƙonnin soyayya, juriya, ƙarfafa kai, ci gaban ruhi, da faɗakarwa ta Rumi har yanzu suna da amfani ga masu sauraro a yau a cewar Shahram Shiva.

Kafa Ɗarikar Sufi Dervish 

Sufi whirling wani nau'i ne na zikiri wanda ya samo asali daga wasu ƙungiyoyin Sufaye, wanda har yanzu Sufaye Derwishes na Ɗarikar Mevlevi suke yi da sauran masu Bin Rifa'i-Marufi.

A matsayin nau'i na zikiri (ambaton Allah). Dervish kalma ce ta gama gari a tafarkin Sufanci; jujjuyawar wani ɓangare ne na zikiri.

Zawiyyar Mevlevi ko Mawlawiyya (Turkiyya: Mevlevilik ko Mevleviyye; Farisa: طریقت مولویه) ɗarikar Sufaye ce wacce ta samo asali daga Konya (wani birni a yanzu a Turkiyya; tsohon babban birnin masarautar Seljuk) wanda mabiyan Jalaluddin Muhammad Balkhi Rumi suka kafa. Rumi, mawaƙin Farisa na ƙarni na 13, kuma Sufi kuma masanin tauhidin Islama.

Mevlevis kuma ana kiran su da "dervishes whirling" saboda sananniyar al'adar da suke yi na jujjuyawa a yayin yin zikiri (ambaton Allah ). 

An kafa Mevlevi 1273; shekaru 752 da suka gabata Cibiyar Mevlevi ta na birnin Konya na ƙasar Turkey.

A cikin 2008, hukumar Tarihi Da Al'adu Ta Majalisar Ɗinkin Duniya (UNESCO) ta tabbatar da "Bikin Mevlevi Sema " a matsayin ɗaya daga cikin manyan abubuwan Ban Sha'awa na Al'adun Ɗan Adam.

Kimanin shekaru 752 da farawa Mevlevi al'ada ce bisa koyarwar Rumi, wanda aka fi sani da Mevlevi ko Mevlana, wanda yana ɗaya daga cikin manyan mawaƙan Musulunci.

Rasuwa

Rumi ya rasu ne a ranar 17 ga Disamba, 1273 Miladiyya yana da shekaru 66, an binne shi kusa da kabarin mahaifinsa a green dome a birnin konya. Yanzu wajen ya zama gidan tarihi na Mevlâna, wurin ya haɗa da masallaci, ɗakin rawa, da wuraren zama na dervish. Ana gudanar da Urs (biki na ruhi) kowace shekara a ranar 8 ga Disamba don tunawa da shi a Konya.

Karanta Sauran anan»

Dalilai 6 Da Su Hana Ka Fita Daga Talauci Da Matsalar Rashin Kuɗi

1. Rashin lissafi da ƙididdiga

Rashin tsari da fasalin abin da kake samu, da yadda za ka sarrafa shi bisa la'akari da buƙatu na wajibi da wanda ba wajibi ba, zai ci-gaba da jefa ka cikin rashin kuɗi da matsi, ko nawa kake samu.

Dalilai 6 Da Su Hana Ka Fita Daga Talauci Da Matsalar Rashin Kuɗi

Hoto: Poznyakov/Dreams time

Marubuci:- Bello Ado Hussaini

Dole ne kake bibiyar abin da ya shigo aljihunka, da abin da zai fita, da kuma abin da kake saran samu tare da lokacin da wannan samun shi ma zai shigo aljihunka.

NB: Ka yi nazari akan Cashflow Analysis.

2. Yawan cin bashi

Yawan karɓar bashi hanya ce mai sauƙi ta ci-gaba da zama cikin rashin kuɗi da talauci.

Duk lokacin da ka karɓi bashi na kuɗi ko kaya, hakan na nufin ka cinye kuɗaɗen da za ka samu nan gaba, ta yadda ko ka samu kuɗi, biyan bashi za ka yi da su, ga shi kuma buƙatu ba sa ƙarewa matuƙar kana da rai.

Dole ka koyi rayuwa a cikin ɗan samun ka, ka gujewa cin bashi sai ya zama dole.

3. Rashin danne zuciya akan buƙatu

Idan ka kasance duk abin da ka ga kana so sai ka saya matuƙar da kuɗi a jikinka, za ka jima a matsalar kuɗi.

Dole ka koyi danne zuciyar ka, kan wasu buƙatu da ba dole ba, koda kuwa kana da kuɗi.

Financial discipline yana matsayin jigo wajen kaucewa matsalar rashin ƙudi da yaƙar talauci.

4. Rashin tattali da tanadi

Na jima ina magana akan tsimi wato Savings. Rashin tattali ba ƙaramar matsala ba ce wajen yaƙar talauci.

Dole ya zama ka yi wani tanadi na abin da yake zuwa ba tare da zato ko shiri ba, kamar rashin lafiya ko hatsari da sauransu.

5. Rashin neman shawarar ƙwararru

Neman shawara da taimakon ƙwararru akan harkar kuɗi ba wai sai ka zama Ɗangote ba.

Duk wanda yake sana'a ko aiki akwai lokutan da yake buƙatar shawarar ƙwararru.

Idan samun ka ya ƙaru, kana buƙatar shawarar abin da za ka yi da wannan ƙarin da ka samu.

Idan samun ka ya ragu, shi ma kana buƙatar shawarar yadda za ka saisaita al'amura, domin kaucewa faɗawa matsala.

6. Maƙalewa sana'ar da ta ƙi gaba ta ƙi baya

Akwai sana'o'i da suke da wa'adi, akwai ayyukan da su ma ana wuce lokacin yin su.

Misali akwai sana'ar da za ta iya riƙe matashi, amma ba za ta ɗauki nauyin iyali ba.

Haka ma aiki akwai na matashi da na mai ɗaukar nauyi.

Akwai kuma ayyuka ko sana'ar da ba ta dace da kai ba.

Duka wannan na nufin idan ka jarraba abu, kuma ka ɗauki lokaci babu haske, kana buƙatar sauya salo, ko kuma wata sana'a ko aiki daban.

Sai dai wasu sukan maƙale akan abubuwan da suka tabbata cewa ba su da nasara ko nasibi a kansu.

Allah ya ba mu ikon kaucewa waɗannan matsaloli, ya inganta samun mu Amin.

Karanta Sauran anan»

Ɓata Lokaci A Soyayya

Ka ga yarinyar nan da kake soyayya da ita yanzu, tana da damar samun ingantacciyar rayuwa fiye da kai.

Ɓata Lokaci A Soyayya

Hoto: Vecteezy

Marubuci:- Abdallah Aliyu Saint

Wannan shi ne dalilin da ya sa bai kamata ka ƙarar da duk ƙuruciyar ka ba don gina dangantaka kawai da mace ba.

Maganar gaskiya za ta iya rabuwa da kai  cikin sauƙi ta samu wanda ya fi ka ko wanda ya riga ya shiryawa yin aure wanda mata suke yi wa laƙabi da "Ready Made"  Mutumin da ya riga  ya gama ɗora rayuwarsa akan turba, mai kuɗi da isassun kayan aiki.

Lokacin da za ta ware ta bar ka cikin mummunan talauci da tarin tunani kala-kala kamar kanka ya yi bindiga, lokacin za ka gane asarar da ka yi wajen gina soyayya maimakon gina kasuwanci ko koyon wata sana'ar hannun.

Don haka ba kyautuwa ba ne ɓata lokacinka, tunaninka, kuɗinka, akan macen da ka san ba ka da tabbacin aurenta kuma ba ka da damar aurenta. 

Ita mace ba ta da asara kamar namiji a irin soyayyar nan don kuwa ita lokaci ne kawai take ɓatawa shi kuwa namiji yana rasa abubuwa da yawa, kamar kuɗi, rashin maida hankali wajen neman kuɗin kansa.

Ka san da cewa mata suna maleji ne da maza idan ba su samu wanda ya fi wanda suke tare da shi ba, da zarar ta samu wanda ya fi ka za ta iya barin ka da karyayyiyar zuciya, da rashin manufa a rayuwarka.

Lokacin za ka gane kuskuren da ka yi na ba wa soyayya dukkan ƙarfinka da tunaninka da lokacinka, don kuwa ita ta samu wani wanda ya fi ka hali da rufin asiri tuni zai tsame rayuwarta daga ƙuncin da kuke ciki ya aure ta kai kuwa fa? Idan ba kai da kanka ba ba ka da wani mataimaki sai Lillahi.

Wannan shi ne dalilin da ya sa a matsayinka na matashi, ba lallai ba ne ka yi amfani da duk lokacinka wajen maida hankali da bin mata da neman soyayyarsu ba, kana ta bin su kamar karen da ya ga sabon ɓarawo. Mata su kansu suna ƙaunar namiji ne wanda ke da manufar da ya sa a gaba ba mai iya tsara kalaman soyayya ba kawai da yawan kiraye-kirayen waya ba.

Ka himmatu da gina kanka, ka ɗauki rayuwarka da muhimmanci, karanta littattafai, koyon sababbin abubuwa, yadda za ka haɓaka sana'arka, sa ka hannun jari da sauran su.

A ƙarshen wannan shi ne kawai abin da ba zai taɓa barin ka ba, a lokacin farin ciki da na baƙin ciki.

Karanta Sauran anan»

Kalaman Kiran Waya Na Barka Da Dare

Ke ce sarauniyata, na mallaka miki dukkan wani muƙamin da ke ƙarƙashin ikon zuciyata, ke kaɗai ce tawan, daga kanki babu canji. Ina yin ki.

Kalaman Kiran Waya Na Barka Da Dare

Hoto: Deposit photos

Marubuci:- Abdul'aziz Hamza KKR

Ke ce mahaɗar ruhi da kuma gangar jikina, akan son ki zan iya ba da dukkan rayuwata. Ina son ki.

Ke ce ruwan jikina, da taimakon sinadarin murmushin ki nake iya motsa dukkan halittar kuzarin jikina. Ina ƙaunar ki.

Ke ce ƙarfin juriyar jikina a kan son ki zan iya jure dukkan wani farmaki daga ko'ina yake. Ina tunanin ki.

Ke ce wutar lantarkin da ke rarrabuwa tana taimakon dukkan wasu jijiyoyin da ke aiki a jikina. Ina kishin ki.

Ke ce ruwan sanyin da ke narkar da dukkan wasu tafasassun ruwan zafin da ke ƙona zuciyata. Ina tare da ke.

Ke ce nasabar cancantuwar zama a cikin ruhina, da tunaninki nake kwana kuma nake tashi a cikin zuciya. Ina muradin ki.

Ke ce babbar alƙaryar birnin da yake ƙawata sansanin nahiyar zuciyata, da son ki nake alfahari a cikin raina. Ina son ganin ki.

Ke ce jinin jikina, da kulawar tunaninki ƙwaƙwalwata take iya kai saƙonnin farin cikin da ke sauka a cikin zuciyata. Ina begen ki.

Ke ce ma'ajin sirrikan da ke ƙunshe a cikin zuciyata, ba na shakkar sanar da ke sirrina domin da ke da zuciyata kuna tafiya ne a kan abu guda. Ina kewar ki.

Karanta Sauran anan»

Amfanin Zama Da Abokai Masu Mabambantan Dabi'u

Kada ka yarda a abokan ka babu mai kuɗi. Kada ka yarda a abokan ka babu mai karatu. Kada ka yarda ba ka da aboki Ɗan duniya.

Amfanin Zama Da Abokai Masu Mabambantan dabi'u

Hoto: Medium

Marubuci:- Bello Ado Hussaini

MAI KUƊI

Idan ya kasance duk abokan ka babu mai kuɗi, zai zama babu zaburarwa wato ƙwarin gwiwa.

Idan babu zaburarwa, zai zama babu zaƙuwa wato sha'awa ko buri ko muradi.

Shikenan sai ku yi zaman ku a waje ɗaya cikin talauci, har lokaci ya ƙure muku.

MAI KARATU

Idan a abokan ka babu mai karatu, to ba za ka san yadda duniya ke canjawa ba, da kuma irin damar da zamani yake zuwa da ita ba.

Sai ku yi zaman ku cikin duhun kai. 

Komai ya faru ku ce ƙaddara ce, tun da bakwa nazari.

Idan kuka ji labarin abin da ya shallake hankalin ku, ku ce ƙarya ne hakan ba zai yiwu ba.

Har zamani ya tafi ya bar ku.

ƊAN DUNIYA

Idan duk abokan ka kamammu (Reasonable) ne, kullum sai kuke ɗauka duka duniya gyararriya ce, ba mutumin banza.

Don haka za ku yi ta faɗawa tarkon mugayen mutane kuna cutuwa.

Amma idan kana da aboki Ɗan duniya, ya san komai da ɗabi'ar mutane daban-daban.

Ko wayo ya ga za a yi maka, zai gaya maka abokina ka buɗe idanun ka, kada a yi ma kure-mure.

Idan ma ta kama a yi wani rashin mutumci da ba za ka iya yi ba, sai ya tsaya maka a yi duk wadda za a yi.

Tarihi ya tabbatar da a kowacce al'umma da ta yi nasara, sai da aka samu kalolin mutanen nan guda 3 a cikin ta.

Kuma kowa ya ba da irin gudummawar da shi kaɗai zai iya bayarwa.

A ci-gaba da nazarin rayuwa, Allah ya sa mu dace, kuma idan mun dace mu dafe.

Karanta Sauran anan»

Kalaman Kiran Waya Na Barka Da Yamma

Idan ina zaune babu abin da yake saurin kawo mini ziyara irin tunaninki. Na ji masoya na kuka  a kan soyayya wahala ce, ni kuma tun lokacin da na yi arba da ke na ji na shiga cikin jerin  sarakunan da ke alfahari da kansu a fagen soyayya.

Kalaman Kiran Waya Na Barka Da Yamma

Hoto: Deposit photos

Marubuci:- Abdul'aziz Hamza KKR

Tunaninki yana zuwa ne daga can cikin tsakiyar zuciyata shi ya sa nake furta haruffan kalmomin sunanki a farkon zancen haruffan da ke zuwa a farkon sautin muryar da ke neman ɗaukin gaggawa daga zuciyar da ta fi kowacce zuciya tausayi da tausayawa.

Ki sani so wani abu ne na musamman wanda misalta shi zai zamo aiki na musamman, tasirinsa yana tafiya ne a lokacin da ka samu daidai ko kuma akasin daidai.

Haƙiƙa son ki yana ƙara fahimtar da ni ilimin sanin mene ne haƙiƙanin so? Sai dai har yanzu akwai wasu darussa na musamman waɗanda zuciyata take fahimtarsu daga zuciyarki.

Ba zan gajiya ba wajen lissafin ranakun zuwan soyayyata a gare ki ba, ni dai fatana kawai ki ba ni gurin kwana.

Lambunan sanyi masu cike da kayan alatu na musamman waɗanda suke ɗauke da ƙawatattun furanni koraye, kowannensu yana ɗauke da tambarin haruffan zanen sunanki.

Fara'ar farin ciki mai ɓuɓɓugowa cikin sautin ajiyar lafuzza masu sanyi waɗanda suke fitowa daga zuciyarki.

Ban san mene ne daɗin soyayya ba? Sai lokacin da na yi arba da ke.

Ban san daɗin rayuwa ba sai da na haɗu da ke.

Ina kallon kaina mai sa'a tun lokacin da na yi  sa'ar samun wadda ta fi kowace 'ya mace sa'a a rayuwa.

Karanta Sauran anan»

Farashin Komai A Duniya

Komai ka gani a duniyar nan to da farashin sa, kodai ka biya nan take, ko kuma a biyo ka bashi, amma dai dole sai ka biya.

Farashin Komai A Duniya

Hoto: Dreams time

Marubuci:- Abdulfatah Yakubu

Kamar haka rayuwar matashi take, wani kuskuren idan ka yi shi, nan take za ka girbi abun da ka shuka, wani kuma zai bibiye ka ne, wata ƙila ma sai girma ya kama ka, sannan ne za ka girbi kayan ka.

Duniya ba ta ɗaga ƙafa. Ka shuka abun da ba za ka yi nadamar girbar sa ba.

Karanta Sauran anan»

Wasikar Farko Ga Budurwa Mai Kwarjini

Sallama da fatan buɗewar ƙofofin farin ciki da nishaɗi gare ki, tare da farin ciki mai kima da daraja ga ɗiyar girma da daraja a wajena.

Wasiƙar gabatar da soyayya ga macen da kake matuƙar jin nauyinta

Hoto: Stock Adobe

Marubuci:- Sadik Ebra

Ɓoyayyen sirri ne zan bayyana gare ki, saboda nazarin da na yi da kuma shawarwarin da na samu a kanki.

Dukkan bishiyoyi da tsuntsaye tare da ruwan sama, duk Allah ya halicce su ne don su zama jin daɗi ga rayuwar Ɗan Adam, numfashi da lafiya duk ba a sayensu saboda sun zama dole ga rayuwa, haka ita ma soyayyar gaskiya ba a sayenta baiwa ce daga Allah.

Yanzu idan na sanar da ke cewa kin ɗauki kaso mafi tsoka wajen sanya ni farin ciki ya za ki ji?

A duk sa'adda muka haɗu koda a hanya ne kwarjininki kan bugi zuciyata, ta yadda ban iya haɗa idanuwana da naki.

Sau da yawa sai na ji murmushi ya cika fuskata a duk lokacin da nake tuno ki, me ya sa hakan?

Ni dai na san a kullum ina yaban halayenki, musamman sanin girman mutane da kulawa da su, amma idan na ce a yanzu haka sunan ki ne na fi yayi da yawan ambato a zuciyata ya za ki ji?

Ki ba ni maganin damuwata ma'ana ki mallaka mini  zuciyarki, hakan kaɗai zai kawo waraka gare ni.

Karanta Sauran anan»

Abubuwa 10 Da Ake So Ku Yi A Sabuwar Shekara Don Samun Ci-gaba

1. Ka yi ƙoƙari ka inganta aljihunka, rayuwa ba kuɗi akwai takaici da wahala.

2. Ka cire tsoro ka jarraba wani sabon abun ko za ka dace.

3. Ka rage dogaro da abokai da 'yan uwa, ba koyaushe za su iya taimakon ka ba.

Abubuwa 10 Da Ake So Ku Yi A Sabuwar Shekara Don Samun Ci-gaba

Hoto: 123RF

Marubuci:- Bello Ado Hussaini

4. Koda wani ya ɓata maka, ka yi ƙoƙari ka hana kanka yin gaba ko ƙiyayya da shi.

Gaba da ƙiyayya suna hana mutum yin tunani yadda ya kamata, har ya cimma manufarsa.

5. Ka koyi yin afuwa, koda ba za ka sake yarda da mutum ba.

6. Duk mu'amalar da za ka yi, ka yi cikin gaskiya. Allah yana taimakon kasuwanci ko duka aikin da aka yi tsakani da Allah.

7. Kyautata zato yana da muhimmanci, amma kada ka bari ka zama sakarai. 

Ka dinga kulawa da manufar mutanen da kake mu'amala da su.

8. Ka rabu da hassada da ƙyashi, domin ita hassada ɓata lokaci ce, ba ta hana wanda kake yi wa cin nasara.

9. Idan kana son wani abu ka tashi ka nema, fata ba ya kawo sakamako sai aiki.

Idan ba ka gane wani abu ba, ka tambaya domin zato yana shigar da mutum cikin ruɗani.

10. Ka koyi haƙuri ka koyi jira, komai yana da lokacin da Allah ya ajiye masa.

Allah ya sa mun shiga sabuwar shekara a sa'a da imani da lafiya da mutunci da kuɗin kashewa Amin.

Karanta Sauran anan»

Kalaman Kiran Waya Na Barka Da Rana

Ke ce hasken raina, ke ce jina, ganina da duk wani abu nawa, son ki daga Allah ne, a lokaci ɗaya da ganin tsararren hotonki na ji kibiyar son ki ta ratsa ruhina. Ke kaɗai ce a gare ni da zuciyata, son ki azimun ne. Ina son ki da gaske.

Kalaman Kiran Waya Na Barka Da Rana

Hoto: Every pixel

Marubuci: Imran Musa Jahun

Amincin Allah Ya tabbata a gare ki jinin jikina. Da soyayyarki ilahirin jiki na yake motsi, sanyi ko zafi hakan ba ya sanya ni kasalar kallon hotonki, tsanani ko azaba ba sa sanyawa na rufe bakina da ambaton kyakkyawan sunanki. 

Tabbatuwa mafi bayyanuwa a raina shi ne soyayyarki. Ƙaƙƙarfar iskar son ki ta lula da ni cikin sararin samaniya ta yadda ba na hangen duk wata 'ya mace face ke, babu wata juriya ko ƙarfi da ke wanzuwa gare ni face da ƙarfin ambaton harafofin sunayenki.

Idanuwana sukan makance na rasa ji da gani a duk sa'adda kyakkyawar surar jikin ki ta sauka a idanuwana, sautin muryarki ya kan narkar mini da zuciya har na ji kunnuwana sun gaza tantance zaƙin muryarki illa iyaka ta fi duk wani sauti zaƙi da daɗi. 

Bakina ya kan zama tamkar idanuwana a buɗe a duk sa'inda yalwataccen murmushin ki ya bayyana a gare ni.

Ƙafafuwa da hannayena ba sa iya ɗaukar jikina a duk lokacin da kika furta min lafiyayyun kalamanki. Ki so ni mai kyau!

Karanta Sauran anan»

Abubuwa 10 Ba Ku Buƙatar Su A Sabuwar Shekara

Waɗannan su ne abubuwan da ya kamata ka zubar da su a wannan sabuwar shekarar, kada ka ci-gaba da tafiya da su.

Ga su kamar haka:

1. Rabon ka ba ya tsere maka

Wanda ya tashi tsaye ya nema Allah zai taimake shi ya samu.

Abubuwa 10 Ba Ku Buƙatar Su A Sabuwar Shekara

Hoto: Window would

Marubuci:- Bello Ado Hussaini

Wanda ya kwanta kuma sai abin da hali ya yi. Don haka ka tashi ka nema, kada ka jira lokaci.

2. Shugabanni ba sa son taimakon na ƙasa

A wannan ƙarnin da muke ciki shugabanni musamman irin na Nigeria ba ruwansu da kai, ko ka yi nasara ko akasin haka. Don haka ka tsara rayuwar ka cikin irin damar da kake da ita, ka kuma zage damtse wajen kyautata matsayin ka (Personal Development) ka nemi taimakon Allah (SWT).

3. Ƙoƙarin burge mutane

A mafi yawan lokuta abubuwan da kake yi domin burge jama'a kanka kawai kake burgewa. Wanda kake ba wa sha'awa ba ya buƙatar ka sauya komai game da kanka.

Wanda ba ka burgewa kuma kome ka yi ba za ka burge shi ba.

4. Kuɗi ba komai ba ne

Tabbas ba mu zo duniya domin neman kuɗi ba, sai dai da yawan abubuwan da muke buƙata domin mu rayu cikin mutunci da sanin ya kamata, talauci abokin gabar su ne.

Wadata tana sa mutum ya tsare mutuncin sa, ya kiyaye cin haram.

Wani lokaci hatta ibada ta fi tsayawa idan kana cikin hayyacin ka.

Don haka ka dage ka nemi kuɗi.

5. Raina sana'a

Har yanzu akwai waɗanda suke ganin sun fi ƙarfin wata sana'a saboda wasu dalilai nasu, amma fa ba su wuce maula da roƙo ba.

To ka sani yadda Nigeria ta ɗauki zafi yanzu, mai taimakon a baya, shi ma yanzu taimakon yake nema.

Don haka ka kama sana'a komai ƙanƙantar ta.

6. Zage-zage da shirme a shafukan sada zumunta 

Ka sani duk abin da kake yi a shafukan sada zumunta mutane suna kallon ka, kuma da yawa ba za su yi maka magana ba amma duk ranar da mu'amala ta haɗa ka da su, za ka karɓi sakamakon ayyukan ka a hannun su. 

Gwargwadon yadda ka nuna waye kai. Don haka ka saisaita mu'amalar ka a cikin wannan sabuwar shekara.

7. Wasa da alaƙa da raina mutane

Duk wanda ka haɗu da shi a rayuwa, ba ka san hikimar Ubangiji game da hakan ba.

Ta yiwu shi ne mai taimakon ka a rayuwa, kuma komai rashin matsayin sa.

Da yawan lokaci za ka raina matsayin mutum, kuma akwai sirri a tare da shi ko kuma ka kalli wani abu a tare da mutum, amma holoƙo ne, shi ma ta kansa yake yi.

Don haka ka girmama kowa, ko domin Allah (S.W.T) ya yi umarni da hakan.

7. Mummunan zato da yaɗa sharri

Kusan yana neman zama al'ada da zarar wani abu mara daɗi ya faru, sai ya zama abin yayi.

Kowa ya yi ta yaɗawa ba tare da tabbacin gaskiyar al'amarin ba.

Irin wannan ɗabi'a tana cutar da mai yin ta ba tare da ya sani ba.

Domin zaton ka yana shafar tunanin ka, kamar yadda tunanin ka yake zama aikin ka, da kuma makomar ka.

9. Kwaikwayo da yayi

Duk abin da ka ga wani yana yi ba ka san manufar sa akai ba.

Idan ka shiga kwaikwaya ba tare da ilimin abin ba, kana iya samun kanka a inda ba ka so.

Don haka kana iya kwaikwayo, amma inda ya dace da manufar ka.

10. Wasa da addu'a

Duk abin da ka saka a gaba, kada ka yi wasa da addu'a. Akwai abin da idon ka da hankalin ka suke gani, akwai abin da hangen ka ba zai je kansa ba.

Addu'a ce kaɗai za ta magance maka abin da ya fi ƙarfin tunani da hankalin ka.

Karanta Sauran anan»

Gajerun Kalaman Soyayya Masu Sanyaya Zuciyar Masoya

Masoyina, kai ne wanda ka dace da sarautar zuciyata don haka na ba ka ita kyauta.

Gajerun Kalaman Soyayya Masu Sanyaya Zuciyar Masoya

Hoto: Jordygraph deposit photos

Marubuci:- Abba

Fuskar ki a kullum haske take ƙara yi musamman idan kina murmushi. Idan ki ka yi fushi sannan ne kike daɗa ƙara kyan gani.

Zan iya aiwatar da komai har idan ina jin kalaman ka masu sanyaya zuciya.

Masoyiyata a duk lokacin da na ji muryar ki na kan samu natsuwa a zuciyata.

Na yarda da kai na aminta da kai don haka na mallaka maka kaina.

Murmushin ki gare ni ya fi a ba ni kyautar sabuwar mota da gida.

A kullum ba ni da burin sauraren wani zance idan ba naka ba.

Karanta Sauran anan»

Karanta Addu'a Idan Aka Ga Wani Wanda Wata Masifa Ta Faɗa Masa

الْحَمْدُ للهِ الَّذِي عَافَانِي مِمَّا ابْتَلاَكَ بِهِ، وَفَضَّلَنِي عَلَى كَثِيرٍ مِمَّنْ خَلَقَ تَفْضِيلاً.

Alhamdu lillahil-lazee 'afanee mimmab-talaka bih, wafaddalanee 'ala katheerin mimman khalaqa tafdeela.

Addu'a Idan Aka Ga Wani Wanda Wata Masifa Ta Faɗa Masa

Hoto: Pirani risk

Dukkan yabo ya tabbata ga Allah, wanda Ya amintar da ni daga abin da Ya jarrabce ka da shi (na masifa), kuma Ya fifita ni a kan da yawa daga cikin waɗanda Ya halicce su fifitawa.

Karanta Sauran anan»

Kyawawan Kalaman Soyayya Na Barka Da Sabuwar Shekara

Ɗago fuskarki kaɗan na kalle ki, tsananin shauƙi da annashuwa suna fitowa daga tsakiyar kyawawan haƙoranki, babu inda suke yada zango sai a cikin zuciyata.

Kyawawan Kalaman Soyayya Na Barka Da Sabuwar Shekara

Hoto: Dreams time

Marubuci:- Abdul'aziz Hamza KKR

Na yi shiru na shiga cikin wata duniya ta musamman ba komai nake yi ba sai tsananin tunaninki.

Murmushi da shauƙi yana mamaye zuciyata a daidai lokacin da nake tunawa ke nake so.

Kamannin jikina suna bayyanar da nuna yabawa da ƙwarewarki wajen iya kwantar da dukkan wata damuwata.

Aminci a gare ki tare da gaisuwa mai fitowa cikin inuwar zuciyar da ke miki soyayyar gaskiya zuwa gare ki. Barka da sabuwar shekara.

Ke ce alƙadarin alƙaryar da ke ƙawata farin cikin da ya kewaye ruhina.

Na hangi wani sinadari daga cikin tsakiyar idanuwanki wanda har yanzu yake yawan zo mini har cikin baccina.

Allah Ya halicci halittarki cikin ƙawatacciyar ni'imar halittar da idona bai gano wata tamkar ki ba.

Kullum ƙara haske kike yi, ni kuma zuciyata ƙara sonki take yi, ba na buƙatar wurin hutu wanda zai sa na rage tunaninki.

Na ɗauki son ki na ɓoye shi a cikin zuciyata, ba na buƙatar wani abu ya zo kusa da shi domin ina fama da tsananin kishinki a cikin raina. Barka da sabuwar shekara.

Karanta Sauran anan»

Abubuwa 6 Da Za Su Sa Ka Yi Arziki A Sabuwar Shekara

KAR KA YARDA DA TALAUCI!

Shekarar 2024 ta wuce, amma har yanzu tarin matsalolinka suna nan ba su tafi ba, kuma girma yana ƙaruwa a kanka, burika da nauye-nauye  suna ƙaruwa.

Abubuwa 6 Da Za Su Sa Ka Yi Arziki A Sabuwar Shekara

Hoto: Freepik

Marubuci:- Abubakar Abba

Kasancewarka a Nigeria musamman ta Arewa, ya gadar maka da wasu tarin ƙalubale wanda ba a yi shawara da kai ba, da wasu matsaloli wanda ba ka shirya musu ba, da ƙarin wasu nauye-nauyen da al'umma da iyalai suka ɗaura maka wanda ya zama dole idan kana son zaman lafiya ko kana son ka tsira da mutumcinka, to ka yi ƙoƙarin ɗauka koda kuwa ba ka da ƙarfi.

Duk wata hanyar nasara da fita daga ƙangin talauci an saka mata shinge tun kafin ka zo duniya, hakan ta sa ya zama dole ka yi aiki tuƙuru ko kuma kai ma ka zama tamkar ragowar mutanenka.

Yawancin mutanen yankinka sun fito ne daga iyalan da ba a tanadar musu da wata dukiya wanda ake jira su yi amfani da ita ba lokacin da ƙarfinsu ya kawo, a'a, ana jiran su ne ma idan sun yi ƙarfi su nemo hanyar da za su fitar da gajiyayyu a dangin su daga ramin talauci, su ɗauki nauyinsu da na yaransu, idan sun gaza; a aibata su.

Idan an ga alama sun sami wata dama komai ƙanƙantarta, kuma ba su ɗauki wancan nauyin ba, nan ma zaginsu ya zama aikin lada. 

Dangi suna tilastawa mutum ya ɗauki nauyin da ba nasa ba koda kuwa za'a taru a faɗi ƙasa wanwar.

A lokacin da ka fito neman arziki, al'umma ita ma ba za ta ba ka dama cikin sauƙi ba, tun a makaranta da unguwa za'a fara cusa maka tunanin ka zama talaka kawai ka huta, ai talaka ya fi mai kuɗi kwanciyar hankali, talakawa su ne mutanen kirki, da sauran zantuttuka da adabi wanda za su hana ka motsi a lokacin da ya dace.

Idan ka tsallake wannan kuma, ka ce kai lallai sai ka yi abin da zai fitar da kai daga talauci, nan ma ba za ka samu gwamnatin da za ta ba ka hanya mai sauƙin bi ba, ba ka da jari, gwamnati ba ta tanadar maka da shi ba, komai kuwa kyawun ra'ayinka ko fiƙirar ka.

Bankuna ba za su ba ka jari ba yawanci, sai sun haɗa maka da kuɗin ruwa (Interest), wanda kuma addininka ya haramta maka.

TO YAYA ZA KA YI?

1. KA YI FAƊA DA TALAUCI

Kar ka yarda ka zama talaka, kar ka yarda talauci ya birgeka, kar ka yarda da duk wani abu wanda zai hanaka arziki.

2. KA NEMI HANYAR FITA DAGA TALAUCI TABBATACCIYA

Wannan hanya ita ce, ka samu wata matsala wadda al'umma suke fama da ita, kuma suke a shirye su bayar da kuɗi a kanta, ka warware musu ita, su biyaka kuɗi masu kauri. (Entrepreneurship).

Wannan ita ce hanya sahihiya wadda aka gwadata kuma ake gwadawa kuma take fitar da mutane daga layin talauci take kai su layin arziki da wadata.

Amma fa ka sani, wannan hanya ba sauƙi ne da ita ba, sai dai tabbas hanya ce mai ɓullewa.

3. KA GYARA TUNANINKA

Wannan shi ne babban abin da zai taimakawa rayuwarka, ka cire duk wani tarkacen tunani wanda yake hanaka arziki, ko wanda yake hana ka bin hanyar tsira da mutunci, ko wani tunanin da yake nuna maka cewa ba za ka iya fita daga talauci ba.

Wannan kuma ba zai faru ba sai kana neman ilimi kana karatu.

Dole ka yi karatu, dole ka nemi ilimin addini ingantacce da kuma ilimin rayuwar duniya, ka kula, ilimi na ce ba Certificates ba, yawwa.

4. KA GINA KANKA, KAFIN KA GINA GIDA

Idan ka taso a cikin irin wancan yanayi da na ambata da farko, to lallai ba ka da wani abu da zai taimakawa rayuwarka kamar ka yi ilimi.

Gina kai anan yana nufin, ka yi ilimi, ka gina tunani mai inganci na rayuwa, ka ƙulla alaƙa da masu ilimi da masu arziki, da masu tunani irin wannan.

Ba ruwanka da sharholiya, ko fantamawa ko son birge mutane, wannan duk hanyar zama a cikin talauci ce.

5. KA YI TSANTSENI

Tsantseni anan yana nufin, duk abin da ka samu na kuɗi ka tabbata ka kashe shi ne a kan abin da zai inganta rayuwarka, kamar sayen littafin da zai taimakawa tunaninka, biyan kuɗin makaranta, ko zuwa halartar wani horo, ko wani taron kasuwanci ko wani abu makamancin haka.

Sannan kuma, ka yi ajiya (savings) domin amfanin kanka, ba domin ankon biki ba, ko shaddar sa wa a walima ko bidiri, ko kayan sallah ba, a'a, sai dai domin gina kasuwanci, gina jarin fara wata sana'a ko domin neman ilimin ci gaba.

6. KA KARANTA TARIHI

Wannan shawara ce da zan ba wa duk wani mai tasowa, kar ka yarda ka zauna ba ka da tarihin mutanen ƙwarai, wanda za ka koyi abin arzikin da suka yi a rayuwarsu, sannan za ka samu ƙwarewa ta musamman kan yadda za ka ɓullowa al'amuran rayuwa.

Tarihi zai taimaka maka sosai wajen ba ka ƙwarin gwiwa ka tunkari duk abin da ka sanya a gaba, koda kuwa wasu suna maka ganin cewa za ka gaza.

Tarihi zai ba ka fitila mai haske a wurin da mafi yawan mutane suke ganin duhu.

Tarihi zai ba ka taswira a inda mutane da yawa suke ɓacewa.

Tarihi zai ƙwace ka a wurin da mutane da yawa suke halaka.

Wannan shawara ce da zan ba wa duk wani masoyina da Allah Ya raya shi har ya ga wannan sabuwar shekarar ta 2025.

Kar ku manta, kullum da safe ana yin addu'ar neman tsari da talauci, sannan kuma a yi aikin korar talauci.

Da yammaci ana addu'ar neman tsari da talauci, sannan a yi shirin yadda za'a a yaƙe shi da safe.

A dage, kar a yi sanya, Allah Ya ba mu nasara akan talauci, amin.

Muna addu'ar Allah ya haɗa mu da duk wani alheri da wannan shekarar take tare da shi, Ya kare mu daga duk wani sharri a cikin wannan shekarar da ma wasu shekarun masu zuwa, Amin.

Karanta Sauran anan»

Gajerun Sakonnin Soyayya Na Barka Da Sabuwar Shekara

Na san ba na iya ba ki duniya, amma kuma zan iya ba ki rayuwa da zuciyata. Ina son ki fiye da yadda nake buƙatar ruwa lokacin buɗa baki.

Gajerun Sakonnin Soyayya Na Barka Da Sabuwar Shekara

Hoto: Public domain pictures

Marubuci:- It'z Nazeephancy DH

Tausayi gare ki masoyiyata, kin zama madubin kallon idaniyata da zuciyata, tunaninki a ƙwaƙwalwata, ina son ki da duka soyayyar zuciyata.

Tafiya da masoyin gaskiya ita ce tafiyar da ke saurin kawo farin ciki a zuciya. Ina sonki, ina ƙaunar ki masoyiyata haƙiƙa ke ce halittar da ke saurin kawo farin ciki a zuciyata.

Zancen farko cikin izinin sarkin farkon da ba ya da na biyu ma'ana sarkin da ya halicci kyau sannan ya sanya shi ga kyakkyawar halilta mai hankali da natsuwa kamar ki.

Saƙon zuciya daga zuciya zuwa zuciya mai tausayi, zuciyar da ta yarda samu da rashi duk na Ubangin bayi ne, ke nake so kuma nake ƙauna a kowacce rana. Ke ce masoyiyata mai share mini kuka.

Aminci a gare ki yake kyakkyawa mai kyawun fasali, zuciyarki da jikinki duk mai kyau ne, ina son ki fiye da son da nake ma lafiyar jikina. Barka da sabuwar shekara.

Rai da zuciyata duk mallakinki ne gimbiyata, ke ce abar so na kuma ke ce abar yabona dare da rana, da soyayyar ki nake yin numfashi ina ƙaunar ki fiye da rayuwata.

Mene so idan babu ke Gimbiyata? Ina son ki domin ke ce rayuwata kuma ke ce farin cikina sai da ke nake iya fahimtar komai a duniya. Ke na fi ƙauna.

Karanta Sauran anan»

Abubuwa 11 Da Za Ku Fara Yi A Farkon Sabuwar Shekara

1. Mu yi nazarin 2024, nasarorin da muka samu, da kurakuran da muka yi.

2. Mu mayar da hankali sosai wajen fahimtar kurakuren da muka tafka, da nufin gano musabbabin su, da yadda za mu kaucewa maimaita su a 2025.

Abubuwa 11 Da Za Ku Fara Yi A Farkon Sabuwar Shekara

Hoto: Good housekeeping 

Marubuci:- Bello Ado Hussaini

3. Mu yi duba sosai akan abubuwan da suka fi cinye mana lokaci, mu ware waɗanda ba sa amfanar da mu, domin maye gurbin su da ayyukan da suke tallafar rayuwar mu.

4. Mu yi nazarin alaƙar mu da jama'a da nufin ƙara kusantar mutane na ƙwarai musamman waɗanda za mu koyi wani abu daga gare su (Mentors). Mu zare jikin mu daga mutanen da za su iya gurɓata rayuwar mu ko daƙile ci-gaban mu.

5. Ga wanda iyayensa suke raye, mu ƙara kusantar su tare da ƙoƙarin ba su farin ciki, hakan babban dafa'i ne. Kuma zai ƙarawa rayuwar mu albarka.

6. Sakamakon canjin rayuwa da aka samu, dole ne mu binciki yanayin samun kuɗin mu, tare da duba hanyoyin da za mu inganta neman mu, ko ƙara wasu hanyoyin samun kuɗin shiga.

7. Dole ne mu yi watsi da ɗabi'ar nuna isa da ƙasaita mara dalili, mu daina raina kowacce sana'a, matsawar za ta kawo kuɗi na halak.

8. Mu mayar da hankalin mu kan ƙanana da matsakaitan sana'oi waɗanda al'umma ta fi buƙata, akwai sirri da kuɗi mai yawa ga wanda ya fahimci alfanun ƙananan sana'o'i na gama gari.

9. Wajibi ne kowa ya ƙirƙiri asusu na ajiya, ya kuma tabbatar yana ɓoye wani abu komai ƙanƙantar samun sa, saboda ɓacin rana da larurori na bagatatan.

10. Kada mu ji kunyar tattauna matsalolin mu da waɗanda suka dace domin neman shawara ko shiriya (Guidance) don fita ko kaucewa matsalolin da suka dame mu.

11. Mu dinga samun lokacin nishaɗi muna jingine wasu matsalolin ko damuwa domin inganta lafiyar ƙwaƙwalen mu da samawa zuciyoyin mu sauƙi.

Karanta Sauran anan»

Kalaman Soyayya Na Asuba

Ke ce azancin kowanne bigiren hasken da yake ƙara haskaka fadar duniyar masoya, ra'ayina ne kallonki haka zalika ra'ayin kowa ne begenki domin kin cancanta kuma kin dace a daidaita kowanne harafin kalmomi da ambaton kyakkyawar surarki.

Kalaman soyayya na asuba

Hoto: Pinterest

Marubuci:- Yaron MLM KD

Da ke zan shiga taron gudanar da soyayyar gaskiya domin  gabatar da kowanne harafin annurin da yake cikin hasken kyawawan idanuwanki.

Ke ce sarauniyar da nake kishi.

Ke ce tauraruwar cikin ƙalbina.

Ke ce zinariyar da nake tattali da kulawa.

Ke ce kyakkyawar da nake alfahari da ita.

Ke ce autar da ke cikin fadar zuciyata.

Ke ce sinadarin hasken idanuwana.

Sha bege da kirari a cikin kalamaina.

Ke ce kowanne nau'in farin cikina.

Ke ce ma'abociyar kowanne murmushina.

Ke kika zamo jigon nishaɗina a soyayya.

Da ke zan kasance a kowane yanayi.

Farkon kallon da na yi miki shi ne cikakken bayanin shigowarki a cikin ƙalbina. Asalin kyawunki gami da haskenki shi ne lantarkin kyakkyawar kwalliyar da take bayyana annurin idanuwanki.

Tsarin sautin amon tattausar muryarki ya zarce ayarin kalmomin lafazin da zan iya furtawa ma'abocin sauraro, diri da haibarki su ne misalin kamannin kyakkyawar Gimbiyar da za'a kirata Sarauniyar masarautar birni da karkara.

Karanta Sauran anan»