Yadda Za Ku Gane Budurwar Ku Tana Amfani Da Ku Ne Ba Son Ku Take Ba

Abubuwa biyar daga Psychology wanda indai budurwarka na yi maka su ba son ka take ba kawai tana buƙatar wani abu daga gare ka ne.

Yadda Za Ku Gane Budurwar Ku Tana Amfani Da Ku Ne Ba Son Ku Take Ba

Hoto: Voyagerix/Dreams time

Marubuci:- Abdallah Aliyu Saint

Ga su kamar haka:

1. Ba ta son ka san asalin halayenta

Idan tana ɓoye maka wasu abubuwa na halayenta ko danginta ko ƙawayenta, ko kuma ba ta so ka san abubuwan da take yi, to akwai yuwuwar tana amfani da kai kawai.

Mace mai son ka da soyayya tana bayyana maka komai da take yi, sannan sai ta bari kowa ya san ka a danginta, ƙawayenta, kai wata ko jinin haƙiƙa take sai ta gaya maka.

2. Ba ta nuna jin daɗin kasancewa da kai sai idan tana buƙatar wani abu

Idan ka lura cewa tana kiranka ko son ganinka ne kawai lokacin da take buƙatar wani abu, amma ba ta damu da kai ba idan komai yana tafiya daidai a rayuwarta, wannan alama ce ta rashin gaskiya a soyayya. Mutum mai son ka zai kula da kai koda bai da  wata buƙata gare ka.

3. Ba ta ba ka hankalinta ko kulawa da kai

Idan ka fuskanci cewa ba ta damu da matsalolinka, damuwarka, ko burinka ba, wannan yana nuna cewa ba ta son ka da gaske. Wani bincike na psychology ya nuna cewa mutanen da ke ƙaunar juna suna ƙoƙarin fahimtar junansu, da son sanin me ne junansu suke aikatawa. Macen da ke ƙaunar namiji da gaske tana tsananin taya shi jan girmansa, mutuncinsa da kuma son ganin burikansa sun cika.

Idan mace ba ta maka ƙorafi akan ka gyara kurakuranka musamman wanda mutane za su iya rainaka a kansu ko mutuncinka zai zube gaskiya ba ta ƙaunarka.

4. Ba ta da sha’awar samun lokaci da kai ko tattaunawa da kai

Idan mace ba ta damu da samun lokacin tattaunawa da kai ba, sai dai idan tana buƙatar wani abu, to tana amfani da kai ne ba son ka take ba. 

Wani bincike ya nuna cewa idan mutum yana son wani, zai yi ƙoƙarin samun lokaci tare da shi ba tare da wani dalili ba. Macen da ke son ka kowacce doka za ta karya don ta samu ku tattauna da ita.

5. Tana yawan tambayarka buƙatunta kamar kuɗi ko wata alfarma amma ita ba ta taɓa hoɓbasa wajen ganin ta kyautata maka da kyauta koda ta abinci ce.

Idan mace kullum tana buƙatar taimako daga gare ka, kuɗi, lokaci, goyon baya amma ba ta ƙoƙarin taimaka maka da komai a zamantakewarku, wannan yana nuna tana amfani da kai ne kawai.

Masana psychology suna cewa soyayya tana buƙatar bayarwa da karɓa (reciprocity), ba wai mayar da mutum ɗaya ya zama kamar bawa ba.

Idan ka ga saɓanin haka kuma ka ci gaba da soyayya da ita gaskiya laifin ka ne.

Karanta Sauran anan»

Gajerun Kalaman Soyayya Masu Faranta Zuciyar Budurwa

Kin cancanci dukkan wani matakin so wanda zuciyoyin masoya suke ba wa abokan junansu a dalilin so da ƙauna. Son ki ya yi nisan zango a cikin raina, dukkan wani tanadin farin cikina ke zan mallakawa.

Gajerun Kalaman Soyayya Masu Faranta Zuciyar Budurwa

Hoto: Gumpanat/Istock photo

Marubuci:- Abdul'aziz Hamza KKR

Mafi shaharar lokutan da na fi shahara cikin shauƙi suna zuwa ne da shauƙi cikin lokacin da na samu saƙon son ki.

Mazauni da na zauna domin tattalin rayuwar soyayyarki ya zama na musamman cikin irin hikimomi da abubuwan da zuciyata ta tanada musamman domin ki.

Na yi matuƙar sa'a da kuma dacewa cikin ranakun da ke tuna min harafin sunanki.

Assalamu alaiki saƙon gaisuwar amincin so mai fitowa cikin rubutun ƙauna wanda suka taho musamman domin su yi gaisuwa a gare ki.

Kin shiga cikin tsakiyar ruhin zuciyata da tsayuwar neman kasancewa da ke nake kwana.

Kyakkyawar sarauniya murmushinki ya mallaki zuciyata da gangar jikina. Lallai ke sarauniya ce mai cikakken iko. Ina matuƙar son ki.

Ba ni da sauran wata matsala. Sannan na kan kasance cikin tsananin farin ciki a lokacin da na ji an ambaci sunanki.

Karanta Sauran anan»

Irin Tunanin Da Zai Sa Ku Mutu A Talakawa

Yarda da cewa wani ne ko kai da kanka ne silar zama a talaucin ka, kake tunanin talaucin ka yana da alaƙa da samuwar wani ko rashin samuwar wani a cikin rayuwar ka, ko kake tunanin talaucin ka laifin ka ne, akwai matsala a tare da kai ko ka dinga jin rashin sa'a ko talaucin kansa a jinin ka yake.

Irin Tunanin Da Zai Sa Ku Mutu A Talakawa

Hoto: Pexels

Marubuci:- Abubakar S. Wali

Yarda da cewa an halicce ka ne talaka, ko jin cewa Ubangiji ne yake so ya gan ka a haka (cikin talaucin) har ka dinga tunanin kamar akwai wata falala a cikin talaucin da kake yi.

Yarda da cewa muhallin ka ko wani al'amari da ba a ƙarƙashin ikon ka yake ba shi ne ya tilasta maka zama a cikin talauci, kake ganin kamar babu wani abu da za ka iya yi ka fitar da kanka daga talauci saboda irin al'ummar da ka samu kanka a ciki.

Karanta Sauran anan»

Zazzafar Wasikar Rabuwa Da Budurwa Mai Ratsa Zuciya Sosai

Zuwa ga Budurwata a da.

Ina fatan wannan wasiƙar ta same ki cikin ƙoshin lafiya da jin daɗi. Na zauna domin rubuta wannan wasikar ne don na bayyana yadda rayuwar mu ta kasance, labarin zahiri da ke fitowa daga zuciyata. Ina fatan rabuwar mu za ta samar da kyakkyawar fahimta da sabuwar dama ga kowannen mu.

Zazzafar Wasikar Rabuwa Da Budurwa Mai Ratsa Zuciya Sosai

Hoto: Konstantin32/iStock photo

Marubuci:- Musa Madaki

Rayuwar mu tare ta kasance cikin yanayin matsanancin farin ciki a wasu lokutan, dariya a wasu lokutan, hawaye a lokacin da alaƙar ta ƙuntata, mun haye tsaunuka tare haka mun ratsa teku mai haske da mafi duhu a tare, haƙiƙa annashuwa da kyakkyawan mafarkin rayuwa da juna ya wanzu a rayuwar mu da mafarkin mu, mun sadaukar da kawunanmu ga junanmu don tabbatar da annashuwa a zamantakwar mu, duk da haka na zo na tabbatar da rabuwar hanyar rayuwarmu abun da ya sauya alƙiblar mu.

Rabuwar mu matsaya ce mai cike da raɗaɗi wacce  kuma ba ta da makawa, kuma za ta kasance jimami mai girma a ciki rayuwata, wannan matsayar ba ta kasance cikin farin ciki ba kuma ba za ta taɓa zaɓa abun da na so ba, dukkanmu ni da ke muna buƙatar mu rayu cikin farin ciki da cikakkiyar walwala, kasancewar mu tare ƙalubale ne ga samuwar hakan. 

Bayan waƙi'ar rabuwar mu, zan yi amfani da dukkan darasin da tarayyar mu ta koyar da ni da kuma damar samun ci-gaba da na samu, kowacce tarayya tana da babban abun duba da na koyi a cikinta haka tamu ita ma ba ta sha bamban ba. Ina godiya da lokutan farin ciki da nishaɗi da muka kasance tare da kuma ƙalubalen da muka fuskanta a zaman mu wanda suka samar da mutum kama ta a yau. 

Rabuwa da matsawa gaba don ci-gaba da sabuwar rayuwa. Ina fatan hakan zai zama babbar damar samun farin ciki da cikar burin da kowannen mu ke nema, da tabbatar da mafarkin kowannen mu. Ya zama dole ni da ke mu ɗauki rabuwar mu a matsayin babbar dama ta nemo sahihiyar hanyar da ta fi dacewa da mu.

Ina son miƙa jinjina ta ga lokutan da muka shafe tare da darasin da hakan ya koyar da mu, waɗannan lokutan za su ci-gaba da zama abubuwan tunawa a cikin rayuwata wanda ba za su taɓa gushewa ba a zuciya ta har abada.

Babu abun da nake miki fata a cikin rayuwarki face kasancewa cikin alkhairi na har abada. 

Allah ya ba ki farin ciki da cikar buri da soyayyar da ta dace da ke. 

Ki kula da kanki.

Karanta Sauran anan»

Yadda Za Ku Rayu Cikin Natsuwa Da Kwanciyar Hankali

'Yanci

Kada ka zamo mai tsatstsauran ra'ayi akan wani al'amari, tunani, aƙida ko fahimtar da za ta sa ka ɗauki mataki ko yin aikin da zai cutar da kai ko wani, domin kawai ka kare wannan aƙidar, al'amarin ko tunanin.

Yadda Za Ku Rayu Cikin Natsuwa Da Kwanciyar Hankali

Hoto: Body Harmony

Marubuci:- Abubakar S. Wali

Idan ka ba wa kowa 'yancin yin rayuwa yadda yake so kamar ka ba wa kanka wannan 'yancin ne.

Mafita

Ka zamo mai buɗaɗɗen tunani a kowane lokaci, ka yarda za ka iya kuskure akan wata fahimta ko tunani, ka zamo ɗalibin rayuwa na din-din-din.

Ɓoyewa 

Wannan yana da matuƙar muhimmanci a cikin zaman ka lafiya a rayuwa, ya zama ba ka da wani abu ko wata rayuwa da kake ɓoyewa ba ka so mutane su sani.

Mafita

Idan akwai wani abu da kake yi da kake jin tsoron mutane su sani to ka daina yin wannan abun da gaggawa.

Ka daina ɓoye wane ne kai ko asalin ka ko daga wajen da ka fito, ka daina jin kunyar daga ina kake ko a ina kake yanzu, abu mafi muhimmanci a cikin rayuwar ka shi ne wajen da ka nufa.

Maslaha 

Ka yi ƙoƙarin cire son zuciya a duk cikin al'amuran ka na rayuwa, kar ya zama kullum maslahar kanka kake fara kallo. 

Mafita 

Ka zamo adali a tunani a ɗabi'a a hukunci da kuma a mu'amala.

Farmaki

Ya zama a rayuwa ba ka da abokin faɗan da za ka kai wa farmaƙi walau mutum ko wani al'amari.

Za a iya samun saɓani na ra'ayi, aƙida, tunani, fahimta da sauran su tsakanin ka da wasu mutane amma kada wannan saɓanin ya jawo ka ɗauki matakin da zai cutar da kai ko wani.

Cutarwar za ta iya kasancewa ta ruhi ko ta jiki ko ta tunani, duka cutuwa ce.

Mafita

Ka karɓi mutane a yadda suke ba tare da ƙoƙarin canja su ba.

Karanta Sauran anan»

Karanta Addu'ar Tashi Daga Majalisi

A'isha, Allah ya yarda da ita, ta ce: Manzon Allah, tsira da amincin Allah su tabbata a gare shi, bai taɓa zama a wani majalisi ba, ko ya karanta Alkur'ani, ko ya yi wata sallah face ya cika da waɗannan kalmomi.

سُبْحَانَكَ اَللَّهُمَّ وَبِحَمْدِكَ، أَشْهَدُ أَنْ لاَ إِلَهَ إِلاَّ أَنْتَ أَسْتَغْفِرُكَ وَأَتُوبُ إِلَيْكَ.

Subhanakal-lahumma wabihamdik, ashhadu an la ilaha illa ant, astaghfiruka wa-atoobu ilayk.

Addu'ar tashi daga majalisi (Domin neman yafewa ga abin da ya gudana a cikin ikin majalisin)

Hoto: Leo Patrizi/iStock photo

Tsarki ya tabbata a gare Ka, ya Allah, da yabo gare Ka. Ina shaidawa cewa babu abin bautawa da gaskiya sai Kai, ina neman gafararka, kuma ina tuba izuwa gare Ka.

Sai A'isha ta ce: Ya Manzon Allah! Na lura cewa ba ka taɓa zama a wani majalisi ba, ko ka yi karatun Alkur'ani, ko ka yi sallah face ka faɗi wannan kalmomi.

Sai ya ce; "Ƙwarai. Duk wanda ya faɗi wani alheri sai waɗannan kalmomi su zama kamar hatimi ne ga alherin da ya aikata, wanda kuma ya faɗi sharri, sai su zama kaffara ne gare shi."

Karanta Sauran anan»

Hanyoyi 5 Na Samun Kwarjini A Cikin Jama'a

1. Akan lokaci

Mutunta lokacin wasu kamar mutunta lokacin ka ne, ka yarda da ni idan na ce maka babu abun da yake zubar da kimar mutum kamar a taru a wani waje a ce kai kaɗai ake jira kuma ka ƙi zuwa akan lokaci. 

Hanyoyi 5 Na Samun Kwarjini A Cikin Jama'a

Hoto: Freepik

Marubuci:- Abubakar S. Wali

Wani mai hikima ya taɓa cewa har ya fi mutunci da dattaku ka yi saurin zuwa waje da awa ɗaya akan ka zo a makare da minti ɗaya. Zuwa waje akan lokaci alama ce ta ka girmama mutanen da ka je wajen saboda su.

2. Kiran asalin suna

Ka dinga kiran mutane da sunan su na yanka. Idan kana mu'amala da wanda ba ka san sunan sa ba ka tambaya a faɗa maka, ko ka tambaye shi ya faɗa maka da kansa, hakan ya fi ka dinga kiran mutum da Yellow ko Oga ko Malam ko Dogo da sauran su.

Idan har za ka kira mutane da wani inkiya ko laƙabi ya zama saboda girmamawa ne ko raha ba wai saboda ba ka san sunan su ba. Kiran mutum da sunansa na yanka yana sa wa mutum ya ji an daraja shi kuma an mutunta shi.

3. Yanayi mai kyau

Hali da ɗabi'a nagari jari ne, za su maka rana ta inda ba ka taɓa zata ba. Ka girmama mutane kuma ka kiyaye haƙƙin su duk ƙanƙantar sa.

4. Zama abin sha'awa

Ka koyi sauraron mutane fiye da yadda kai za ka so a saurareka, idan wani ya yi wani abu da ya burge ka ka faɗa masa.

Ka zamo mutum mai ɗaga darajar mutane a cikin mu'amala ta hanyar nuna sha'awa a cikin rayuwar su.

5. Rauni

Zai iya yiwuwa abun da kake ɓoyewa mutane saboda kada su ga raunin ka ko kasawar ka ya sa su yi mamakin irin ƙoƙarin ka ko jarumtar ka.

Kada ka ji tsoron nunawa ko faɗawa duniya gaskiya game da kai koda kuwa kana ganin kamar wannan gaskiyar raunin ka ce.

Wane ne kai, daga ina kake shi ne abun da ya bambanta ka da miliyoyin mutane.

Wannan abun kuma ƙarfi ne a wajen ka ba rauni ba. A duk inda ka samu dama a rayuwa ka fitowa mutane a mutum (a yadda kake).

Karanta Sauran anan»

Kalaman Soyayya Na Budurwa Ga Saurayi Masu Kwantar Da Hankali

Yau ma gani cikin fadarka ba na buƙatar komai sai kallon fuskarka don Allah ka amince na gano kyawunka. Godiya zan yi gare ka sarkin sarakuna mai farar zuciya ga ka da kyau kamar zinare dole ne na ce maka sarki.

Kalaman Soyayya Na Budurwa Ga Saurayi Masu Kwantar Da Hankali

Hoto: Marriage

Marubuci:- Abdul'aziz Hamza KKR

Ladubban so da ƙauna sun samu masauki cikin soyayyar da aka ginata bisa tsarin gaskiya da amana, hakan ne dalilin da ya sa shaƙuwarmu da kai take ƙara nisan zango har muke saurin shallake masoya suke ƙoƙarin koyi da irin rayuwar soyayyarmu.

Na fahimci abubuwa na musamman a tare da kai. Ka haɗu kuma ka halittu, ka san so kuma ka san haƙƙoƙin ƙauna.

Ingantacciyar sallama daga ƙarƙashin inuwar ruhin zuciyar da ke yawan begenka a kullum.

Zuwa gare ka mashahurin masoyina wanda ya yi nasara wajen sace zuciyata.

Saƙon so na zo na ba ka don haka ga zuciyata nan ɗauki ka faɗawa gidanku zan zo da sadaki.

Ko ka san Allah ya halicceka cikin halittun da suka halittu wajen ƙawatuwar wannan duniya tamu?

Saduwar zuciyoyinmu wuri guda shi ne haɗuwar ruhinmu idan muka zamto cikin wannan yanayin dole ne mu dinga tunanin junanmu.

Karanta Sauran anan»

Arzikin Da Ba A Rasawa A Rayuwa

Tabbas waɗannan su ne arzikin da idan ka mallake su ba za ka taɓa rasa su ba, kuma su ne mafarin kusan dukkan wani arziki, da yau za ka rasa komai da ka mallaka amma kana da waɗannan abubuwan biyar da dawo da abin da ka rasa shi ne abu mafi sauƙin yi a wajen ka.

Arzikin Da Ba A Rasawa A Rayuwa

Hoto: Bank at first

Marubuci:- Abubakar S. Wali

Ga su kamar haka:

1. Basira

Damar amfani da ƙwaƙwalwar da Ubangiji ya ba ka wajen gina tunani, ƙirƙira, auna al'amura, magance matsala, da sauransu.

2. Bege

Matuƙar son abin da kake son mallaka.

3. Baiwa

Wani abu da Ubangiji ya hore maka na musamman wanda kake yi cikin sauƙi ko cikin iyawa.

4. Amfani

Amfanar al'ummar da kake rayuwa a cikinta wajen hidimta mata ta hanyar sana'ar ka ko aikinka, ko yin amfani da baiwar da Ubangiji ya ba ka wajen aiwatar da abin da zai amfani al'umma.

5. Jinƙai

Soyayyar ka da tausayinka ga al'ummar da kake rayuwa a cikinta, tare da son ci gaban ta.

Abin lura shi ne koda ba mu da abubuwan da mutane suka auna a matsayin arziki Ubangiji ya ba mu ikon mallakar arzikin da kuɗi ko aiki tuƙuru ba ya ba da shi.

Kuma babu shakka su ne mabuɗin samun arzikin da mutane suke kira arziki.

Karanta Sauran anan»

Kyakkyawan Darasi Daga Rayuwar Rarara

Mutane da yawa suna samun nasara a abubuwan da kake ɗauka shirme ne. A lokacin da mawaƙi Dauda Kahutu Rarara ya ce, ya ba wa shugaban Niger Tchiani kwana 20 ya sauka daga kujerarsa, mutane da yawa sun ɗauki hakan a matsayin tsabar jahilci da rashin hankali.

Kyakkyawan Darasi Daga Rayuwar Rarara

Hoto: Real Dauda Kahutu Rarara/Facebook

Marubuci:- Bello Ado Hussaini

Kuma a zahiri faɗin hakan zai iya zama wauta da rashin hankali.

Amma ni da na ji wannan shurbucin na Rarara, ban ɗauka da gaske yake ba.

Haka kuma na yi imani cewa shi ma Rarara, ba ya tsammanin wai shugaba Tchiani zai mayar da shugaba Bazoum, saboda tsoron waƙar mawaƙin na siyasa.

Amma abin da ya kamata mutane su yi nazari akai shi ne, mene ne aikin Rarara?

Kuma yaya yake tafiyar da al'amuran sa, har yake samun irin kuɗaɗen da yake samu?

Babban aikin Rarara shi ne waƙoƙin siyasa, waɗanda su ne suka ɗaukaka shi zuwa matsayin da yake a yau.

Kasuwa kowacce iri ce tana buƙatar ciniki (Sales) yau da kullum.

Ciniki kuma yana buƙatar talla (Advertisement) don sake jawo hankalin abokan cinikin ka, da ma sababbin kwastomomi, don ci-gaba da samun ciniki.

Rarara ya yi ma Bazoum yaƙin neman zaɓe da waƙoƙin sa, tare da abokan aikin sa 'yan fim ɗin Hausa. Kuma ya samu arziki mai yawa daga wannan aiki.

A fahimta ta, mawaƙi Rarara ya yi amfani da wani salo na sakarci, cikin sani da hikima, domin buɗe wani ciniki mai riba, koda kuwa a yanzu babu yaƙin neman zaɓe a Nigeria ko Niger.

Faɗin cewa ya ba wa Tchiani kwana 20, ya jawo cece kuce mai yawa, musamman ga masu ganin rashin hankalin mawaƙin.

Bayan cikar wa'adi da kuma Publicity, wato ɗaukar hankalin da mawaƙin ya yi, Rarara ya saki waƙoƙi kamar yadda ya alƙawarta.

Kowa ya san irin kuɗaɗen da kafofin sada zumunta (Social Media) suke biya akan bidiyoyi, musamman YouTube da TikTok, inda suke biyan daloli akan yawan kallon da aka yi wa waƙa ko wasan barkwanci.

Idan ka ziyarci shafukan mawaƙin, za ka iya fahimtar irin alkhairin da ya samu daga waɗannan waƙoƙi.

Hakazalika wannan shiririta ta mawaƙi Rarara za ta faranta ran magoya bayan tsohon shugaba Bazoum, tare da ci-gaba da nuna da'awar tsohon shugaban cewa, shi ne halastaccen kuma zaɓaɓɓen shugaba.

Don haka makusantan Bazoum tabbas za su yi farin ciki, kuma za su biya mawaƙin ladan aikin da CFA mai yawa.

A taƙaice dai mawaƙi Rarara yana sane ya mayar damu shashashu, mu ka yi ta kumfar baki da nuna jahilcinsa, amma a zahiri ya san wasan da yake shiryawa. Kuma kwalliya tana biyan kuɗin sabulu.

Babban saƙon shi ne, kowa ya iya allonsa ya wanke.

Kuma mu daina ɗaukar cewa mun fi kowa wayo da basira, saboda mun yi boko mun shiga manyan ofisoshi.

Wannan misali ne guda ɗaya, na irin abubuwan da muke musu kallon shirme, amma a zahiri mai yin su ya san abin da yake yi, da manufar da yake son cimmawa.

Allah ya sa mu koyi talla (Advertisement) da jan hankali na kasuwa, (PR) irin na Dauda kahutu Rarara Amin.

Karanta Sauran anan»

Sakonnin Bayyanawa Budurwa Matsayin Ta A Zuciya

Soyayyar ki ta zama babbar abokiyar hira gare ni don a duk yanayin da na kaɗaice soyayyar ki kan kawo mini ziyara ta musamman don taya ni hira.

Sakonnin Bayyanawa Budurwa Matsayin Ta A Zuciya

Hoto: Maya/Share chat

Marubuci:- Ridwan Khan Adam

Amincin Allah su ƙara tattara su tabbata ga bayinsa salihai, yarda da afuwa haɗi da jinƙansa da rangwami su ƙara wanzuwa a tsakanin masoyan da suka riƙe amanar juna  kamar mu.

Kin kasance abu mafi muhimmanci wanda kan kai kawo a tsakanin jijiyoyin da ke damfare a zuciyata don babu yadda za a yi zuciyata ta buga ba tare da kin ratsa ta cikin ta ba don ke ce masarrafar sarrafa jinin jikina.

Ni ƙaunarki kawai ta ishe ni ta katange ni da duk wani harin ƙunar baƙin waƙen da sauran 'yammata kan iya kawo min, don ƙaunarki ta zama jari ga zuciyata.

Son ki ya fi jini da iska gami da ruwa muhimmanci a gare ni don ke ce dawwamammiya a zuciyata, kuma wacce ba zan yi  yinkurin yi mata kishiya ba.

Harshena ko hannuwana sun yi kaɗan wajen bayayyanawa ko furtawa ko ma rattabawa yadda zuciyata ke ji da ke, don ina ji da ke fiye da yadda uwa ke ririta jaririn da ta haifa yau.

Daga ƙarshe fatana mu zama masoya na gaskiya wanda sauran masoyan duniya za su yi koyi da su a nan gaba. 

Daga naki kuma mai son ganin jin daɗin ki a kowane lokaci.

Karanta Sauran anan»

Hanyoyi 3 Na Samun Walwalar Zuciya

Idan kana fama da damuwa ko rashin walwala a zuciyar ka, ka yi abubuwan nan guda 3.

Hanyoyi 3 Na Samun Walwalar Zuciya

Hoto: Dilok Klaisataporn

Marubuci:- Bello Ado Hussaini

1. Idan kana da 'yan uwa ko aboki na ƙwarai a wani gari daban, ka kai masa ziyara.

Ma'ana dai ka yi tafiya yadda za ka canja muhalli na wani lokaci.

2. Idan akwai wani abu da ka sa a gaba, kuma ya gagara samuwa, ka watsar da wannan buƙatar, ka haƙura da ita.

Ka kuma yadda ba kowacce buƙata ce take samuwa ba.

Idan kana da hali na wasu 'yan kuɗaɗe, ko kuma wani abu mai amfani, ka farantawa wani rai, da wata kyauta mai ban mamaki.

Insha Allah waɗannan matakai idan ka bi ɗaya daga cikinsu, ko duka ukun, za ka samu sauƙi da maslaha a zuciyar ka.

Allah ya magance mana dukkan damuwar mu, ya kawo mana sauƙi da rangwame Amin.

Karanta Sauran anan»

Hanyoyi 4 Na Tattalin Riba A Kasuwanci

Yanayin sukurkucewar tattalin arziki da ake ciki, dole ne Ɗan Kasuwa ya nemi wasu sababbin dabaru domin ganin ya tsaya da ƙafarsa.

Hanyoyi 4 Na Tattalin Riba A Kasuwanci

Hoto: Uwcped

Marubuci:- Abubakar Abba

Ita riba (profit) a kasuwanci ita ce ginshiƙin ci gaba, duk kasuwancin da ba'a samun riba to yana kan hanyar zuwa maƙabarta ne.

Kasuwa kacokan ana yin ta ne domin riba, idan ba ka gane inda ribar ka take zuwa ba, to alama ce da ke nuna wahala kake yi ba kasuwanci ba, kuma irin haka ne yake sa wa mutane su ce ana yi musu asiri, alhali kuwa ba wanda yake musu asiri rashin sani ne matsalar su.

1. DA FARKO YANA DA KYAU KA SAN ME AKE NUFI DA RIBA (profit)

Riba (Profit) shi ne kuɗin da ya rage bayan ka cire Kuɗin Product, da hidimar da aka yi masa.

Misali:

Idan ka je kasuwa ka saro Shadda a kan farashin ₦10,000.

Sai ka dawo shagonka ka siyar da ita akan farashin ₦12,000.

Ƙarin da ka samu na dubu biyu sunansa (Gross Profit) wato riba a dunƙule.

Idan ka cire kuɗin mota da kuɗin leda da na Data da ka saka wajen talla, abin da ya yi ragowa shi ne (Net Profit) wato tsantsar riba.

Sanin wannan zai taimaka maka ka gane inda kasuwa take dosa.

2. KA KULA DA KASHE KUƊINKA 

Idan kana samun ciniki mai yawa, to tabbas kashe kuɗinka zai ƙaru, sai dai idan ba ka bi a hankali ba, za ka ga kana cinikin mai yawa amma kuma ka rasa gane inda ribar take tafiya.

Wannan ta sa dole ka tsaya ka bi diddigin abin da kake kashewa a kasuwancinka, kada ka je ledar da kake zubawa kwastoma kaya ita ce take cinye ribar ba ka sani ba, kai kana ganin ka yi fashion domin samun ciniki alhali kuma fashion yana neman kashe maka kasuwa.

Sanin abin da kake kashewa kasuwarka zai ba ka cikakken haske, domin ka gane inda kuɗi yake zurarewa kuma ka ɗauki mataki.

Sau da yawa muna kashe kuɗi da sunan ɗaga darajar kasuwancinmu amma ba mu sani ba hakan yana cinye mana ribar da muke samu ne.

3. KA DUBA FARASHIN KA

Farashin kayanka yana taimakawa wajen ci gaba ko akasinsa, sanin yadda za ka sanya farashin da zai maye gurbin abin da ka kashe kuma a samu ragowa abu ne mai matuƙar muhimmanci.

Kafin ka saka farashi yana da kyau ka yi duba zuwa ga:

SU WANE NE KWASTOMOMIN KA?

Sanin ainahi da ajin kwastomomin ka zai ba ka dama ka sanya farashi daidai su kuma ka samu riba.

FARASHIN MAƘOTA

Wanda suke siyar da kaya irin naka da tsari irin naka, yana da kyau ka yi duba zuwa ga yadda suke fitar da farashi, hakan zai taimaka sosai kar ka je ka samu matsala.

ƘARIN DARAJA

Koda a ce maƙocinka yana siyar da irin abin da kake siyarwa, indai ka ƙarawa naka daraja, kamar sanya shi waje mai kyau, ba wa kwastoma kulawa ta musamman, hanyar biyan kuɗi mai sauƙi da sauransu, to farashinka ya kamata ya fi nasa domin ka yi ƙarin ɗawainiya sama da shi.

Hakan zai sa ribar ka ta maye gurbin hidimar da ka yi, har ma a samu ragowa.

4. TSIFA DA WARWARA

Ka tsaya ka dinga lissafin yadda kuɗi yake shigowa da kuma yadda suke fita, ka bi diddigin hanyar da kuɗi suke fita, inda za ka iya rage fitarsu, a rage, inda za'a daina, a daina.

Ku taimaka ku tura wannan saƙon ga  sauran jama'a saboda ya je ko'ina.

Nagode.

Karanta Sauran anan»

Gajerun Kalaman Soyayya Na Text Messages Masu Ratsa Sassan Zuciya

Fatana da roƙon zuciyata a kullum shi ne ki himmatu cikin shirin zama matar aurena. Akwai amana ni da ke, babu ranar rabuwa, zahirin gaskiya ke ce wadda na zaɓa domin ki zamto Ummin yarana.

Gajerun Kalaman Soyayya Na Text Messages Masu Ratsa Sassan Zuciya

Hoto: Racorn/Dreams time

Marubuci:- Abdul'aziz Hamza KKR

Ba zan kasa isar da saƙon zuciyata a gare ki ba domin hakan shi ne shaidar kin zama jagora a cikin ƙalbina.

Ƙauna da son ki sun mamaye ruhina shi ya sa zuciyoyinmu suke numfasawa a tare da junansu.

Son ki ne sanadi kuma jigon tsayuwata babu rana ko kuma dare wajen tsara baitocin bege a gare ki.

Yunƙurin jikina da kuma tsayuwar tsayawar saƙona shi ne fatan ganin shauƙi da murmushi ya bayyana a kan fuskar ki.

Ƙaunarki ta mamaye ƙirjina, a cikin jinina nake jin son ki yana min yawo shi ya sa ba na iya zirga-zirga sai na yi tunaninki.

Na zo gare ki da gaske, zuciyata a makance, kalaman bakin ki su ne sinadarin ƙara ruruwar wutar son ki wadda ta mamaye zuciyata yanzu haka.

Cikin ƙaramin lokaci na yi tafiya mai nisan zango a cikin son ki wanda fahimtar hakan zai zamo abun mamaki.

Karanta Sauran anan»

Abubuwa 10 Masu Lalata Rayuwa Nan Take

1. Yawan gayawa mutane shirin ka na gaba, ya zama ba ka da sirri, kowanne shiri da kake yi na ci-gaban kasuwancinka ko rayuwarka ta yau da kullum sai ka kwashe ka gaya wa wani.

Abubuwa 10 Masu Lalata Rayuwa Nan Take

Hoto: Sing up genius

Marubuci:- Abdallah Aliyu Saint

2. Kuɗin da ka sayi wayar hannunka ya fi jarinka na kasuwanci yawa.

3. Kasa cewa mutane a'a, ma'ana duk wata buƙata da wani ya kawo maka ko za ta cutar da kai ka kasa ce masa a'a. Ka koyi cewa mutane a'a akan abin da ka san za ka takurawa kanka idan ka yi.

4. Kasa jure sha'awa, kasa daure sha'awar jima'i ko sha'awe-sha'awe na wasu abubuwan tun daga wayoyin hannu, motoci, suturu masu tsada . Idan ka biye musu koyaushe za ka siyar da na hannunka arha ka ce za ka canja sabo.

5. Ci gaba da zama da macen da bakwa kwanciyar hankali.

Zaman aure da macen da babu kwanciyar hankali a zamantakewarku, hakan zai hana ka nutsuwa da sanyawa ƙwaƙwalwarka fargaba da rashin samun mallakar tunaninka gaba ɗaya.

6. Shafukan sada zumunta. Idan ya kasance ka zama mayen shafukan sada zumunta daga What'spp sai facebook sai ka gangara Tiktok ba ka mayar da hankalinka kan rayuwarka ta zahiri tabbas lokacinka zai ƙare a banza ba ka more shi yadda ya kamata ba. Ba ina magana ne akan masu samun kuɗi da harkar ba.

7. Son burge mutane

Ƙoƙarin burge mutane ba inda zai kai ka face komawa baya dan kuwa adadin dagewarka wajen burge mutane adadin dagewar da mutane za su yi wajen mayar da kai baya a rayuwa.

8. Kwashe jarinka na kasuwa don ƙoƙarin gina gida.

Kasuwa tana kawo kuɗi yayin da Gidan Zama baya kawo kuɗi, idan kana ta kwasar jarinka babu lissafi kana ƙoƙarin gina gida a hankali jarin zai zaizaye ya zama ka daina samun riba a kasuwancin saboda ƙarancin jari ko ka rasa jarin ma gabaɗaya a ƙarshe ƙila sai dai ka karyar da gidan da ka fara ginawa ka ƙara ɗora wani jarin wanda ko rabin naka na farko ba lallai ya kai ba.

9. Mayar da wajen kasuwancinka dandalin hira. Wannan yana matuƙar ba wa ɗan kasuwa matsala wato ya zama kowa ya mayar da shagonka ko wajen kasuwancinka shi ne dandalin hirar siyasa da musun addini da zuwa a zauna a huta. 

Mutane kala-kala ne akwai waɗanda da dama ko siyayya suka zo suka ga jama'a da yawa a wajen wucewa suke yi saboda ba sa son  taron jama'a. Akwai kuma wanda ido ne ba ya so, ba ya so ya ga kowa ya san abin da zai siya.

10. Shan kayan maye

Na ƙarshe kuma mai muhimmanci duk abin da za ka yi ya zama kana cikin hayyacinka shi ne za ka tsara gabanka ka gane kuskuren bayanka.

Yo ba ka cikin hayyacinka ya za ka gane ma a wacce duniyar kake Jupiter ko Mars?

Karanta Sauran anan»

Sakonnin Bankwana Na Karshe Da Budurwa

Me ya sa kika zaɓi son ganin kukana maimakon a ce ki so baccina wanda zan yi shi har cikin ƙalbina? Wayyo ni. Kaichona.

Sakonnin Bankwana Na Ƙarshe Da Budurwa

Hoto: Antonio Guillem/iStock photo

Marubuci:- Abdul'aziz Hamza KKR

Zancen aure muka ƙulla ni da ke domin zuciyata babu kalar ki. Ashe ke a ran ki akwai abin da yake faruwa.

Zuciyata kike son ki fasa, kin bar ni ina ta bacci kamar wata kasa, ina tunanin abin da ke a ƙasa, na soyayyar da muke wadda ba sa'insa.

Ashe dukkan kalamanki na yaudara ne? Da ma kin so ni domin ki ƙware ni ne? Me ya sa ki haka?

Ɗawainiya nake da ke a kowace rana, ina ta tunanin akwai wata rana wadda za ta zo a ce mun zauna muna murmushi muna yin murna.

Yau dai gare ki na zamo ɗan kallo, kin so ki maida ni kamar wata ƙwallo, maimakon farin wata sha kallo.

Kar ki sa zuciyata ta yi kuka bayan ta ɗauki so ta ba ki duka a kanki.

Son ki ne abun son ruhina, fushinki ne silar kukana. Ke nake so, kuma nake yawan ƙauna.

Yau ga shi ni da ke muna bankwana, na so a ce muna tare ba za mu rabe ba amma ƙaddara ba za ta bari ba.

Karanta Sauran anan»

Gaskiya 10 Da Babu Mai Gaya Muku Su

A wata lacca da ta gabata, na yi ishara kaɗan akan yadda mutane lokaci ya zame musu ba abu ɗaya ba, ta yadda tasirin sa gare su yake bambanta, sunan laccar: Nazari akan lokaci. Fahimtar hakan wani sabon mabuɗi game da rayuwa ne.

Gaskiya 10 Da Babu Mai Gaya Muku Su

Hoto: Ga magazine

Marubuci:- Bukhari Alhawari

A duk lokacin da wata shekara ta wuce, zukata da yawa kan cika da yin wa'adin wasu ayyuka na ci-gaba, musamman matasa, waɗanda ba su yi ba a tsohuwar shekara, sai dai kamar haka wata sabuwar shekarar za ta zo ba tare da sun cimma komai ba, haka dai har tsufa, ko mutuwa ko rashin lafiya. 

Yanayin ya yi kama da wanda ya maƙale a waje ɗaya, ba ya iya yin gaba, idan har zai motsa sai dai ya yi baya wato dai suna samun ƙaruwar shekara ne ba sabuwar shekara ba.

A cikin wannan rubutu ga wasu gaskiya goma nan, ga duk wanda ke fama da irin wannan matsalar, in sha Allah zai samu mafita, ku biyo ni.

1. Ƙididdiga

Yi wa kai ƙididdiga tsakanin nasarori da ka samu ko akasin haka a shekarar da ta wuce. Sabuwar shekara ko ƙaruwar shekara? Lallai kowace shekara a rayuwar mu Allah kan ba mu wata dama daban da wadda ta wuce, haka wadda za ta zo, a lokacin da ka iya nutsuwa ka ɗauki takarda da biro, ka iya ware aya da tsakuwa, to wannan daidai yake da gano bakin zare, a lokacin za ka gane a ina kake yanzu.

2. Fayyacewa

Lallai duk abun da ka ke so ka cimma ka iya fayyace shi sarai a ran ka, ka keɓance shi da addu'ar ka, ka iya ware shi wajen bin sababin sa. Inda za ka shiga kasuwa ba tare da fayyace me ka je yi ba, wannan zuwan naka, ba shi da bambanci da wanda ya yi tafiya bai san ina zai je ba. A ido kowa zai ga aiki yake, amma a haƙiƙa aika-aika yake wa kansa. Misali za ka iya fayyacewa a matsayin ka na Ɗan Kasuwa, shekarar 2025, ƙudurin ka shi ne: buɗe shagon ka na biyu, wannan misali ne kawai.

3. Bi a sannu

Sunnar Ɗan Adam ce gaggawa, sunnnar Allah ce bi a sannu, a duk lokacin da ka sa wani abu mai muhimmanci a rayuwar ka, kada ka yi gaggawar ganin nasarar sa, hakan na haifar da sarewa da wuri idan ba a gani ba, kullum ka tambayi kanka da safiya, da gaske ne ina kan hanyar zuwa cimma nasara? Shin ban bijiro da wani dalili da zai hana ni kai wa ba, idan har ka samu amsa cewa kana kan hanya, to tsayawa a (Go slow) ba matsalar ka ba ne, matsalar hanyar ce..

4- Rungumi koyo

Lallai wanda yake ji ya gama iyawa, to wannan ya rasu Allah ya masa rahama. A iya nazari na da tunani na ɗalibi, ban san abun da ke katange mutum daga ilimin nasara ba, sama da jin ya iya, wannan tsarin yana shirya mutum tsaf zuwa ga faɗuwa. Ya na kulle hasken tunani, ya dadishe kaifin basira, yana sa raina ilimi da malamai, yana sa girman kai, a ƙarshe kuma asara.

5. Fasahar kawarwa

Akwai wasu halaye guda biyu, da suke daskarar da mutum ga barin nasara, akwai mummunar ɗabi'a, akwai mummunan tasarrufi da lokaci. Rashin sanin ina lokacin ka ke tafiya, daidai yake da rashin sanin ina rayuwar ka za ta je. Rashin kyakkyawan hali, daidai yake da rashin kyakkyawan muhalli.

6. Bunƙasa kai da kai

A lallai duk lokacin da kake son cimma wani abu, kada ka yaudari kanka, tambayi kawai mene ne ƙa'idodin da ake bi wajen samun sa, kawai sai ka fara aiki a kanka don ka ga ka cika waɗannan gaɓɓai, da yardar Allah har gida dama za ta biyo ka.

Ka nemi ƙwarewa, nasara za ta biyo ka, idan ka bi nasara za ka rasa ƙwarewar da za ka same ta. Bunƙasa kai da kai na shiga cikin sayen littattafai, shiga wasu kwasa-kwasai, haɗuwa da wasu mutane, tarewa a wata unguwa, barin wani gari, ko barin wasu mutane, muhallai, aƙidu, ko wasu tunane-tunane da sauran su.

7. Lafiyar ka jari

Galibin cututtukan tsufa an same su ne a lokacin matasantaka, lokacin da garkuwar jikin ka take da ƙarfin yaƙar su, a lokacin da ta yi rauni saboda tsufa, sai cututtukan su bayyana shikenan. Me wanna yake nufi, a yanzu haka da nake wannan magana, kana da wata ɗabi'a wadda nan da shekara goma ko sama da haka, ka zama mara lafiya, za ta iya kasancewa shan kayan zaƙi da sukari, ko kuma kallon waya da dare ba tare da glass na kariya ba, ko kuma cin duk abun da ka gani a hanya ba tare da izini da inganci ba. Waɗannan matsalolin naka, za su iya hana ka kai wa ga nasara, ko kuma su hana ka morar nasarar bayan ka cimma ta, sai dai ya zama kullum ka na wajen likita.

8. Fasahar kula da ƙananun abubuwa

Shin za ka yarda da idan na ce maka, wanke baki da dare, lokacin da za a kwanta ya na da alaƙa da lafiyar tunanin ka gobe, ko kuma cewa karkaɗe shimfiɗar ka yayin kwanciya yana da alaƙa da ingancin wunin gobe? To duka waɗannan bayanai haka suke. 

A lokacin da ka fara ba da muhimmanci ga ƙananun al'amura a rayuwar ka, manyan za su buɗe maka, ta haka ne kuma kaɗai za ka san: yin nasara akan manyan matakai, na da alaƙa da yin nasara akan ƙananu.

9- Gamayya

A duk shekara ta Allah akwai irin mutanen da ya kamata a ce ka kai gare su, sun san ka, za ka iya kiran waya su faɗi sunan ka, a harshen yan zamani wato: "Connections" na sani za ka yi mamaki amma haka abun yake.

Akwai abubuwan da za ka rasa a rayuwa koda ka cancanta ka samu a haƙiƙa, amma rashin haɗuwa da wanda zai iya ba ka, sai abun ya zama aiki. Na san kun san abun da ake kira a musulunci da Shafa'a da kuma Tawassuli. Wannan misali ne.

10.  Ka yi farin ciki

Lallai akwai alaƙa mai ƙarfi tsakanin addu'a da bin sababi, su kuma biyun akwai alaƙa mai ƙarfafi tsakanin su da ƙaddara, ita kuma akwai alaƙa mai ƙarfi tsakanin ta da hukuncin Ubangiji, shi kuma akwai alaƙa mai ƙarfafi tsakani da hikimar sa, shi kuma akwai alaƙa mai ƙarfi tsakanin sa da adalcin sa. Shi kuma akwai alaƙa mai ƙarfi tsakanin sa da rahamar sa.

Lallai rahamar Allah ta yalwace komai da ya halitta ciki har da kai aboki na. Lallai Allah mai alkhairi ne, abun da ka ke nema nasa ne, ba zai rage shi da komai ba, idan ya ba ka. Shikenan. Tashi ka zabura nasarar Allah ta na tare da kai. Kai ku ce Allahu Akbar .

Karanta Sauran anan»

Kyawawan Kalaman Soyayya A Daren Farko Ga Ma'aurata Na Zamani

Ke kyakkyawa ce a cikin kyawawan 'yammatan zamanin nan, ke ce matakin farko, dukkan 'yammata kin zamo madubi a gare su.

Kyawawan Kalaman Soyayya A Daren Farko Ga Ma'aurata Na Zamani

Hoto: 18989612/Freepik

Marubuci:- Abdul'aziz Hamza KKR

Assalamu Alaiki saƙon sallamar so mabuɗin murfin ƙofar zuciyata zuwa gare ki, maƙurar soyayyar da zuciyata take ɓuɓɓugo da shauƙin begenki a fili, son ki ne sila kuma ma'aunin da ke auna mizanin rayuwar dukkan wani nishaɗin da ke ɓuɓɓugowa da shauƙin murmushin fuskata.

A karon farko cikin tarihin tsawon kwanakin rayuwar da na yi na samu kyauta ta musamman wadda Allah Ya zaɓe ta cikin kyawawan bayin shi Ya ba ni domin ta zamo abokiyar rayuwata ta har abada.

Ke ce nake nufi da kalamaina 'yar wajen Mama murmushinki nake buƙata domin ya zamto mabuɗin da zai buɗe mini ƙofar shigowa cikin nutsuwar samun zama a tare da ke.

Kafin na fara shiga cikin zangon rubuta miki saƙon da ke fitowa ta cikin numfashin zuciyata sallama a gare ki zan fara 'yar mutanen Larabawa.

Gwargwadon ruwan ƙoramu masu kwaranya cikin yanayin saukar ruwan sama suna ƙara bayyano da kwarjinin halittar kyawunki.

Babban burin ruhi da cikar ƙasaitar murmushin zuciyata shi ne ganin ki a kusa da ni kina mai fesa mini kyakkyawan murmushin ki.

Karanta Sauran anan»

Nasarar Dare Daya

Akwai wani kuskure da muke yi, Matashi yana fara samun kuɗi, ko wata dama, maimakon ya yi amfani da wannan damar wajan ƙara gina sana'a ko kasuwancin da yake yi, a'a, sai ya fara tarawa kansa maƙiya na babu gaira babu dalili, shi ne kullum habaici a status; "sun ƙi, Allah ya so.", "Lokacin mu ne, yen yen yen yen....", Kwarai! Lokacin ka ne, amma na faɗuwa, domin da wannan halin babu inda za ka je.

Nasarar Dare Daya

Hoto: Pixel

Marubuci:- Abdulfatah Yakubu

Kada nasarar dare ɗaya ta ruɗeka, rayuwa mataki mataki ce. Idan Allah ya yi niyyar buɗe mana ƙofofin alkhairi dubu, ba lokaci ɗaya yake buɗe mana su duka ba, zai buɗe mana ƙofar farko ne, alla bashshi mu kuma sannu a hankali ta hanyar inganta kai, da alaƙar mu da jama'a sai mu buɗe ragowar ƙofofin.

Kowace dama, dama ce ta samun wata damar. Kowane taku, taku ne zuwa ga wani takun. A kasuwa, dubu ɗarin ka ta farko, dama ce ta samun miliyan ɗin farko.

Iya karanta baƙaƙen kowane yare, dama ce ta fara koyon haɗa baƙi.

Iya zama, dama ce ta fara koyon tsayuwa, tsayuwa kuma dama ce ta fara koyon tafiya, haka dai lissafin yake a kowane ɓangare na rayuwa.

Kai da ka fara yanzu, ina kai ina yi wa waɗanda suka daɗe a ciki habaici?  Yanzu aka fara, kada nasarar dare ɗaya ta ruɗe ka.

Karanta Sauran anan»

Kalaman Soyayya A Tsakanin Talaka Da 'Yar Mai Kudi

Haƙiƙa kin iya kallon soyayya domin kyakkyawan kallon ƙaunar da kike turo saƙonsa zuwa gare ni shi ne silar tabbatuwar cewa a fagen iya soyayya ba kowa ba ce kamar ki gwanata.

Kalaman Soyayya A Tsakanin Talaka Da 'Yar Mai Kuɗi

Hoto: Ofh soup kitchen

Marubuci:- Yaron MLM KD

Hmm na kan yi murmushi yayinda idanuwana su kai tozali da abin da kowacce idaniya ke buƙatar gani wato kyakkyawar halitta irin taki.

Yayin da zuciyata ta taho zuwa ga kyakkyawar sarauniyar zinariya, kuma me kyakkyawan takun ƙasaita fiye da na ƙananun sarakai.

Haƙiƙa tarayyata da ke ita ce kyakkyawar rayuwar da nake mafarki a kodayaushe masoyiya.

Duk da na kasance ba kowa ba amma na kan ji ƙwarin gwiwa ta ya ƙaru a duk lokacin da na gan ki a gefena.

Karanta Sauran anan»

Karanta Zikiri Idan An Zauna A Wani Majalisi

Ibn Umar ya ce; an kasance ana ƙirgawa ga Manzon Allah, tsira da amincin Allah su tabbata a gare shi, a majalisi guda kafin ya tashi, yana cewa sau ɗari.

رَبِّ اغْفِرْ لِي، وَتُبْ عَلَيَّ، إِنَّكَ أَنْتَ التَّوَّابُ الغَفُورُ.

 Zikiri idan an zauna a wani Majalisi

Hoto: Seekers guidance

Rabbigh-fir lee watub 'alay, innaka antat-tawwabul-ghafoor.

Ya Ubangijina! Ka gafarta mini, Ka yi tuba a gare ni. Lallai Kai ne Mai yawan karɓar tuba, Mai yawan gafara.

Karanta Sauran anan»

Uzuri 3 Masu Cutarwa Ga Matasa

Uzuri guda uku da matasa kan ba wa kansu kariya da su, ba tare da sun san hakan ne ke katange su daga nasara ba.

Ga su kamar haka:

1. Ƙaryar busy da rashin lokaci

Matasa da yawa ba sa zuwa makaranta ko zumunci ko wani abu mai amfani ga rayuwarsu sakamakon uzurin su na wai ba su da lokaci, amma idan ka yi wa rayuwarsu duba na tsanaki za ka ga suna da lokacin aikata abubuwa marasa amfani ko wanda ba su kai wannan abun da su ƙi yin amfani ba, yaudarar kansu kawai su ke yi da su ke ganin rashin lokaci ne ya hana su yin abun da ya kamata.

Uzuri 3 Masu Cutarwa Ga Matasa

Hoto: Discover hub pages

Marubuci: Anas Darazo

Zai ma ka wahala ci-gaba matuƙar ka ci-gaba da amfani da lokacin ka wajen shashanci amma kana cewa ba ka da lokaci idan an zo abu mai amfani.

2.  Isasshen lokaci

Tunanin gaba za su samu isasshen lokaci da za su yi abun da ya kamata. Eyyah! Ɗan uwa yanzu ne ka ke da dama, gobe da nisa.

Duk matashin da ya jinkirta taimakon iyaye, neman kuɗi da neman ilimi, inganta lafiya da ƙulla alaƙa mai kyau da mutane ya na ganin sai ya gama jami'a ko sai ya yi aure ko ya yi kuɗi ko sai ya shekara kaza ko ya mallaki abu kaza lallai ya sani shi makararre ne.

Ka yi amfani da damar da Allah Ya ba ka yanzu, ka yi duk abun da za ka iya koda kaɗan ne hakan ka iya zama silar ka ta zama mai nasara, jinkiri kuwa koda na daga safe zuwa dare ne zai iya zama sanadin tabbatar ka cikin ƙasƙanci.

3. Alhakin matsaloli 

Ɗorawa wasu mutane alhakin matsalolin da ka ke ciki, matasa da yawa su na ganin matsala ta same su ne sakamakon sakacin wasu mutane kamar iyaye, dangi, shugabanni, iyayen gida ko abokansu, lallai ka sani duk abun da ya same ka kai ya samu babu ruwan wani, idan har ka yi hankalin da ka gane mahaifanka ba su sauke ma ka wani haƙƙi ba wanda hakan ya jefa ka a matsala to ya kamata wannan hankalin naka ya gano ma ka mafita.

Ka sani ba ka da iko akan kowa amma kana da iko akan kanka, don haka manta da wanda sakaci ko muguntarsu ya jefa ka a matsala ba za ka iya tilasta su gyara ba, amma kana da iko da kanka don haka tilasta ma kanka ka yi abun da ya kamata.

Karanta Sauran anan»

Gajerun Sakonnin So Masu Dadi Ga Budurwa

Kowanne irin matsatsi zan shiga a rayuwata, ko yaya jama'a za su tsane ni ba zan daina son ki ba.

Gajerun Sakonnin So Masu Dadi Ga Budurwa

Hoto: Big stock photos

Marubuci:- El-Nass

A lokacin dana fara ganin ki, ji na yi wani abu yana shiga zuciyata, ya wuce can ciki, inda babu wadda ta taɓa zuwa kuma har abada babu wadda za ta sake zuwa.

Kamar yadda taurari ke yin haske gami da ƙyalli a sararin samaniya, to haka fuskarki take haske gami da ƙyalli a cikin zuciyata.

A dukkannin lokacin da zuciyata ta shiga cikin yanayin ƙunci, to ba abin da kan fitar da ita daga wannan yanayi face daɗaɗan kalaman ki masu sanyaya ruhi wanda ya fi busar sarewa daɗin sauraro.

Zan so a kodayaushe kuma a kowanne lokaci na kalle ki, domin kallon kyakkyawar fuskarki na haifar mini da kwanciyar hankali a cikin raina.

Karanta Sauran anan»

Mutum Mai Shiru-shiru Da Siffofin Sa

Mutum Mai Shiru-shiru ko Introvert mutum ne wanda ya kan fi jin daɗi keɓewa ko zama shi kaɗai ko zama cikin mutanen da ba su wuce biyu zuwa uku ba, kai ko mutum ɗaya ma.

Mutum Mai Shiru-shiru Da Siffofin Sa

Hoto: the psychology group

Marubuci:- Abdallah Aliyu Saint

Ga wasu ƙarin bayanai game da Introvert ko Mutum Mai Shiru-shiru, kamar haka:

1. Buƙatar lokaci shi kaɗai

Mutane Masu Shiru-shiru suna buƙatar lokaci su kaɗai don sake samun kuzari da nutsuwa bayan sun yi hulɗa da mutane da yawa.

2. Ƙarfin hulɗa

Suna jin daɗi sosai lokacin da suke tare da mutane kaɗan ko kuma tare da mutum ɗaya kawai. 

Wannan yana nufin cewa ba sa son taron jama'a mai yawa.

3. Natsuwa da shiru

Sun fi zama su yi shiru kuma sukan yi tunani mai zurfi. Yawanci ba sa son yin magana sosai a cikin taron jama'a.

4. Ƙaunar yin tunani

Suna jin daɗin yin tunani da nazari mai zurfi, kuma yawanci suna da sha'awar bincike da ƙarin sani.

5. Son aikata abubuwan bunƙasa ƙwaƙwalwa

Yawancin lokaci suna jin daɗin ayyuka irin na karatu, rubutu, zane-zane, ko kuma aikace-aikace dan bunƙasa tunaninsu.

Me ya sa Mutane Masu Shiru-shiru suke da muhimmanci a cikin al'umma?

1. Suna da dogon nazari

Mutane Masu Shiru-shiru suna da basira sosai wajen tunani da nazari, wanda yake da amfani a fannoni daban-daban na rayuwa.

2. Suna da zuzzurfan bincike

Suna da ƙwarewa a fannonin da suka shafi bincike da ƙarin sani kamar ilimin kimiyya da adabi.

3. Bayar da shawara

Suna da basira wajen shawara saboda suna nazari sosai kafin su yanke hukunci.

4. Abokan hulɗa

Duk da cewa ba sa yawan magana, Mutane Masu Shiru-shiru suna iya zama abokan hulɗa masu kyau saboda suna iya sauraron mutane sosai da idon basira kuma su fahimci mutum.

5. Mace Mai Shiru-shiru

Ta fi kowacce mace daɗin zaman aure saboda suna da matuƙar fahimta da nazartar hali da abin da mijinsu ya fi buƙata.

Shin kai Mutum Mai Shiru-shiru ne?

Idan har kuna jin daɗin maƙalolin shafin nan namu, to ku hanzarta sanar da dukkan abokan ku ko ƙawayen ku da dukkan waɗanda ku sani, ku gaya musu sunan adireshin shafin nan namu domin su ma su shigo cikin shafin su dinga amfana da shi kamar yadda ku ma kuke yi a kullum a kyauta.

Karanta Sauran anan»