KARANTA ALAMOMIN KASUWANCIN BOGI A INTANET

Kamar yadda na sha nanatawa, a intanet ana samun kuɗi sosai idan an yi da gaske. Wasu kuma suna fakewa da guzuma su harbi karsana, suna da wayon da suke yi su raba jama'a da abin hannunsu da sunan kasuwancin intanet. Masu irin wannan dabara suna da hanyoyi da yawa barkatai, har ma wani lokaci su ci da buguzum a ɗauka na gaskiya ne. 

Alamomin Kasuwancin Bogi a Intanet

Marubuci: Danladi Haruna

A yau na zakulo wasu daga hanyoyin da mutum zai yi wa kansa hukunci ya gane ko nau'in kasuwancin da aka bijiro masa na yi ne ko na bari.

Ga su kamar haka:

1. Abubuwan da ake sayarwa: Idan ka ga yawancin kayan da ake sayarwa ba wasu fitattu ba ne, watakila ma ba wadanda ake iya gani ba ne. Wasu na kiransu 'Packages' ko 'Bundles' ko 'Subscription'. Yawanci babu wani abu a ciki sai zunzurutun shiririta. Da za a ce ka nuna abin da aka sayar maka ko irin aikinsa ba za ka iya ba.

2. Kankanin Kudi  Babbar Riba: Daga yanayin ribar da aka yi alkawarin samu za ka fahimci akwai lauje cikin naɗi. Duk wani kasuwancin intanet da yayi alƙawarin samun ninki biyu ko fiye na abin da ka zuba cikin wata ɗaya, ka yi nesa - nesa da shi.

Yana da Kyau a Fara Tuntuɓar Masana Kafin a Fara Kasuwancin Intanet..

3. Shigo da wasu: Shi ne tsarin da ake kira 'Referral'. Watau za a ce idan ka kawo wani yayi rijista ta ƙarƙashinka za a baka wani abu na awalaja. Manyan kamfanoni fitattu kamar paypal da ebay da AliBaba da su Quickteller na nan Nijeriya duk suna yin haka, amma ba haka ta ci barkatai ba. Idan ka ga website na yin kasafin adadin kuɗin da za ka samu idan ka kawo mutane kaza zuwa kaza, lallai abin gudu ne.

4. Rijistar Kamfani: Kamar yadda muka san kamfanonin zahiri suna buƙatar a yi musu rijista da hukuma, haka ma kamfanonin intanet. Kowanne kamfani akwai irin rijistar da ta kamace shi. A Nijeriya dai, bayan rijista da CAC, wajibi ne kamfani mai hada hadar kuɗi ya yi rijista da SEC matukar yana da mutane 50 ko fiye da suka zuba kudinsu a cikinsa komai kankantar kudin.

5. Shugabanni da Jagororin kamfani: Idan ka ga kamfani ya ɓoye sunayen shugabanninsa an rumbun bayanai na Whois, to ka guje shi. Daga nan ne ake gane inda aka dosa har a iya tofa albarkacin baki. Kodayake, wasu na yin dabara su rubuta bayanan bogi a cikin rumbun. Don haka sai an kula kafin a saki jiki da su.

Bincike Kafin Shiga Fagen Kasuwancin Intanet..

6. Takardun Shaida: A Nijeriya, wajibi ne ga kamfani ya karbi wasu takardun bayanai daga masu son zuba hannun jari a cikinsa. Takardun shaidar sun haɗa da katin shaida, hoton mutum da BVN da katin ɗan ƙasa da kuma takardar biyan kuɗin ruwa ko wuta ko wata takardar shaida  da ke nuna adireshin mutum. Watau irin takardun da ake buɗe asusun banki da su. Duk kamfanin da ka ga ya kasance daga buhu sai tukunya, watau daga ka yi rijista da su ka zuba kuɗi sai kurum ka saurari 'alert', to abin gudu ne.

7. Ka'idojin Rubutu: Yawancin kamfanonin kasuwancin bogi ba su damu da rubutu cikin ingantattun hanyoyin ka'idojin rubutu ba. A kowane yare suke rubutun za ka ga kura-kurai barkatai tare da saka kalmomin da basu dace ba. Illar haka shi ne rasa martaba a farfajiyar duniyar google ta fuskar SEO. Wannan su ba damuwar su ba ne, saboda masu taya su tallan kamfanin suna iya isar da saƙon da ake bukata ta kafafen soshiyal midiya.

MAKALOLI MASU ALAKA:

Karanta Ma'anar Kalmar VAT a Mahangar Masana? Akan Su Waye Karin Harajin da Gwamnati Take yi Zai Shafa??

KARANTA HANYOYIN HARAJIN KASA DA NA JIHA

KARANTA DOKOKIN DA SUKA SHAFI HARKOKIN KUDI DA HARAJI

Ba duka aka taru aka zama ɗaya ba, ko anan Nijeriya akwai kasuwancin intanet mai riba sosai wanda ba gara ba zago. Ni ma na zuba a wasu daga cikinsu.  Wadannan kamfanoni sun haɗa da I-Invest, Payday, Elixir, AlatNg da sauransu. Kowacce rana hukumar SEC tana bibiyar ayyukan waɗannan kamfanonin, ta yadda koda sun durƙushe mutum zai iya maida asarar da ya yi.

Shafin komai da ruwanka, Muryarhausa24.com.ng munayin

aiki Tukuru don jin dadin ku.

Isar da bayanai akan lokaci ba tare da son

zuciya ba shine muradin Mu.

Burin shafin Muryar Hausa24 shine ta fito

da kyawawan manufofi, tsari, Nagartar masu jin yaren Hausa a dukkan fadin Nigeria da kasashen da suke makwabtaka da ita kuma ta hada kan masu jin yaren Hausa waje ɗaya a ko ina suke.

Ku ci gaba da kasancewa da Mu a www.muryarhausa24.com.ng   a duk inda Ku Kasance a fadin Duniya.

Mun kudiri aniyar tsage gaskiya dalla-dalla , sharhi mai gansarwa da suka hada da

harkokin yau da kullum da zummar

samar da zaman lafiya da kuma

daukaka kima da martabar

al’adun Hausa.

Zaku iya aiko mana da Labari ko shawarwari, Ra'ayoyin ku ko kuma nuna gamsuwar Ku akan yadda Mu ke tafiyar da wannan Shafi mai ALBARKA aika saƙon ka/ki akan addreshin Mu Na yanar gizo muryarhausa24@gmail.com  Za muyi farin ciki da samun saƙon ka/ki

Mungode

Source: www.muryarhausa24.com.ng