WASU-WASI A CIKIN SALLAH GUDA BIYU NE

TAMBAYA

Assalamu Alaikum, barka da warhaka.

Mallam dan Allah mene ne hukuncin mai yawan was-wasi acikin sallarsa?

MAI YAWAN WASU-WASI A CIKIN SALLARSA!!...

Kuma mene ne yafi dacewa
mutun yayi domin ya daina??

Nagode

(daga Ummie Maiwada).

AMSA

Was-wasi acikin Sallah kala biyu ne:

1. Akwai wanda yake faruwa ta dalilin sakaci da shagaltuwa da sha'anin duniya da kuma rashin damuwa da Sallar daga wajen Shi Mai Sallar.

Ta yadda zaka ga mutum yana sallah amma idonsa akan hanya, ko ta taga yana ganin masu wucewa. Ko kuma mutum yana Sallah amma ya kunna talabijin agabansa ko rediyo (ba yaso labarai su wuce shi).

Ko kuma kaga Alhaji yana Sallah a Masallaci amma zuciyarsa tana kasuwa. Harma wasu lokutan idan Liman yayi rafkanuwa a Sallar, da zarar Mamu sunyi Kabbara sai kaga Alhaji ya firgita. Azatonsa ko yaƙi aka soma.

Hukuncin irin waɗannan was-wasin, Haramun ne. idan ma basu ɓatawa Mutum Sallarsa ba, to zasu iya kaishi izuwa Rasa ladan sallar.

2. Was-wasi na biyu kuma Shine irin was-wasin da Shaiɗanun Aljanu suke haifarwa Mutum idan sun shiga jikinsa, ko kuma su na son su shiga.

Zaka ga masu fama da irin wannan larurar suna da yawan kokwanto acikin yawancin lamura. Musamman ma asha'anin Ibada.

Zaka ga idan sunzo Sallah su na yin iyakar bakin ƙokarinsu wajen kiyayewa, amma inaa! Zaka ga sun kiɗime sun rikice sun manta ko raka'a nawa sukayi.

Galibi ma tunane-tunane irin na saɓon Allah ne zasu riƙa zuwa musu acikin sallar.

Irin wannan babu laifi akan shi mai sallan.

Domin kuwa yana yin iyakar ƙokarinsa.

Wani ma har kuka zaka ga yana yi.

Kuma abin ya riga ya zamar masa cuta ko larura.

MAGANINSA SHINE:

Mutum ya dage da yawan ambaton Allah acikin dukkan motsinsa. Duk abinda zaiyi ya fara da Basmalah.

Yawaita karatun AL-KUR'ANI. Da kuma sauraron sautin AL-KUR'ANI.

Ya riƙa karanta Azkar na safe da yamma. Da na kwanciyar bacci da tashi.

Ya dena barin najasa tana daɗewa ajikinsa. Ya yawaita zama cikin tsarki da alwala.

Ya gujewa ayyukan saɓo manya da kanana.

Duk lokacin da zaiyi Sallar ya riƙa karanta Du'a'ul-Istifta­hi Afarkon Sallar.

Insha Allahu zai samu saukin abin.

Malamai sunce duk wanda irin wannan kokonton ya aureshi, yayi sujjadah ba'adi (duk sanda ya idar da Sallar).

Shafin komai da ruwanka, Muryarhausa24.com.ng munayin

aiki tuƙuru don Ilimantarwa da Faɗakarwa.

Ku ci gaba da kasancewa da mu a www.muryarhausa24.com.ng   a duk inda ku kasance a faɗin Duniya.

MURYAR HAUSA24 FARIN CIKIN AL'UMMA.

Source: ZAUREN FIQHU