Wanene Shaihu Ibrahim Niasse?
Niasse shi ne ɗan Afirka ta Yamma na farko da ya jagoranci Masallacin Al-Azhar a Masar, bayan da aka yi masa laƙabi da "Sheikh al-Islam". Ya kasance kusa da yawancin Shugabannin masu fafutukar Neman 'yanci a Afirka ta Yamma saboda gudunmawar da ya bayar na 'yancin kai a ƙasashen Afirka.
Marubuci: Saliadeen Sicey
Shehu Ibrahim ya tsaya tsayin daka wajen yaƙar mamaya (Imperialism) da sabbi da tsoffin salon mulkin mallaka da kare 'yancin ƙasashe da mutuncinsu da kuma ganin sun tsaya bisa ƙafafunsu, tareda ƙara danƙon zumunci tsakanin Ƙasashen Africa dana Yankin Asia dama ƙarfafa tsaron Duniya baki ɗaya.
Menene ma'anar Inyass?
Abubuwa 2 da aka gabatar daga Najeriya sun yarda da sunan Inyass ya na nufin " Mutumin kirki "
Ibrāhīm Niasse (1900–1975) - ko (Faransanci Ibrahima Niasse) , Wolof , Larabci: شيخ الإسلام الحاج إبراهيم إبن الحاج عبد الله التجاني الكولخي التجاني الكولخي Shaykh al-'Islām al-Ḥājj Ibrāhīm ibn al-Ḥājj ʿAbd Allāh at-Tijānī al-Kawlakhī - ya kasance babban shugaban Senegal (wolof) na Tijānī Sufi na Islama a Afirka ta Yamma . Mabiyansa a yankin Senegambiya su na kiran shi a harshen Wolof a matsayin Baay, ko "uba."
Niasse shi ne mutumin Afirka ta Yamma na farko da ya jagoranci Masallacin al-Azhar a Misira, bayan an yi masa laƙabi da "Sheikh al-Islam". Ya kasance kusa da masu gwagwarmayar neman 'ƴanci da yawa a Afirka ta Yamma saboda gudummawar da ya bayar don samun Ƴanci a Ƙasashen Afirka. Ya kasance aboki kuma mai ba da shawara ga Shugaban Ghana na farko, Kwame Nkrumah, da Aboki Ga Shugaban ƙasar Egypt Gamal Abdel Nasser da Sarki Faisal na Saudi Arabia. Sheikh Ibrahim ya kasance Mataimakin Shugaban Ƙungiyar Ƙasashen Musulmi ta Duniya tare da Faisal a matsayin Shugaba.
Haihuwa
An haife shi a Ranar Alhamis 8 Ga Watan Nuwamba 1900 a ƙauyen Tayba Ñaseen (wanda aka rubuta lafazin Taïba Niassène a Faransanci), tsakanin garin Kaolack na Senegal da iyakar Gambiya, shi ɗa ne ga Allaaji Abdulaay Ñas (1840-1922), babban wakilin Ɗarikar Sufaye Ta Tijānī wanda galibi ake kira Tareeqat al-Tijjaniyya, a yankin Saalum a farkon ƙarni na ashirin.
Ya tashi Bisa kularwar mahaifinsa Allaaji Abdulaay Ñas, ya Haddace Al-Qur’ani Mai Girma a hannun mahaifin nasa, a cikin 'yan ƙananan shekaru ya wallafa littafi yana da shekaru 21 a duniya.
A lokacin samartakarsa, Sheykh Ibrahim ya sake komawa tare da mahaifinsa Allaaji Abdulaay Ñas zuwa garin Kaolack, in da suka kafa zāwiya (cibiyar addini) na Lewna Ñaseen. Bayan rasuwar mahaifinsa a Lewna Ñaseen a 1922, babban yayan Shaykh Ibrāhīm, Muhammad al-Khalīfa, ya zama magajin mahaifinsa ko Khalīfa.
Shaykh Ibrāhīm mai shekaru 22 ya shafe mafi yawan lokacinsa ya na noma a gonar danginsa tare da koyar da yawan almajirai a ƙauyen da ke kusa da Kóosi Mbittéyeen. Duk da cewa Shaykh Ibrāhīm bai taɓa ikirarin cewa shi ne magajin mahaifinsa ba, saboda kwarjini da ilimin da yake da shi, ya samu ɗimbin almajirai, kuma rikici ya tashi tsakanin almajiransa da na babban yayansa, Muhammad al-Khalifa.
A cikin 1929, yayin da yake cikin gona a Kóosi Mbittéyeen, A lokacin Yana saurayi, Shaykh Ibrāhīm ya ba da sanarwar cewa an ba shi Mabuɗin Sirrin Ilimin Allah, kuma don haka ya zama Khalifa na Sheykh Tijani a cikin Dokar Tijaniyya, matsayin da ba wanda ya samu a wancan lokacin.
Daga nan Sheikh Ibrahim ya bayyana cewa duk wanda yake son ya sami ma'arifa, matakin Tabbacin Allah a cikin Ɗarikun Sufaye, dole ne ya bi shi.
A shekarar 1930, bayan Sallar al-Fiṭr (ƙarshen watan Ramadān), faɗa ya ɓarke tsakanin almajiran Shaikh Ibrahim da na Muhammad al-Khalīfa Lamarin da ya sa Shaihin Ibrahim nan da nan ya yanke shawarar komawa tare da almajiransa zuwa sabon wuri.
A wannan maraice, ya tashi tare da wasu rukuni na kusa da almajiransa don nemo sabon wurin zama, washegari kuma suka kafa sabuwar zāwiya a Madina Baay, wani ƙauye wanda daga baya aka sanya shi cikin garin Kaolack mai girma. Shehin ya raba lokacinsa tsakanin koyarwa a lokacin rani a Madina Baay da noma a lokacin damina a Koosi Mbittéyeen. A lokacin bazara na Shekarar 1945 ya sake kafa kansa a gidan mahaifinsa a ƙauyensa na asali na Tayba Ñaseen, Ya sake ginawa da sake tsara garin bayan da gobara ta lalata yawancinsa.
Shahara
Shaharar Shaykh Ibrahim ta bazu cikin sauri a cikin ƙauyuka, kuma mafi yawan almajiran mahaifinsa daga ƙarshe sun zama almajiransa duk da kasancewarsa ƙarami a cikin iyali. Koda yake almajiransa sun kasance 'yan tsiraru a cikin Senegal, amma sun kasance mafi girman reshe na Tijānīyyah a duk duniya. A shekarar cikin 1930, shugabanni da yawa na Larabawa 'Idaw ʿAli na Mauritania-ƙabila ɗaya da Su ke Bin Ɗarikar Tijānī Ta Yammacin Afirka, sun bayyana kansu A Matsayin almajiran Shaykh Ibrahim. Sanannen cikinsu shi ne Shaykhāni, Muḥammad Wuld an-Naḥwi da Muḥammad al-Mishri. Tareeqa al-Tijaniyya al-Ibrahimiyya, kamar yadda aka san almajiran shaikhu ya bunƙasa kuma ya samu ɗimbin mabiya a cikin shekarun 1930s da 1940 a duk arewacin da yammacin Afirka.
A shekarar 1937 lokacin da suka haɗu da Shaykh Ibrahim a lokacin aikin hajji a Makkah, Sarkin Kano, A Najeriya, Alhaji 'Abdullahi Bayero ya yi mubaya'a ga shehin kuma ya bayyana kansa almajirin shaikh Ibrahim. Wannan lamarin ya sa Shaykh Ibrahim ya sami amincewar da yawa daga fitattun shugabannin Tijānīyyah A Arewacin Najeriya da ma wasu da dama waɗanda ba 'yan ɗarikar ba.
Alhaji Abdulmalik Atta - basarake ne daga Okene kuma Babban Kwamishina na farko a Najeriya A ƙasar Ingila, yana ɗaya daga cikin manyan almajiran sheikh Ibrahim da kuma surukin shehin ta hanyar ‘yarsa Sayyida Bilkisu.
Shaykh Ibrahim ya zama sanannen Shaykh al-Tareeqa (Jagoran Ɗarikun Sufaye) a ko'ina cikin yankunan ƙasar Hausa ta Yammacin Afirka. A ƙarshe, ya na da almajirai nesa da Senegal.
A lokacin rasuwarsa a 1975 a Landan, Ingila, Shaykh Ibrahim Niass ya na da miliyoyin mabiya a duk Yammacin Afirka.
Ya Rasu 25 Ga Watan Yuli A St Thomas' Hospital, London, United Kingdom. Ya na da Shekaru 75 A Duniya, A rayuwarsa ya Rubuta Litattafan Addini 75. Ya Haifi Ya'ya 75.
Dalilin Zuwan Sheikh Ibrahim Inyass ne, aka samu Hutun Bikin Maulidin Manzon Allah (S.A.W) a Najeriya.
Sanadiyar Shehu Ibrahim Inyass (R.T.A) ne Gwamnatin Najeriya ta sanya Hutun Maulidi ya zamo Doka A Kasa, bayan Shehu ya zo taya Najeriya murnan samun 'Yanci A Shekarar 1960.
Bayan ƙasar Najeriya ta samu 'yanci daga mulkin Turawa, Shehu Ibrahim Inyass (R.T.A) ya kawo ziyara Najeriya na musamman domin taya murnan samun 'yanci, da Shehu ya gana da Firar minista na farko, Sir Abubakar Tafawa Ɓalewa, sai Shehu ya ba shi shawara cewa tunda kai Musulmi ne, ya kamata ka sanya ranar Maulidi ya zamo ranar hutu a Najeriya domin murnar zagayowan ranar da aka haifi Annabi Muhammadu (S.A.W.W), kamar yadda abokinka shugaban ƙasa wato (Head Of State) Namdi Azikiwe yake hutun Kirsimeti, nan da nan Sir Abubakar Tafawa Balewa ya aika da wannan dokar majalisa, bayan an yi zafaffiyar mahawara daga ƙarshe dai Majilisa ta amince a ta ke Tafawa Balewa ya sanya hannu a wannan doka. Wannan shi ne dalilin da ya sa duk ranar maulidi gwamnati ke bada hutu.
