Da yake addini shi ne mafi girman mizani da za mu iya auna komai na rayuwa da shi, za mu fara kallon nasa ma'aunin, haƙiƙa mafi dacewa abun da ya kamata a duba ga namiji don tantance ko nagari ne, shi ne, riƙon addini da kuma kyan ɗabi'arsa. Bisa la'akari da faɗin Annabi ( S.A.W ): "Idan wanda kuka yarda da addininsa da ɗabi'arsa ya zo muku (neman aure) to ku aure shi" ko "ko aurar masa".
Suffofin Miji Na Gari
Hoto: Medium
Marubuci:- Hamza Dawaki
Yana da kyau matuƙa, mata da iyaye su lura da maganar ɗabi'ar nan sosai, domin sau da dama a kan samu mutumin da ya suffantu da addini amma ba shi da ɗabi'u masu kyau. Wannan kuma yana ɗaya daga cikin mafiya wahalar da matan da ke ƙarƙashin su.
Mutum mai kyakkyawar ɗabi'a, kamar yadda Abdullahi ibn Mubarak yake cewa: Mutum ne mai sakin fuska, mai yawaita kyawawan ayyuka, kuma wanda ya kame ga barin cutar da mutane.
Wannan ɗabi'a tana taimaka masa ƙwarai wurin tattalin zamantakewarsa, domin shi a kullum burinsa ya yi wa mutane abin kirki. Kuma shi ba zai cutar da su ba. Sannnan yana ɗaya daga cikin manyan sinadaran soyayya da mata suke matuƙar so, wato sakin fuska.
Mutum mai kyakkyawar ɗabi'a zai iya kasancewa mai yawan haƙuri da kau da kai da kuma yafiya. Za ka taras shi ba mai rama mugunta da mugunta ba ne. Yana da kyau mu sani cewa rama mugunta da mugunta, ko rama mummuna da mummuna yana ɗaya daga cikin manyan abubuwan da suke haddasa macewar soyayya tsakanin ma'aurata.
Domin yayin da mace ta yi zargin cewa mijinta ya daina yi mata wani abu da ya saba yi mata na kyautatawa, ita ma ta janye abin da take yi masa na kyautatawa, to wannan soyayyar a saurari ranar macewarta, amma idan kuwa aka yi katari da miji na gari, sai akasin hakan ya faru, domin shi ba ya rama mummuna da mummuna. Yayin da kuwa ki ka yi wa mutum wani abu mai muni, ya kau da kai, ko ma ya rama miki da mai kyau, to lokaci guda za ki tsinci kanki cikin wani yanayi na jin kunya da nadama. Don haka duk wani yunkuri na maimaita wannan abin sai ya rasa gurbi a ranki.
