Ga duk mai fama da tsangwamar jama'ar da'irar sa da ke yi masa hukuncin kuɗin goro da ƙin fahimtar sa da gangan dangane da baiwa ko burin sa, ka sani kai ɗaya ne daga cikin miliyoyin waɗanda ake sheƙe wa mafarkan su ko burikan su a kowacce rana.
Marubuci:- Buzu Danfillo
Idan kana daga cikin su, ka yaɗa wannan saƙon don nuna bara'ar ka akan wannan ɗabi'a ta koma-baya, tare da haska wa ire-iren ka cewa ba su kaɗai ba ne. Buzu na nan tare da ku.
Mun jima muna yi wa kanmu ƙeta ta yadda wasu ke morar fasihan mu sannan mu taya su ta hanyar sallama musu cewar ai dama fasahar su ce.
Duk da'irar da ba ta fahimci muhimmanci da fa'idar baiwa da fikirar ka ba, kada ka cancantar da ita zaman ka a cikin ta balle wawayen cikin ta su samu damar doɗe maka hasken lamirin ka da bakunan su marasa albarkar iya faɗin alkhairi, duk girma da yadda kake son wannan da'ira, ka motsa nesa daga gare ta, kuma ka gode wa Allah da kai ba bishiya ba ce.
