Wani malami yana koya wa wani yaro ɗan shekara 6 lissafi, malamin ya tambayi yaron, "Yanzu idan na ba ka goruba ɗaya, na ƙara maka ɗaya, na sake ƙara maka ɗaya, sun zama nawa?"
Marubuci:- Yahaya Bala
Kafin ƙiftawar ido, yaron ya ce, "Huɗu!"
Da jin wannan amsa, sai malamin ya ɗan ɓata rai. Ta yaya kuma zai ce "huɗu", bayan amsar uku ce? Malamin ya sake cewa, "Ka saurare ni da kyau, ka ji. Tambaya ce mai sauƙi. Cewa na yi, idan na ba ka goruba ɗaya, na ƙara maka ɗaya, na sake ƙara maka ɗaya, sun zama nawa?".
Yaron ya yi amfani da yatsun hanunsa ya lissafa. Ya sake ba da amsa da, "Huɗu".
Malam ya hasala tare da ƙura wa yaron ido cikin takaici.
Yaron a ransa ya ce, to yanzu wace amsa zan ba wa malam ya yarda har ya ji daɗi? Yaron ya sake cewa, "Huɗu".
Ƙarshe dai malamin ya je ya nemo goruba har guda uku, ya kawo gaban yaron ya ajiye yana miƙa masa ɗaya bayan ɗaya yana ƙirgawa dalla-dalla har ya gama, sai ya sake ce wa malamin, "Huɗu kenan!"
Malamin ya zare wa yaron ido ya ce, "Ha'a! Kai wane irin yaro ne? Ta yaya amsar ta zama huɗu?"
Yaron ya firgita, cikin muryar tsoro ya ce, "Saboda ai ina da goruba ɗaya a cikin jakata. Idan na haɗa da waɗanda ka ban sun zama huɗu."
Darasi
Idan wani ya ba ka amsa ko martani saɓanin abun da kake tsammani, to ba lallai ne ya zama kuskure ba. Wataƙila, ya fahimci abun da kai ba ka hango ba. Saboda haka, ka nemi ƙarin bayani domin a fitar da jaki daga duma.
Idan har kuna jin daɗin maƙalolin shafin nan namu, to ku hanzarta sanar da dukkan abokan ku da dukkan waɗanda ku sani, ku gaya musu adireshin shafin nan namu domin su ma su shigo cikin shafin su dinga amfana da shi kamar yadda ku ma kuke yi a kullum.
