Labarin wani mahaifi mai hikima da ya yi niyyar koyawa ɗan sa ilimin rayuwa. A wata ranar asabar da safe bayan karin kumallo, da yake ranar ba makaranta, sai uban ya umarci yaron da ya shirya su fita kasuwa tare, yaro ya yi ta murna domin abun da ya daɗe yana fata kenan.
Marubuci:- Abdulfatah Yakubu
Haka suka wuni a kasuwa ana ta hadahadar kasuwanci, babban aikin da uban ya ba yaron shi ne ya zauna ya sa ido akan yadda komai yake gudana, dare ya yi suka dawo gida, washegarin lahadi ma suka koma.
Ranar litinin da safe yaro ya shirya zai tafi makarantar boko, uban ya kira shi ya ce "Yau lafiya ba ka zo ka karɓi kuɗin makaranta ba?" Yaron ya ce "Baba ka bar shi na gode, kuɗin da ka ba ni na abincin jiya ma sun wadatar".
Uban ya cika da mamakin yadda tunanin yaron sa ya sauya lokaci ɗaya, yaro ya ci gaba da cewa "Baba ban taɓa sanin haka kake shan wahala wajen inganta rayuwar mu ba, iya zaman mu a kasuwa na kwana biyun nan na fahimci cewa duk wahalar da kake yi, kana yi ne domin inganta rayuwar mu, a irin wannan yanayi idan ba mu tausaya maka ba wa za mu tausayawa?"
DARASI
1. Hikima da dabara su suke tarbiyya ba tada jijiyoyin wuya ba. Aiki ne muhimmi ga mai tarbiyya ya sa hikima da dabara wajen tarbiyyantar abun tarbiyyar sa.
Masu hikima suka ce "Mutumin da ya san kansa cikin ruwan sanyi yake dafa ganda".
2. Mahaifan ka su ne ƙashin bayan nasarar ka, domin su ne kaɗai za su iya haƙura da jin daɗin rayuwar su domin inganta rayuwar ka da ta ƙannen ka.
3. Mafi girman sakamako ga wanda ya kyautata shi ne a kyautata masa, koda yanzu ba ka da halin taimakon iyayen ka, to ka sani za ka iya taimakon su ta hanyar rage musu nauye-nauyen ka.
